அரியலூர்

அரியலூர்:

அரியலூர் மாவட்டத்திலுள்ள அரசு பள்ளிகளில் தேசிய அறிவியல் தினம் கொண்டாடப்பட்டது. கல்லக்குடியில் உள்ள ஊராட்சி ஒன்றிய நடுநிலைப்பள்ளியில் நடைபெற்ற தேசிய அறிவியல் தின விழாவுக்கு அப்பள்ளி தலைமை ஆசிரியர் திருமலை செல்வி தலைமை தாங்கி அறிவியல் கண்காட்சியை தொடக்கி வைத்து பேசினர்.

80 மாணவர்கள் தங்களது படைப்புகளை  காட்சிப்படுத்தினர். இதற்கான ஏற்பாடுகளை பள்ளி அறிவியல் ஆசிரியர் சாந்தி செய்திருந்தார். கண்காட்சி நிறைவில் சிறந்த படைப்புகளுக்கு பரிசுகள் வழங்கப்பட்டன.

ஜெயங்கொண்டம் அடுத்த புதுச்சாவடி ஊராட்சி ஒன்றிய நடுநிலைப்பள்ளியில் நடைபெற்ற விழாவுக்கு அப்பள்ளியின் தலைமை ஆசிரியர் சாந்தி தலைமை தாங்கினார். வட்டார வளமைய ஆசிரியர் பயிற்றுநர் கண்ணதாசன் சிறப்பு விருந்தினராக கலந்து கொண்டு, சர்.சிவி.ராமன் அறிவியல் கோட்பாடு, அவரது அறிவியல் ஆய்வுகள் பற்றி எடுத்துக்கூறி விழிப்புணர்வு ஏற்படுத்தினார்.

இதற்கான ஏற்பாடுகளை ஆசிரியர்கள் செங்குட்டுவன், பவானி, கவிதா ஆகியோர் செய்திருந்தனர். நிகழ்வில், மின்சாரம் இல்லாத நீர் ஏற்றும் பம்பு, தானியங்கி விசிறி, சுற்றுச்சூழல் பாதுகாப்பு, நீர் மேலாண்மை, காடுகளின் முக்கியத்துவம் உள்ளிட்ட மாணவர்களின் படைப்புகள் இடம் பெற்றிருந்தன. தொடர்ந்து அனைவரும் உறுதிமொழி எடுத்துக்கொண்டனர்.

செந்துறை அடுத்த பொன்பரப்பி அரசு மேல்நிலைப்பள்ளியில் நடைபெற்ற தேசிய அறிவியல் தின கண்காட்சியை மாவட்ட முதன்மைக் கல்வி  அலுவலர் ராமன் தொடக்கி வைத்து, மாணவர்களின் படைப்புகளை பார்வையிட்டார்.

பள்ளி தலைமை ஆசிரியர் ராஜேந்திரன் தலைமை தாங்கினார். மாவட்ட கல்வி அலுவலர் பேபி முரளிகிருஷ்ணன், பள்ளி துணை ஆய்வாளர் இளங்கோவன் ஆகியோர் முன்னிலை வகித்தனர். இதற்கான ஏற்பாடுகளை ஆசிரியர்கள் பஞ்சாபிகேசன் செங்குட்டுவன், ஜோதிலிங்கம், வெங்கடேசன், சங்கர், ரோஸ், சிவகுமார், திருமூர்த்தி ஆகியோர் செய்திருந்தனர்.

முன்னதாக பட்டதாரி ஆசிரியர் பசுபதி வரவேற்றார். முடிவில் இடைநிலை ஆசிரியை வளர்மதி நன்றி தெரிவித்தார். இதேபோல் மாவட்டத்திலுள்ள அனைத்து நடுநிலை மற்றும் உயர்நிலை, மேல்நிலைப்பள்ளிகளில் தேசிய அறிவியல் தினம் கொண்டாடப்பட்டது.

அரியலூர் :

அரியலூர் மாவட்டம் ஜெயங்கொண்டம் ஊராட்சி ஒன்றிய அலுவலக கூட்டரங்கில் சாதாரண குழு கூட்டம், ஒன்றிய பெருந்தலைவர் ரவிசங்கர் தலைமையில் நடைபெற்றது. கூட்டத்திற்கு துணைத் தலைவர் லதா கண்ணன், வட்டார வளர்ச்சி அலுவலர்கள் பிரபாகரன், குருநாதன் (கிராம ஊராட்சி) ஆகியோர் முன்னிலை வகித்து பேசினார்.

