திருவொற்றியூர்-தண்டையார்பேட்டையில் மின்சார ரெயில் மோதி 2 வாலிபர்கள் பலி

ராயபுரம்:

சத்தீஸ்கர் மாநிலத்தை சேர்ந்தவர் கமல்சிங் (வயது27). தண்டையார்பேட்டையில் தங்கி கொத்தனார் வேலை பார்த்து வந்தார்.

நேற்று இரவு அவர் தண்டையார்பேட்டை ரெயில் நிலையம் அருகே தண்டவாளத்தை கடக்க முயன்றார். அப்போது கும்மிடிப்பூண்டியில் இருந்து சென்ட்ரல் நோக்கி வந்த மின்சார ரெயில் கமல்சிங் மீது மோதியது. இதில் அவர் சம்பவ இடத்திலேயே உடல் நசுங்கி பலியானார்.

மற்றொரு சம்பவம்....

சத்தீஸ்கர் மாநிலத்தை சேர்ந்தவர் சஞ்சய் சாரகா (26). திருவொற்றியூரில் தங்கி கூலி வேலை பார்த்து வந்தார். நேற்று மாலை அவர் திருவொற்றியூர் விம்கோ நகர் ரெயில் நிலையம் அருகே தண்டவாளத்தை கடந்தார்.

அந்த நேரத்தில் சென்ட்ரல் நோக்கி வந்த மின்சார ரெயில் சஞ்சய் சாரகா மீது மோதியது. இதில் அவர் பலியானார்.

பலியான 2 வாலிபர்களின் உடலையும் கொருக்குப்பேட்டை போலீசார் கைப்பற்றி விசாரணை நடத்தினர்.

சஞ்சய் சாரகா பலியானது பற்றி சத்தீஸ்கரில் உள்ள அவரது பெற்றோருக்கு தகவல் தெரிவிக்கப்பட்டது. அவர்கள் உடலை வாங்க மறுத்து உள்ளனர்.

மேலும் இறுதிச்சடங்கை போலீசாரையே செய்யும்படி அவர்கள் கூறியதாக தெரிகிறது.

இதனால் அடுத்தகட்ட நடவடிக்கை எடுப்பது குறித்து போலீசார் ஆலோசித்து வருகிறார்கள்.