தமிழ்நாடு செய்திகள்
திருப்பூரில் ஆகஸ்ட் 11-ல் பா.ஜ.க மாவட்ட தலைவர்கள் கூட்டம்
- 66 மாவட்ட தலைவர்கள் மற்றும் மண்டல தலைவர்களுக்கு அழைப்பு அனுப்பப்பட்டுள்ளது.
- தமிழக பொறுப்பாளர்கள் அரவிந்த் மேனன், சுதாகர் ரெட்டி ஆகியோரும் கலந்து கொள்கிறார்கள்.
தமிழக பா.ஜ.க. தலைவர் அண்ணாமலை அடுத்த மாதம் (ஆகஸ்டு) 28-ந் தேதி வெளிநாடு செல்கிறார். அதற்கு முன்னதாக நிர்வாகிகளை சந்திக்க முடிவு செய்துள்ளார். இதனையடுத்து, ஆகஸ்ட் 11-ந் தேதி திருப்பூரில் பா.ஜ.க மாவட்ட தலைவர்கள் கூட்டத்தை நடத்த திட்டமிடப்பட்டுள்ளது.
மாநில தலைவர் அண்ணாமலை தலைமையில் நடக்க இருக்கும் இந்த கூட்டத்தில் தமிழக பொறுப்பாளர்கள் அரவிந்த் மேனன், சுதாகர் ரெட்டி ஆகியோரும் கலந்து கொள்கிறார்கள். கூட்டத்தில் பங்கேற்கும்படி 66 மாவட்ட தலைவர்கள் மற்றும் மண்டல தலைவர்களுக்கு அழைப்பு அனுப்பப்பட்டுள்ளது.
இந்த கூட்டத்தில் கட்சி சார்பிலான சுதந்திர தினக் கொண்டாட்டம், கட்சி வளர்ச்சி, மத்திய பட்ஜெட் பற்றி மக்கள் மத்தியில் உண்மை நிலையை விளக்குவது உள்ளிட்டவை பற்றி ஆலோசிக்கப்பட உள்ளதாகக் கூறப்படுகிறது.