கூட்டத்தில் ஒன்றிய நிதியில் நடைபெறும் வேலைகள் குறித்து, கணக்கு வழக்குகளை பிரிவு எழுத்தர் வெங்கடாஜலபதி வாசித்தார். இதில் கழுவந்தோண்டி கிராமத்தில் ஒருங்கிணைந்த நீதிமன்ற வளாகம் கட்டிடம் பணி முழுவதும் நிறைவடைந்த நிலையில் மார்ச் மாதம் இறுத்திக்குள் நீதிமன்ற வளாகம் திறக்க இருப்பதால் பணிகளை விரைந்து முடிக்க தலைமை நீதிபதி கேட்டுக்கொண்டதன் பேரில் ஊராட்சி ஒன்றிய பொது நிதியிலிருந்து ரூ.30 லட்சம் எடுத்து சாலை அமைப்பதற்காக வழங்கப்பட்டது.

இதுகுறித்து ஒன்றிய குழு கூட்டத்தில் ஒன்றிய குழு உறுப்பினர்கள், அனுமதி இன்றி நிதி ஒதுக்கீடு செய்ததாக கூறி ஆளும் கட்சி தி.மு.க. கவுன்சிலர்கள் 10&க்கும் மேற்பட்டோர் வெளிநடப்பு செய்தனர். இது குறித்து துணைத் தலைவர் லதா கண்ணன் கூறுகையில்:
 
ஜெயங் கொண்டம் கழுவந் தோண்டி அருகே புதிய நீதிமன்றம் அமைக்கப்பட்டு நீதிமன்ற வளாகத்தில் உள்ள சாலைகள் செப்பனிடுவதற்காக பொது நிதியிலிருந்து ரூ.30 லட்சம் மதிப்புள்ள சாலையை மன்ற உறுப்பினர் அங்கீகாரம் இன்றி நிதி ஒதுக்கீடு செய்து பணி நடைபெற்று வருகிறது.

இதனை கண்டித்து ஆளும் கட்சி கவுன்சிலர்கள் ஒன்றிய குழு உறுப்பினர் சாதாரண குழு கூட்டத்தில் இருந்து 10& க்கும் மேற்பட்டோர் தற்போது வெளி நடப்பு செய்துள்ளதாகவும், கூட்டம் நடை பெறுவதற்கு முன்பாக இது குறித்து ஆலோசிக்கப்பட்டதாகவும், இருப்பினும் கவுன்சிலர்கள் ஒப்புக் கொள்ளாத நிலையில் கூட்டத்தில் இது குறித்து கேள்வி கேட்கப்பட்டது. வட்டார வளர்ச்சி அலுவலர் அளித்த பதில் கவுன்சிலருக்கு திருப்தி அளிக்காததால் ஒன்றிய கவுன்சிலர்கள் வெளிநடப்பு செய்கிறோம் என அறிவித்து வெளிநடப்பு செய்தனர்.

மேலும் இறவாங்குடி கிராமத்தைச் சேர்ந்த ஒன்றிய கவுன்சிலர் ராஜசேகரன் கூறுகையில்  இனி வருங்காலங்களில் மன்ற கூட்டங்களில் அனுமதி பெற்ற பின்னரே எந்தவொரு தீர்மானங்களையும் நிறைவேற்ற வேண்டும் என கோரிக்கை வைத்துள்ளனர்.

அரியலூர் :

அரியலூர் மாவட்டம் ஜெயங்கொண்டத்தில் பாட்டாளி மக்கள் கட்சியில் நகரச் செயலாளராக இருந்து வந்தவர் மாதவன் தேவா. இவரை கடந்த சில நாட்களுக்கு முன்பு பாட்டாளி மக்கள் கட்சியின் மாநில தலைவர் கோ.க.மணி நகர செயலாளர் பதவியிலிருந்து நீக்கி அறிக்கை வெளியிட்டார்.

இந்நிலையில் கட்சியிலிருந்து நீக்கப்பட்ட மாதவன் தேவா தனது பிறந்தநாளை முன்னிட்டும், நான்கு வார்டுகளில் கட்சி வேட்பாளர்கள் வெற்றி பெற்றதை முன்னிட்டு தனது ஆதரவாளர்கள் சுமார் 200-க்கும் மேற்பட்ட இளைஞர்களுடன் காடு வெட்டியில் உள்ள மறைந்த முன்னாள் வன்னியர் சங்க மாநில தலைவரும், முன்னாள் எம்.எல்.ஏ.வுமான ஜெ.குருவின் மணி மண்டபத்திற்கு சென்று அவரது சிலைக்கு மாலை அணிவிப்பதற்காக சென்று கொண்டிருந்தனர்.
 
