பாரூர் அருகே தாய்-தந்தை சமாதியில் மகன் வி‌ஷம் குடித்து தற்கொலை

மத்தூர்:

கிருஷ்ணகிரி மாவட்டம் போச்சம்பள்ளி அருகே உள்ள கீழ்குப்பம் பகுதியை சேர்ந்தவர் முருகேசன் (வயது 58), இவரது மனைவி சாந்தாமணி (45). இவர்களுக்கு ரவீந்திரன் (28) , சுரேந்திரன் (25) ஆகிய 2 மகன்கள் உள்ளனர்.

இதில் இளைய மகன் சுரேந்திரன் காதலித்து திருமணம் செய்து கொண்டு குடும்பம் நடத்தி வருகிறார். மூத்த மகன் ரவீந்திரனுக்கு திருமணம் செய்து வைக்க பெற்றோர்கள் பல்வேறு இடங்களில் பெண் தேடி வந்துள்ளனர். ஆனால் ரவீந்திரனுக்கு யாரும் பெண் கொடுக்க முன்வரவில்லை என்று கூறப்படுகிறது.

இதனால் தனது பெற்றோரிடம் , ரவீந்திரன் தகராறு செய்து வந்தார். இதனால் மகன் இப்படி தகராறு செய்து பிரச்சினை ஏற்பட்டு வந்ததால் முருகேசனும், சாந்தாமணியும் மனமுடைந்த நிலையில் இருந்து வந்தனர். இதனால் கடந்த 22-ந் தேதி முருகேசனும், சாந்தாமணியும் கீழ்குப்பம் சுடுகாட்டில் வி‌ஷம் குடித்து தற்கொலை செய்து கொண்டனர்.

இந்த நிலையில் தன்னால் தான் தாயும், தந்தையும் தற்கொலை செய்து கொண்டனர் என்று ரவீந்திரன் மனவேதனையில் இருந்து வந்தார். இதனால் கடந்த ஒரு வாரமாக மிகுந்த சோகத்துடன் யாரிடமும் பேசாமல் இருந்து வந்துள்ளார். இனி உயிர் வாழ்வதே விட சாவதே மேல் என்று அவர் முடிவு செய்தார்.

அதன்படி நேற்று இரவு ரவீந்திரன், கீழ்குப்பம் சுடுகாட்டுக்கு சென்றார். அங்கு அவரது தாய்- தந்தை உடல்கள் எரிக்கப்பட்ட இடத்தில் வைத்து ரவீந்திரன் வி‌ஷம் குடித்தார். சிறிதுநேரத்தில் மயங்கி அங்கேயே ரவீந்திரன் பரிதாபமாக இறந்தார்.

இன்று காலையில் சுடுகாடு பாதை வழியாக சென்ற கிராம மக்கள், ரவீந்திரன் வி‌ஷம் குடித்து தற்கொலை செய்து கொண்டதை பார்த்து அதிர்ச்சி அடைந்தனர்.

உடனே இதுகுறித்து பாரூர் போலீசாருக்கு தகவல்கொடுத்தனர். அதன்பேரில் போலீசார் விரைந்து வந்து ரவீந்திரன் உடலை கைப்பற்றி போச்சம்பள்ளி அரசு ஆஸ்பத்திரிக்கு அனுப்பி வைத்தனர். தொடர்ந்து வழக்குப்பதிவு செய்து போலீசார் விசாரித்து வருகிறார்கள்.