நீங்கள் தேடியது "மாம்பழ ஸ்மூத்தி"

பழங்கள், காய்கறிகளை கொண்டு பானங்கள் தயாரித்து பருகாமல் அதன் தன்மையிலேயே ருசிப்பதுதான் ஆரோக்கியத்திற்கு நல்லது. ஏனெனில் அவற்றில் அதிக நார்ச்சத்து கலந்திருக்கும். ஊட்டச்சத்துக்களும் மிகுந்திருக்கும். பானங்களாக மாற்றும்போது அவை குறையக்கூடும். இருப்பினும் பழங்கள், காய்கறிகளை ஜூஸாகவும், ஸ்மூத்தியாகவும் தயாரித்து ருசிக்கவே நிறைய பேர் விரும்புகிறார்கள். இதில் எதனை பருகுவது ஆரோக்கியமானது என்ற கேள்வியும் எழாமல் இல்லை. எதில் ஊட்டச்சத்து அதிகம்? எதனை பருகுவது சிறந்தது என்பதை விரிவாக பார்ப்போம்.

ஊட்டச்சத்து அடர்த்தி

பழ ஜூஸில் வைட்டமின்கள், தாதுக்கள், கரோட்டினாய்டுகள் மற்றும் ஆன்டி ஆக்சிடென்டுகள் தனியாக பிரித்தெடுக்கப்படுகின்றன. பீட்டா கரோட்டின் போன்ற சில சேர்மங்கள் சாறு வடிவத்தில் மிகவும் திறமையாக உறிஞ்சப்படலாம். ஸ்மூத்திகளை பொறுத்தவரை ஆன்டி ஆக்சிடென்டுகள் நார்ச்சத்துடன் பிணைக்கப்பட்டு ஊட்டச்சத்துக்கள் பரவலாக உடலுக்கு கிடைக்க வழிவகை செய்கின்றன. ஸ்மூத்திகள் அப்படியே தயாரிக்கப்படுவதால் ஊட்டச்சத்துக்கள் இழக்கப்படுவது மிகக் குறைவு. அதனால் ஊட்டச்சத்து தேவைப்படுபவர்கள் ஸ்மூத்தி பருகுவது சிறப்பானது.

ஆற்றல் இழப்பு

ஜூஸ் பருகுவது இன்சுலின் மற்றும் குளுக்கோஸை விரைவாக ரத்தத்தில் அதிகரிக்கக்கூடும். அதிலும் சர்க்கரை அதிகம் கலந்த ஜூஸ் வகைகளை பருகுவது பசி, நீரிழிவு, உடல் ஆற்றல் செயலிழப்பு உள்ளிட்ட அபாயங்களுடன் தொடர்புடையது. நார்ச்சத்து, புரதம் மற்றும் கொழுப்பு உள்ளிட்டவை சம நிலையில் கலந்த ஸ்மூத்திகளை பருகுவது உடல் ஆற்றலையும், அறிவாற்றலையும், வளர்சிதை மாற்றத்தையும் மேம்படுத்தக்கூடும்.

சர்க்கரை வெளிப்பாடு

ஜூஸ்களில் நார்ச்சத்து இல்லாத சூழலில் பழங்களில் இருக்கும் சர்க்கரை ரத்த ஓட்டத்தில் விரைவாக கலந்து ரத்தத்தில் சர்க்கரையின் அளவை அதிகரிக்கச் செய்துவிடும். பழ ஜூஸ்கள் பொதுவாக 65 முதல் 85-க்கு இடைப்பட்ட அளவில் கிளைசெமிக் குறியீட்டை கொண்டிருக்கும். சர்க்கரையை விரைவாக கலக்கச் செய்வதுதான் அதற்கு காரணம். ஆனால் ஸ்மூத்திகளில் இயற்கையான சர்க்கரையே அதிகம் கலந்திருக்கும். நார்ச்சத்தும் குறைவில்லாமல் இருப்பதால் சர்க்கரையை மெதுவாகவே வெளியிடும். மேலும் புரதம், ஆரோக்கியமான கொழுப்பும் கொண்டிருக்கும். ஐரோப்பிய மருத்துவ ஊட்டச்சத்து இதழில் நடத்தப்பட்ட ஆய்வில் பழங்களை விட ஸ்மூத்திகள் 57 சதவீதம் வரை ரத்தத்தில் சர்க்கரை அளவு கட்டுப்பாட்டை மேம்படுத்துவதாகவும், செரிமானத்தை பொறுத்தவரை ஜூஸை விட பயனுள்ளதாக இருப்பதாகவும் கண்டறியப்பட்டுள்ளது.

