நீங்கள் தேடியது "Periyar bus stand"

மதுரை அருகே உள்ள அச்சம்பத்து பஜனை மடத்து தெருவைச் சேர்ந்தவர் விஜயன். இவரது மனைவி கயல்விழி (30). இவர், நேற்று பெரியார் பஸ் நிலையம் பகுதியில் நடந்து சென்று கொண்டிருந்தார். அப்போது பின் தொடர்ந்து வந்த 3 பெண்கள் திடீரென கயல்விழியிடம் இருந்த கைப்பையை பறித்துக் கொண்டு ஓடினர்.

இதனால் அதிர்ச்சியடைந்த கயல்விழி கூச்சலிட்டார். உடனே அக்கம் பக்கத்தினர் துரத்திச் சென்று 3 பேரையும் பிடித்தனர்.

திடீர்நகர் போலீஸ் நிலையத்துக்கு அழைத்துச் செல்லப்பட்ட அவர்களிடம் நடத்திய விசாரணையில், ராமநாதபுரம் மாவட்டம் உச்சிப்புளியை சேர்ந்த கணேசன் மனைவி சுதா (40), சுரேஷ் மனைவி ரேவதி (25), கிருஷ்ணா மனைவி காமாட்சி (35) என தெரியவந்தது.

3 பேரையும் கைது செய்த போலீசார் அவர்களிடம் இருந்து ரூ.5 ஆயிரம் ரொக்கம், ஒரு செல்போனை பறிமுதல் செய்தனர்.