பெண் குழந்தையின் பெயர் ஈடன் ரோஸ் - பிராத்வெயிட் சொல்லும் காரணம் என்ன?

வெஸ்ட் இண்டீஸ் அணியின் ஆல்ரவுண்டர் கார்லோஸ் பிராத்வைட். இவரது மனைவி ஜெசிகா பெலிக்ஸ். இந்த தம்பதிக்கு நேற்று பெண் குழந்தை பிறந்தது. இந்தக் குழந்தைக்கு ஈடன் ரோஸ் என்று பெயரிட்டுள்ளனர். தனது குழந்தைக்கு இந்திய மைதானத்தின் பெய்ரை வைத்ததற்கான காரணம் பின்வருமாறு:

2016-ம் ஆண்டு டி20 உலகக் கோப்பை தொடர் இந்தியாவில் நடந்தது. இதன் இறுதிப்போட்டியில் இங்கிலாந்து, வெஸ்ட் இண்டீஸ் அணிகள் மோதின.

கொல்கத்தாவின் ஈடன்கார்டன் மைதானத்தில் நடந்த இப்போட்டியில் முதலில் பேட் செய்த இங்கிலாந்து 20 ஓவரில் 9 விக்கெட்டுக்கு 155 ரன்களை எடுத்தது.

அடுத்து ஆடிய வெஸ்ட் இண்டீஸ் அணியில் சாமுவேல்ஸ் மட்டும் தாக்குப்பிடித்து 85 ரன்கள் எடுத்தார். மற்ற வீரர்கள் நிலைத்து நிற்கவில்லை.

கடைசி ஓவரில் வெஸ்ட் இண்டீஸ் வெற்றி பெற 19 ரன்கள் தேவைப்பட்ட நிலையில், முதல் 4 பந்துகளை 4 சிக்சராக விளாசி அணியை வெற்றி பெற வைத்தார் பிராத்வெயிட். இதன்மூலம் டி20 உலக கோப்பையை இரண்டாவது முறையாக வென்றது வெஸ்ட் இண்டீஸ்.

அதன்பின், பிராத்வெயிட் பெயர் உச்சரிக்கப்பட்டாலே அந்த 4 சிக்சர்தான் ரசிகர்கள் நினைவுக்கு வரும்.

அந்த சரித்திர வெற்றியை நினைவுகூரும் விதமாகவே தனது மகளுக்கு ஈடன் ரோஸ் என பெயர் வைத்துள்ளார் பிராத்வெயிட்.