அவிநாசி லிங்கேஸ்வரர் கோவில் சித்திரை தேர்த்திருவிழா கொடியேற்றத்துடன் இன்று தொடங்கியது

கொங்கேழு சிவாலயங்களில் பிரசித்தி பெற்ற திருப்பூர் மாவட்டம் அவிநாசி அவிநாசி லிங்கேஸ்வரர் கோவிலில் சித்திரை தேர் திருவிழா இன்று காலை கொடியேற்றத்துடன் தொடங்கியது.

இதையொட்டி இன்று காலை 6 மணிக்கு கொடியேற்றம் நடைபெற்றது. பின்னர் பூஜைகளுக்கு பின் பஞ்சமூர்த்திகள் திருவீதியுலா காட்சி நடைபெற்றது. இதில் திரளான பக்தர்கள் கலந்து கொண்டு தரிசனம் செய்தனர்.

விழாவையொட்டி நாளை சூரிய சந்திர மண்டல காட்சிகள், 7-ந்தேதி அதிகார நந்தி, கிளி, பூதம் மற்றும் அன்னம் வாகன காட்சிகள், 8-ந்தேதி கைலாச வாகனம், புஷ்பக விமானம் காட்சி நடக்கிறது. முக்கிய நிகழ்ச்சியான 63 நாயன்மார்களுக்கு பஞ்ச மூர்த்திகள் காட்சி அளிக்கும் வைபவம் மற்றும் புறப்பாடு 9-ந்தேதி இரவு 7 மணி முதல் தொடங்கி நடக்கிறது. 10ந்தேதி கற்பகவிருட்சம், திருக்கல்யாண உற்சவம் வெள்ளை யானை வாகன காட்சி நடக்கிறது.

11-ந் தேதி அதிகாலை பூர நட்சத்திரத்தில் பஞ்ச மூர்த்திகள் திருத்தேர்களுக்கு எழுந்தருளி பக்தர்களுக்கு அருள்பாலிக்கின்றனர். 12, 13-ந்தேதி காலை 8 மணிக்கு பெரிய தேர் தேரோட்டம், 14-ந்தேதி அம்மன், ஸ்ரீ சுப்பிரமணியர், ஸ்ரீசண்டிகேஸ்வரர், ஸ்ரீ கரிவரதராஜ பெருமாள் தேரோட்டம் நடக்கிறது. 15-ந்தேதி வண்டித்தாரை மற்றும் இரவு பரிவேட்டை நடக்கிறது.

16-ந்தேதி மாலை தெப்பத்தேர், 17-ந் தேதி ஸ்ரீநடராஜ பெருமானின் தரிசன காட்சியும் நடக்கிறது. 18-ந்தேதி மஞ்சள் நீர் விழா, இரவு மயில்வாகனம் காட்சியுடன் தேர்த்திருவிழா நிறைவு பெறுகிறது.