அப்போது காடுவெட்டியிலுள்ள சிலருக்கு மாதவன் தேவா வரும் தகவல் கிடைத்துள்ளது. இதனால் மாதவன் தேவாவை உள்ளே விடக்கூடாது என கூறி ஏராளமான கட்சி நிர்வாகிகள், உறுப்பினர்கள் என பலரும் அப்பகுதியில் திரண்டு இருந்தனர்.

இதுகுறித்து போலீசாருக்கு கிடைத்த தகவலின் பேரில் ஜெயங்கொண்டம் அருகே சின்னவளையம் கிராமத்திற்கு முன்பாகவே ஜெயங்கொண்டம் போலீஸ் துணை சூப்பிரண்டு (பொறுப்பு) ராஜன் தலைமையில் போலீஸ் இன்ஸ்பெக்டர்கள் சண்முக சுந்தரம், ரவிசக்கரவர்த்தி உள்ளிட்ட போலீசார்

 மாதவன் தேவா வந்த 20-க்கும் மேற்பட்ட வாகனங்களை தடுத்து நிறுத்தி அவர்களுடன் பேச்சுவார்த்தை நடத்தி, தற்பொழுது அங்கு செல்ல வேண்டாம் எனவும் பின்னர் ஒருநாள் செல்லலாம் என பேச்சு வார்த்தை நடத்தி மாதவன்தேவா மற்றும் மாதவன் தேவாவின் ஆதரவாளர்களை அங்கு செல்ல விடாமல் தடுத்து திருப்பி அனுப்பினர்.

இதனால் மாதவன்தேவா ஆதரவாளர்களுக்கும், போலீசாருக்கும் சுமார் அரை மணி நேரத்திற்கு மேலாக வாக்குவாதம் ஏற்பட்டதால் அங்கு பெரும் பரபரப்பு ஏற்பட்டது.இதனால் அப்பகுதியில் பதட்டமான சூழல் நிலவியது.

அரியலூர்:

பல்வேறு கோரிக்கைகளை வலியுறுத்தி அரியலூர் மாவட்ட முதன்மைக் கல்வி அலுவலர் அலுவலகம் முன்பு தமிழ்நாடு மேல்நிலைப்பள்ளி தலைமையாசிரியர்கள் கழகத்தினர் ஆர்ப்பாட்டத்தில் ஈடுபட்டனர்.

ஆர்ப்பாட்டத்தில், ஆசிரியர் தேர்வு வாரியத்தின் மூலம் நடத்தப்படும் தேர்வு பணியில் ஈடுபடும் ஆசிரியர்களுக்கு முறையான பணி நியமன ஆணை வழங்க வேண்டும். டி.ஆர்.பி, பாலிடெக்னிக் தேர்வுகளுக்கு பணியாற்றிய மேல்நிலை தலைமை ஆசிரியர்களுக்கும், கணினி ஆசிரியர்களுக்கும் வழங்க வேண்டிய பஞ்சப்படி மற்றும் பயணப்படியை உடனடியாக வழங்க வேண்டும்.

12 மணி நேரத்துக்கு மேல் தேர்வு பணியில் ஈடுபடும் ஆசிரியர்களுக்கு உழைப்பூதியத்தை உயர்த்தி வழங்க வேண்டும். தேர்வு பணிக்கு நியமனம் செய்யப்படும் ஆசிரியர், ஆசிரியைகளுக்கு தேவையான உணவு, தங்குமிடம் வசதிகளை ஏற்படுத்தித் தரவேண்டும் என்பன உள்ளிட்ட கோரிக்கைகள் வலியுறுத்தப்பட்டது.

ஆர்ப்பாட்டத்தில், தமிழ்நாடு மேல்நிலைப்பள்ளி தலைமை ஆசிரியர்கள் கழகம், தமிழ்நாடு உயர்நிலை, மேல்நிலைப் பள்ளி கணினி ஆசிரியர்கள் சங்கம், தமிழ்நாடு இடைநிலை ஆசிரியர் சங்கங்களின் கூட்டு நடவடிக்கைக் குழுவினர் கலந்து கொண்டு முழக்கமிட்டனர்.

ஆர்ப்பாட்டத்துக்கு, தமிழ்நாடு மேல்நிலைப் பள்ளி தலைமையாசிரியர்கள் கழகத்தின் மாவட்டத் தலைவர் மு.முருகன் தலைமை வகித்தார். மாவட்ட பொருளாளர் மு.ஜெயராமன், அரியலூர் அரசு மேல்நிலைப் பள்ளி தலைமை ஆசிரியர் மு.சாமிதுரை ஆகியோர் கண்டன உரையாற்றினர்.