செய்திகள்
டி20 உலகக் கோப்பை- வெஸ்ட் இண்டீசை 6 விக்கெட் வித்தியாசத்தில் வென்றது இங்கிலாந்து
56 ரன்கள் எடுத்தால் வெற்றி என்ற எளிய இலக்குடன் களமிறங்கிய இங்கிலாந்து அணி 70 பந்துகள் மீதமிருந்த நிலையில், வெற்றியை ருசித்தது.
துபாய்:
டி20 உலகக் கோப்பை கிரிக்கெட் தொடரில் இன்று துபாயில் நடைபெற்ற சூப்பர்-12 லீக் ஆட்டத்தில் வெஸ்ட் இண்டீஸ், இங்கிலாந்து அணிகள் விளையாடின. முதலில் பேட்டிங் செய்த வெஸ்ட் இண்டீஸ் அணி வீரர்கள், இங்கிலாந்து பந்துவீச்சை சமாளிக்க முடியாமல் அடுத்தடுத்து விக்கெட்டை இழந்தனர். கிறிஸ் கெயில் (13) தவிர மற்ற அனைவரும் ஒற்றை இலக்க ரன்களில் ஆட்டமிழந்தனர். 14.2 ஓவர்கள் மட்டுமே தாக்குப்பிடித்த அந்த அணி 55 ரன்களில் ஆல் அவுட் ஆனது.
இங்கிலாந்து தரப்பில் அடில் ரஷித் 2.2 ஓவர்கள் வீசி, 2 ரன்கள் மட்டுமே கொடுத்து 4 விக்கெட்டுகளை கைப்பற்றி அசத்தினார்.
இதையடுத்து, 56 ரன்கள் எடுத்தால் வெற்றி என்ற எளிய இலக்குடன் களமிறங்கிய இங்கிலாந்து அணி 70 பந்துகள் மீதமிருந்த நிலையில், வெற்றியை ருசித்தது.
துவக்க வீரர் ஜேசன் ராய் 11 ரன்களில் ஆட்டமிழந்தார். பேர்ஸ்டோ 9 ரன், மொயீன் அலி 3 ரன், லிவிங்ஸ்டன் 1 ரன் எடுத்தனர். மறுமுனையில் கவனமாக விளையாடிய ஜாஸ் பட்லர் ஆட்டமிழக்காமல் 24 ரன்களும், கேப்டன் மார்கன் ஆட்டமிழக்காமல் 7 ரன்களும் எடுத்தனர். இதனால் இங்கிலாந்து அணி 6 விக்கெட் வித்தியாசத்தில் வெற்றி பெற்றது.