நீங்கள் தேடியது "poor Brides"

புதுச்சேரி:

புதுவை வேளாண்துறை அமைச்சர் தேனீ.ஜெயக்குமார் வெளியிட்டுள்ள செய்திக் குறிப்பில் கூறியிருப்பதாவது:-

மகளிர் மற்றும் குழந்தைகள் மேம்பாட்டுத் துறையின் மூலம் வறுமைக்கோட்டுக்கு கீழ் வாழும் குடும்பத்தில் உள்ள மணப்பெண்ணின் திருமண உதவித்தொகையாக ரூ.25 ஆயிரம் வீதம் 407 பயனாளிகளுக்கு ரூ.ஒரு கோடியே ஒரு லட்சத்து 75 ஆயிரம் வழங்கப் பட்டுள்ளது. ஆதரவற்ற விதவைப் பெண் மகள் திருமண உதவித் தொகையாக 188 பேருக்கு ரூ.51 லட்சத்து 75 ஆயிரம் வழங்கப்பட்டுள்ளது.

ஒரு பெண், 2 பெண் குழந்தை உதவித் தொகையாக 150 பேருக்கு ரூ.45 லட்சம் வைப்புத்தொகை வழங்கப்பட்டுள்ளது. ஏழை பெற்றோரின் குடும்பத்தில் 8 முதல் 10-ம் வகுப்பு வரை படிக்கும் ஒரே பெண் குழந்தைக்கு உதவித் தொகையாக 5 பயனாளிகளுக்கு தலா ரூ.25 ஆயிரம் வழங்கப் பட்டுள்ளது.

இவ்வாறு அமைச்சர் தேனீ.ஜெயக்குமார் செய்திக் குறிப்பில் தெரிவித்துள்ளார்.

சங்கரன்கோவில்:

முதல்-அமைச்சரால் அறிவிக்கப்பட்ட திட்டமான கோவில்களில் நடத்தப்படும் திருமணங்களுக்கு ரூ.50 ஆயிரம் மதிப்பிலான சீர் வரிசைகள் வழங்கும் திட்டத்தின் கீழ் திருமணம் நடத்தி வைக்கும் நிகழ்ச்சி சங்கரன்கோவில் சங்கரநாராயண சுவாமி கோவிலில் நடந்தது. கோவில் துணை ஆணையர் ரத்தினவேல் பாண்டியன் தலைமை தாங்கினார்.

சங்கரன்கோவில் யூனியன் சேர்மன் லாலா சங்கர பாண்டியன், சங்கரன்கோவில் நகராட்சி சேர்மன் உமாமகேஸ்வரி, மேலநீலிதநல்லூர் கிழக்கு ஒன்றிய செயலாளர் பெரியதுரை, நகர செயலாளர் பிரகாஷ் முன்னிலை வகித்தனர். இதில் திருவேங்கடத்தைச் சேர்ந்த சின்னராஜா மற்றும் நெல்லையைச் சேர்ந்த ஐஸ்வர்யா என்ற மணமக்களுக்கு வடக்கு மாவட்ட தி.மு.க. செயலாளர் ராஜா எம்எல்ஏ மாங்கல்யம் எடுத்து கொடுத்து திருமணத்தை நடத்தி வைத்து வாழ்த்தினார்.

தொடர்ந்து மணமக்களுக்கு ரூ. 20,000 மதிப்புள்ள திருமாங்கல்யம், ரூ. 3000 மதிப்பில் மணமக்களுக்கு புத்தாடைகள், திருமணத்திற்கு வந்த மணமக்கள் உறவினர்கள் 20 பேருக்கு ரூ.2000 மதிப்பில் உணவு, மற்றும் ரூ. 1000 மதிப்பில் மாலைகள், ரூ.7,800 மதிப்பில் பீரோ, ரூ.7,500 மதிப்பில் கட்டில், ரூ. 2200 மதிப்பில் மெத்தை, ரூ.190 மதிப்பில் இரண்டு தலையணைகள், ரூ. 180 மதிப்பில் பாய், ரூ. 1000 மதிப்பில் 2 கைக்கடிகாரங்கள், ரூ. 1490 மதிப்பில் மிக்ஸி, ரூ. 3640 மதிப்பில் பூஜை பொருட்கள் மற்றும் பாத்திரங்கள் உள்ளிட்ட சீர்வரிசை பொருட்களை வடக்கு மாவட்ட செயலாளர் ராஜா எம்.எல்.ஏ. வழங்கினார். இதில் மாணவரணி வீராசாமி, வெங்கடேஷ், ஜான்சன், சிவா உள்ளிட்ட பலர் கலந்து கொண்டனர்.