நெல்லை அருகே வியாபாரியிடம் ரூ. 20 ஆயிரம் மாமூல் கேட்டு மிரட்டிய வாலிபருக்கு வலைவீச்சு

நெல்லை:

நெல்லையை அடுத்த தேவர்குளத்தை சேர்ந்தவர் ராமர் (வயது 42). இவர் கடைகளுக்கு தண்ணீர் பாட்டில், குளிர்பானங்கள் விற்பனை செய்யும் தொழில் செய்து வருகிறார். சம்பவத்தன்று தனது வாகனத்தில் சரக்குகளை ஏற்றிக்கொண்டு சென்றார்.

தேவர்குளம் பஜார் பகுதியில் சென்றபோது அதே பகுதியில் தச்சு குடி தெருவில் வசிக்கும் ஆனந்தராஜ் என்பவர் இவரது வாகனத்தை வழிமறித்து ரூ.20 ஆயிரம் மாமூல் கொடுக்குமாறு மிரட்டியதாக கூறப்படுகிறது.

அதற்கு ராமர் கொடுக்க மறுக்கவே அவரது வீட்டுக்கு சென்ற ஆனந்தராஜ் ராமரின் மனைவியிடம் அரிவாளை காட்டி மிரட்டியுள்ளார். உடனே அக்கம் பக்கத்தினர் அங்கு ஓடி வந்ததும் அங்கிருந்து ஆனந்தராஜ் தப்பி சென்று விட்டார். இது தொடர்பாக தேவர்குளம் போலீசார் வழக்குப்பதிவு செய்து ஆனந்தராஜை தேடி வருகின்றனர்.கொலை மிரட்டல் விடுத்து தப்பிச் சென்ற ஆனந்தராஜ் கடந்த ஒரு மாதத்திற்கு முன்பு தான் குண்டர் சட்டத்தில் சிறையில் இருந்து வெளியே வந்துள்ளார்.