உள்ளூர் செய்திகள்

குடியிருப்பு பகுதியில் சுற்றி திரிந்த சிறுத்தை

Update: 2022-09-29 10:38 GMT
  • நடமாட்டத்தை கண்காணிக்க 4 இடங்களில் காமிராக்கள்.
  • அடா்ந்த வனப் பகுதிக்குள் வனத்துறையினா் விடுவித்தனா்.

ஊட்டி,

நீலகிரி மாவட்டம் ஊட்டி அருகே உள்ள அரக்காடு பகுதியில் உள்ள தேயிலைத் தோட்டத்தில் விளையாடிக் கொண்டிருந்த நான்கு வயது சிறுமியை கடந்த மாதம் சிறுத்தை தாக்கிக் கொன்றது. அந்த இடத்தில் வைக்கப்பட்டிருந்த தானியங்கி கண்காணிப்பு கேமராக்களில் 2 சிறுத்தைகளின் நடமாட்டம் பதிவாகியிருந்தது.

இதனையடுத்து, அப்பகுதியில் வனத்துறையினா் சாா்பில் 2 கூண்டுகள் வைக்கப்பட்ட நிலையில், ஒரு சிறுத்தை மட்டும் சிக்கியது. அதனை முதுமலை புலிகள் காப்பகத்துக்கு கொண்டு சென்று அடா்ந்த வனப் பகுதிக்குள் வனத்துறையினா் விடுவித்தனா்.

மற்றொரு சிறுத்தை கிராம பகுதிக்குள் சுற்றி வந்து விளைநிலங்கள் மற்றும் தேயிலைத் தோட்டங்களில் மேய்ச்சலில் ஈடுபடும் கால்நடைகளை வேட்டையாடி வந்தது. இதனால் மக்கள் அச்சத்துடனேயே வசித்து வந்தனர். மேலும் அந்த சிறுத்தையும் கூண்டு வைத்து பிடிக்க வேண்டும் என கோரிக்கை விடுத்து வந்தனர்.

இந்த நிலையில் நேற்று நள்ளிரவில் அந்த சிறுத்தை மீண்டும் குடியிருப்பு பகுதிகளுக்குள் வந்துள்ளது. வெகுநேரமாக அங்கேயே சுற்றி திரிந்த சிறுத்தை பின்னர் வனத்திற்குள் சென்றுள்ளது.

இந்த காட்சிகள் அப்பகுயில் உள்ள குடியிருப்பில் பொருத்தப்ப–ட்டிருந்த சி.சி.டி.வி காமிராவில் பதிவாகியுள்ளது. இதனால் அப்பகுதி மக்கள் அச்சமடைந்துள்ளனா்.

எனவே குடியிருப்பு பகுதிகளில் நடமாடி வரும் சிறுத்தையை கண்காணித்து, கூண்டு வைத்துப் பிடிக்க வேண்டும் என அப்பகுதி மக்கள் வனத் துறையினருக்கு கோரிக்கை விடுத்துள்ளனா்.

இதனைத் தொடா்ந்து, சிறுத்தையின் நடமாட்டத்தை கண்காணிக்க அப்பகுதியில் உள்ள குடியிருப்பு பகுதியில் 4-க்கும் மேற்பட்ட தானியங்கி கண்காணிப்பு கேமராக்களை பொருத்தி கண்காணிப்புப் பணியில் வனத் துறையினா் ஈடுபட்டுள்ளனா்.

Tags:    

Similar News