எதிர்மறையாக எண்ணும்போது ஆரோக்கியமற்ற உணவு மீதான ஆர்வம் குறைகிறது
இன்று உலகில் உணவுத் தட்டுப்பாடு பெரும்பாலும் இல்லை. ஆனால் அதிகமாக உணவு உட்கொள்ளுதலும், ஆரோக்கியமற்ற உணவுகளை உண்பதும் பெரும் பிரச்சினைகளாக உருவெடுத்திருக்கின்றன.
உலக சுகாதார நிறுவனத்தின் புள்ளிவிவரத்தின்படி, 18 வயதைத் தாண்டியவர்களில், நூறு கோடிக்கும் மேற்பட்டோர் அதிக எடையுடன் உள்ளனர். மேலும் 1975-ம் ஆண்டில்இருந்து உலகளவில் அதிக எடை பிரச்சினை மூன்று மடங்கு அதிகரித்திருக்கிறது.
இந்நிலையில், அமெரிக்காவின் யேல் பல்கலைக்கழகத்தைச் சேர்ந்த ஆராய்ச்சியாளர்கள் நாம் உண்ணும் உணவு குறித்த நமது யோசனை, நமது உணவுத் தேர்வை சரிசெய்யும், அதிக எடை பிரச்சினைக்குத் தீர்வாக இருக்கும் என்கின்றனர்.
அவர்களால் ஆய்வுக்கு உட்படுத்தப்பட்டவர்கள், தொடர்ந்து ஆறு நொடிகள் உணவை உற்றுப் பார்க்க வேண்டும் என்று கேட்டுக் கொள்ளப்பட்டனர். ஆனால் அந்தச் சமயத்தில் குறிப்பிட்ட உணவு பற்றிய எதிர்மறையான விஷயங்கள் குறித்தும் யோசிக்குமாறு கோரப்பட்டனர்.
இது, அந்த உணவு ஆரோக்கியமற்றது என்பது மட்டுமல்ல, சுவை அல்லது அதன் தோற்றம் போன்று, அந்த உணவு குறித்து அவர்கள் வெறுக்கும் விஷயம் குறித்தும் யோசிக்குமாறு கோரப்பட்டனர்.
இந்த ஆய்வுக்குப் பிறகு, அந்தக் குறிப்பிட்ட உணவை உண்பதற்கான தங்கள் ஏக்கம் 20 சதவீதம் அளவு குறைந்திருப்பதாக மக்கள் தெரிவித்தனர்.
ஆரோக்கியமற்ற உணவின் மீது நமக்குள்ள விருப்பம் குறைந்தாலே நமது உணவுப் பழக்கம் மேம்படும், அது நம் உடல் எடையைக் கட்டுப்படுத்த உதவும்.
அடுத்தகட்டமாக, எதிர்மறையான எண்ணங்கள் குறித்து யோசிக்கும் நேரத்துக்குச் சமமாக, ஆரோக்கியமான உணவின் நல்ல விஷயங்கள் குறித்தும் யோசிக்கக் கூறப்பட்டது.
இது, ஆரோக்கியமான உணவின் மீது அவர்களுக்கு உள்ள விருப்பத்தை 14 சதவீத அளவு அதிகரிக்க உதவியது.
எனவே உணவைத் தேர்வு செய்யும்போது அது குறித்துச் சிறிது நேரம் யோசிப்பது, நாம் சிறந்த உணவைத் தேர்ந்தெடுக்க உதவும்.
யேல் பல்கலைக்கழக ஆராய்ச்சியாளர்கள், ஒருவர் தனது உணவுத் தேர்வு குறித்து முன்னரே தம்மைத் தயார்படுத்திக்கொள்ள முடியுமா என்பது குறித்தும் ஆராய்ச்சி செய்தனர்.
ஆய்வுக்கு உட்படுத்தப்பட்டவர்கள், ஆரோக்கியமற்ற நொறுக்குத் தீனிகள் ஏற்படுத்தும் எதிர்மறையான விளைவுகள் குறித்துப் படிக்குமாறு கோரப்பட்டனர். பின்னர் அவர்களுக்கு 15 நிமிடங்கள் பயிற்சி வழங்கப்பட்டது. அதில், ஆரோக்கியமற்ற உணவுகள் ஏற்படுத்தும் பாதிப்புகள் குறித்து அவர்கள் யோசித்துப் பார்க்குமாறு கேட்டுக்கொள்ளப்பட்டது.
அந்தப் பயிற்சியின் ஒரு பகுதியாக ஆரோக்கியமான உணவுகளின் படங்கள் காட்டப்பட்டன. அப்போது அவர்கள் அதனால் ஏற்படும் நல்ல விளைவுகள் குறித்து யோசிக்க வேண்டும்.
அதன்பின் அவர்கள் கண் முன்னே, ஆரோக்கியமற்ற உணவுகள் மற்றும் ஆரோக்கியமான உணவுகள் இரண்டும் காண்பிக்கப்பட்டன. அப்போது 7.6 சதவீதம் பேர், ஆரோக்கியமான உணவு களைத் தேர்வு செய்தனர்.
அடுத்தகட்ட சோதனையில், ஆராய்ச்சியாளர்கள், ஆய்வுக்கு உட்படுத்தப்பட்டவர்களிடம் ஆரோக்கியமான உணவுகளின் நன்மைகளை தெரிவித்தனர். பின் அதுகுறித்து அவர்கள் நேர்மறையாக சிந்திக்கும்போது அதன் புகைப்படங்களை காண்பித்தனர். இந்த முயற்சி 5.4 சதவீதம் பேர் ஆரோக்கியமான உணவைத் தேர்ந் தெடுக்க உதவியது.
இைவ சிறு சிறு மாற்றங்களாகத் தோன்றலாம். ஆனால் இந்த ஆய்வில் பங்கேற்றவர்கள் நாள் ஒன்றுக்குச் சராசரியாக 107 கலோரிகள் குறைவாக உட்கொண்டனர்.
ஒரு மனிதர் இத்தனை கலோரிகளை குறைக்க குறைந்தது 10 நிமிடங்கள் நடைப்பயிற்சி செய்ய வேண்டும்.
அதிக உடல் எடைக்கான சிகிச்சைக்குச் சரிசமமாக இந்தச் சிறிய பயிற்சி உதவியதாக யேல் பல்கலைக்கழகத்தின் பேராசிரியர் ஹெடி கோபர் கூறுகிறார்.
நீங்கள் நாள் ஒன்றுக்கு ஓர் ஆரோக்கியமான உணவைத் தேர்ந்தெடுத்தாலும் அது காலப்போக்கில் பெரும் பயனைத் தரும் என்கிறார் கோபர்.
சிலர் வேறு சில உணவுப் பழக்கங்களில் உடல் எடையைக் குறைக்க முயற்சித்தாலும், மூன்று அல்லது ஐந்து வருடங்களுக்குப் பின் மீண்டும் பழைய உடல் எடையை அடையக்கூடும்.
ஆனால் இந்தப் புதிய வழிமுறையில் ஒவ்வொரு நாளும் மிதமாக கலோரிகளை குறைத்தாலும் காலப்போக்கில் அது நல்ல பயனை அளிக்கும் என ஆய்வாளர்கள் கூறுகிறார்கள்.
ஆரோக்கிய உணவில் ஆர்வம் காட்டுவோர், இந்த நுட்பங்களை முயன்று பார்க்கலாம்.