எது சிறந்தது?

காலை உணவு, சிற்றுண்டி அல்லது உணவுக்கு மாற்றாக நார்ச்சத்து நிறைந்த, சமச்சீரான ஊட்டச்சத்துகள் மிகுந்த பானத்தை பருக நினைத்தால் ஸ்மூத்தி சிறந்த தேர்வாக அமையும்.

உடலுக்கு விரைவான ஊட்டச்சத்து, ஆன்டிஆக்சிடென்டுகள் தேவைப்படும்போது ஜூஸ் பருகலாம். எனினும் அன்றாட ஆரோக்கியத்திற்கு அதிக ஆரோக்கிய நன்மைகளை ஸ்மூத்திகளே வழங்குகின்றன.

திருப்தி

நீண்ட நேரம் சாப்பிட்ட திருப்தி நிலைத்திருக்கவும், விரைவாக பசி எட்டிப்பார்ப்பதை தவிர்க்கவும் விரும்புபவர்கள் ஸ்மூத்தி பருகுவதே நல்லது. ஏனெனில் ஸ்மூத்தி, ஜூஸை விட அடர்த்தியாக இருக்கும். அதில் சத்துக்களும் நிறைவாக இருக்கும். ஜூஸ்களில் கலோரிகள் குறைவாக இருந்தாலும் நார்ச்சத்து திருப்தியாக இருப்பதில்லை. ஸ்மூத்தியுடன் ஒப்பிடும்போது விரைவாகவே பசி உணர்வை தூண்டிவிடும்.

பல் ஆரோக்கியம்

ஸ்மூத்திகள் உமிழ்நீர் உற்பத்தியைத் தூண்டும். பற்களை சுத்தப்படுத்தவும், பாதுகாக்கவும் உதவும். பழ ஜூஸ்கள் அமிலத்தன்மை கொண்டவை, சர்க்கரை நிறைந்தவை. அவை பற்களில் அரிப்பு, பல்சிதைவு உள்ளிட்ட பிரச்சினைகளை உருவாக்கக்கூடும்.

நார்ச்சத்து

பழங்கள், காய்கறிகளை கொண்டு ஜூஸ் தயாரிக்க சாறு பிழிந்து வடிக்கட்டப்படும். ஆனால் பழங்கள், காய்கறிகளை அப்படியே போட்டு ஸ்மூத்தி தயாரிக்கப்படும். அதனுடன் கெட்டியான பால், ஐஸ்கிரீம் உள்ளிட்ட ஊட்டச்சத்துமிக்க பொருட்கள் சேர்க்கப்படும். முக்கியமாக கரையாத மற்றும் கரையக்கூடிய நார்ச்சத்துக்கள் தக்கவைக்கப்படும். ரத்தத்தில் சர்க்கரை அளவை ஒழுங்குபடுத்தவும், குடல் ஆரோக்கியத்தை பாதுகாக்கவும், செரிமானத்தை மேம்படுத்தவும் உதவிடும். ஜூஸை பொறுத்தவரை பழங்கள், காய்கறிகளில் இருக்கும் திரவம் மட்டுமே பிரித்தெடுக்கப்படும். அவற்றின் தசைப்பகுதிகள் வடிகட்டப்பட்டு அப்புறப்படுத்தப்படும். அதனால் நார்ச்சத்துக்கள் காணாமல் போய்விடக்கூடும்.

நார்ச்சத்து ஏன் முக்கியமானது:

நார்ச்சத்து செரிமானத்தை மெதுவாக்கி வயிறு நிறைந்த உணர்வை ஏற்படுத்தும். ஊட்டச்சத்து உறிஞ்சுதலுக்கும் உதவும். ஆரோக்கியமான நுண்ணுயிர்களை வளர்க்கும். உமிழ்நீர் உற்பத்தியை தூண்டி பற்களின் ஆரோக்கியத்தையும் பாதுகாக்கும்.

