இரணியல்:
குளச்சலை சேர்ந்த ஒரு பெண் கர்ப்பமான நிலையில் நெய்யூரில் உள்ள ஒரு தனியார் மருத்துவமனையில் வெளி நோயாளியாக சிகிச்சை பெற்று வந்தார். குழந்தை பரிசோதனை உட்பட அனைத்து சிகிச்சைகளையும் அந்த மருத்துவமனையில் மேற்கொண்டு வந்ததாக கூறப்படுகிறது.
இந்த நிலையில் கர்ப்பிணியான இளம்பெண் நேற்று இரவு பிரசவத்திற்காக அந்த மருத்துவமனையில் அனுமதிக்கப்பட்டார். மருத்துவமனையில் அனுமதிக்கப்பட்ட ஒரு மணி நேரத்தில் குழந்தை இறந்த நிலையில் பிறந்ததாக தெரிகிறது.
இதற்கிடையே குழந்தையின் பெற்றோர் மருத்துவமனை நிர்வாகம் குழந்தையை இறந்த நிலையில் கழிவறையில் வைத்திருந்ததாகவும், தவறான சிகிச்சையால் குழந்தை இறந்ததாகவும் கூறி வாக்குவாதத்தில் ஈடுபட்டனர். இளம்பெண்ணின் உறவினர்கள் மருத்துவமனை வளாகத்தில் குவிந்ததால் பரபரப்பு ஏற்பட்டது.
இதுகுறித்த தகவல் இரணியல் போலீஸ் நிலையத்திற்கும் தெரிவிக்கப்பட்டது. இரணியல் போலீசார் சம்பவ இடம் சென்று விசாரணை மேற்கொண்டனர். இதற்கிடையில் குழந்தையின் பெற்றோருக்கும் மருத்துவமனை நிர்வாகத்திற்கும் சமரசம் ஏற்பட்ட நிலையில் குழந்தையின் உடலை பெற்றோர் பெற்றுக்கொண்டதாக தெரிகிறது.
தற்போது மருத்துவமனை நிர்வாகம் இறந்த நிலையில் பச்சிளம் குழந்தையை பொதிந்து கழிவறையில் கிடத்தி இருப்பதாக இருக்கும் வீடியோ காட்சிகள் சமூக வலைதளங்களில் பரவி வருகிறது. தனியார் மருத்துவமனையில் குழந்தை சிகிச்சை பலனின்றி இறந்ததாக வெளியான தகவல் அப்பகுதியில் பரபரப்பை ஏற்படுத்தி உள்ளது.
