புதுடெல்லி:
பிரதமர் நரேந்திர மோடி வருகிற 21-ந் தேதி ரஷியா செல்கிறார். அங்குள்ள சோச்சி நகரில் ரஷிய அதிபர் விளாடிமிர் புதினை நட்புரீதியில் மோடி சந்தித்து பேசுகிறார் என்று இந்திய வெளியுறவுத்துறை அமைச்சகம் ஒரு அறிக்கை மூலம் தெரிவித்துள்ளது.
நமது சிறப்பு வாய்ந்த மற்றும் பெருமைக்குரிய நட்பு நாடான ரஷியாவுடனான நல்லுறவை மேலும் வலுப்படுத்த இந்த சந்திப்பு உதவும். இரு தலைவர்களும் சர்வதேச பிரச்சினைகள் பற்றிய தங்களது கருத்துகளை விரிவாகவும், நீண்டகால முன்னேற்ற அடிப்படையிலும் பரிமாறிக்கொள்வார்கள். இது இரு தலைவர்களுக்கும் முக்கிய நிகழ்வாக இருக்கும் என்றும் அந்த அறிக்கையில் கூறப்பட்டுள்ளது.
அதோடு இரு தலைவர்களும் தங்கள் நாட்டு வளர்ச்சிக்கான முன்னுரிமை, இருநாடுகள் தொடர்புடைய விவகாரங்கள் குறித்தும் பேசுவார்கள். பிரதமர் மோடி, ரஷிய அதிபர் புதின் இடையிலான இந்த நட்புரீதியிலான சந்திப்பு இந்தியா-ரஷியா இடையிலான பாரம்பரிய அரசியல் உறவுகளை உயர்ந்த இடத்துக்கு கொண்டுசெல்லும் என்றும் வெளியுறவுத்துறை கூறியுள்ளது.
ரஷிய அதிபர் புதின் சமீபத்தில் தான் மீண்டும் அந்நாட்டு புதிய அதிபராக தேர்ந்தெடுக்கப்பட்டார். அதன்பின்னர் முதல் முறையாக பிரதமர் மோடி சந்திக்க உள்ளது குறிப்பிடத்தக்கது.
கடந்த மாதம் மோடி, சீனா சென்று அந்நாட்டு அதிபர் ஜின்பிங்கை நட்புரீதியில் சந்தித்து பேசினார். #Modi #Russia #VladimirPutin