தேவையான பொருட்கள்:

மாம்பழம் - 1

பால் - 1/4 கப் (பாலுக்கு மாற்றாக தேங்காய் பால் (அ) ஊற வைத்து அரைத்த பாதாம் விழுது பயன்படுத்தலாம்)

தயிர் - 4 ஸ்பூன்

சர்க்கரை - 3 ஸ்பூன்

தேன் - 2 ஸ்பூன்

ஏலக்காய் - சிறிதளவு

பாதாம், முந்திரி துருவியது

செய்முறை:

மிக்சியில் மாம்பழத்தை துண்டுகளாக்கி சேர்க்கவும். அதனுடன் பால் அல்லது தேங்காய் பால் சேர்க்கவும்.

பின்னர் சர்க்கரை, தயிர், தேன் சேர்த்து கலக்கவும். அதனுடன் ஏலக்காயை தூளாக்கி போடவும். அனைத்தையும் ஒன்றன்பின் ஒன்றாக சேர்த்து அரைக்கவும்.

அரைத்ததை டம்ளரில் ஊற்றி ஃபிரிட்ஜில் 1 மணி நேரம் வைத்து குளிரூட்டவும். சாப்பிடுவதற்கு முன் பாதாம், முந்திரியை தூவி அலங்கரிக்கவும். கோடையில் குழந்தைகள் விரும்பும் சுவையான மாம்பழ ஸ்மூத்தி ரெடி. 

வெயில் காலம் வந்தாலே உடல் சூட்டைக் குறைக்கவும், உடலை சோர்வடையாமல் வைத்திருக்க வேண்டும் என்பதற்காக இளநீர், மோர், பதநீர், நீர் ஆகாரம் போன்றவற்றைத் தான் அதிகளவில் சாப்பிட வேண்டும் என்று நினைப்போம். இத்தகைய உணவுகள் உடலுக்குத் தேவையான ஆற்றலை அளிப்பதோடு தற்போது சுட்டெரிக்கும் வெயிலில் இருந்து நம்மைப் பாதுகாக்க உதவியாக இருக்கும்.

அதுவும் இந்த மாம்பழ சீசனில் மாம்பழ லஸ்ஸி டிரை பண்ணலனா எப்படி. வாங்க மாம்பழ லஸ்ஸி எப்படி செய்வது என்று பார்க்கலாம்.

தேவையான பொருட்கள்

மாம்பழம் - 1 கப் (நறுக்கியது)

சர்க்கரை - 1/2 கப்

தயிர் - 1/2 கப்

ஏலக்காய் - 2

ஐஸ் கியூப் - 8-9

புதினா இலைகள் - 4-5 (அழகுபடுத்த)

பாதாம் - அழகுபடுத்துவதற்கு

முந்திரி - அழகுபடுத்துவதற்கு

பிஸ்தா - அழகுபடுத்த

செய்முறை:

மாம்பழத்தை தயாரிக்க, 1 முதல் 2 பழுத்த மாம்பழங்களை சிறிய துண்டுகளாக வெட்டிக்கொள்ள வேண்டும். அதன்பிறகு 1/2 கப் தயிர், மாம்பழ துண்டுகள், 1/2 கப் சர்க்கரை மற்றும் 8 அல்லது 9 ஐஸ் கியூப்ஸ், 2 ஏலக்காய் ஆகியவற்றை ஒரு மிக்சி ஜாரில் சேர்த்து நன்றாக பேஸ்ட் மாதிரி அரைத்து எடுத்துக்கொள்ள வேண்டும்.

பின்னர் இதனை ஒரு பவுளில் போட்டு ஃப்ரிட்ஜில் ஒரு மணிநேரம் வைத்து எடுத்து புதினா இலைகள், பாதாம், பிஸ்தா அல்லது முந்திரி ஆகியவற்றைச் சேர்த்து அலங்கரித்து பரிமாறலாம்.