ஆஸ்திரேலியாவில் ஆண்டுதோறும் நடைபெற்று வரும் பிக் பாஷ் டி20 லீக் தொடரின் 2018-19 சீசன் இன்று தொடங்கியது. பிரிஸ்பேனில் நடைபெற்ற தொடக்க ஆட்டத்தில் நடப்பு சாம்பியன் அடிலெய்டு ஸ்ட்ரைக்கர்ஸ் - பிரிஸ்பேன் ஹீட் அணிகள் மோதின.
முதன்முறையாக காய்ன் சுண்டப்படுவதற்குப் பதிலாக பேட் தூக்கிப்போடப்பட்டது. இதில் அடிலெய்டு அணி டாஸ் வென்று பந்து வீச்சு தொடங்கியது.
அதன்படி பிரிஸ்பேன் ஹீட் அணியின் பிரெண்டன் மெக்கல்லம், பிரையன்ட் தொடக்க வீரர்களாக களம் இறங்கினார்கள். மெக்கல்லம் 4 ரன்னில் ஆட்டமிழந்தது ஏமாற்றம் அளித்தார். பிரையன்ட் 22 ரன்னிலும் வெளியேறினார். அடுத்து வந்த கேப்டன் கிறிஸ் லின் 20 பந்தில் நான்கு பவுண்டரி, 2 சிக்சருடன் 33 ரன்கள் சேர்த்தார். விக்கெட் கீப்பர் பெய்ர்சன் 13 பந்தில் 24 ரன்கள் சேர்க்க பிரிஸ்பேன் ஹீட் 19.4 ஓவரில் 146 ரன்கள் சேர்த்து ஆல்அவுட் ஆனது. அடிலெய்டு ஸ்ட்ரைக்கர்ஸ் அணியின் சுழற்பந்து வீச்சாளரான ரஷித் கான் 4 ஓவரில் 19 ரன்கள் மட்டுமே விட்டுக்கொடுத்து 3 விக்கெட்டுக்கள் கைப்பற்றினார்.
பின்னர் 147 ரன்கள் எடுத்தால் வெற்றி என்ற இலக்குடன் அடிலெய்டு அணியின் கேப்டன் அலெக்ஸ் கேரி, வெதரால்டு ஆகியோர் தொடக்க வீரர்களாக களம் இறங்கினார்கள். வெதரால்டு 17 ரன்னில் ஆட்டமிழந்தார். அலெக்ஸ் கேரி சிறப்பாக விளையாடி 46 பந்தில் 5 பவுண்டரி, 4 சிக்சருடன் 70 ரன்கள் குவித்தார். வெல்ஸ் ஆட்டமிழக்காமல் 22 பந்தில் 24 ரன்கள் சேர்க்க அடிலெய்டு ஸ்ட்ரைக்கர்ஸ் 19.1 ஓவரில் 5 விக்கெட் இழப்பிற்கு 147 ரன்கள் எடுத்து 5 விக்கெட் வித்தியாசத்தில் வெற்றி பெற்றது.
ஐபிஎல் தொடரில் இரண்டு கோடிக்கு மேல் ஏலம் போன அடிலெய்டு கேப்டன் இன்ங்கிராம் 1 ரன்னில் ஆட்டமிழந்து ஏமாற்றம் அளித்தார்.
