வாணியம்பாடி:
திருப்பத்தூர் மாவட்டம், நாட்டறம்பள்ளி பூபதி தெருவை சேர்ந்த ஜெயராமனின் மனைவி அம்சா (55). அவர் நேற்று பிற்பகல் 2 மணிக்கு பச்சூர் அருகே உள்ள விவசாய நிலத்துக்குக்கு சென்று கொண்டிருந்தார்.
சொரக்காயல்நத்தம் சாலையில் நடந்து சென்றபோது பைக்கில் வந்த இரு நபர்களில் ஒருவர் பின் தொடர்ந்து வந்து அம்சாவிடம் வழி கேட்டார். திடீரென அம்சா கழுத்தில் அணிந்திருந்த தாலிச் செயின், கால் காசு உள்ளிட்ட 6 பவுன் தங்க நகைகளைப் பறித்துக் கொண்டு மற்றொரு நபருடன் பைக்கில் தப்பிச் சென்றார்.
இது தொடர்பாக அம்சா, நாட்டறம்பள்ளி போலீஸ் நிலையத்தில் புகார் அளித்தார்.
நாட்டறம்பள்ளியை அடுத்த மல்லப்பள்ளி ஊராட்சி சுண்ணாம்புக் குட்டை பகுதியை சேர்ந்த நாகராஜின் மனைவி ராஜேஸ்வரி (48). நாட்டறம் பள்ளிபுதுப்பேட்டை சாலையில் கொட்டாவூர் பஸ் நிறுத்தத்தில் நேற்று பிற்பகல் நின்று கொண்டிருந்தார். அப்போது பைக்கில் வந்த 2 மர்ம நபர்கள் ராஜேஸ்வரி கழுத்தில் அணிந்திருந்த 4 பவுன் தங்க நகையை பறித்துக் கொண்டு தப்பிச் சென்றனர்.
இது தொடர்பாக ராஜேஸ்வரி, நாட்டறம்பள்ளி போலீஸ் நிலையத்தில் புகார் அளித்தார். இந்த இரு புகார்கள் தொடர்பாக வழக்குப் பதிவு செய்த போலீசார், நகைப்பறிப்பில் ஈடுபட்ட மர்ம நபர்களைத் தேடி வருகின்றனர்.
