தரங்கம்பாடி:
நாகை மாவட்டம் செம்பனார்கோவில் அருகே நடுக்கரை ஊராட்சியில் காவிரி ஆற்றின் கரையோரம் வெவ்வேறு இடங்களில் 2 மதுக்கடைகள் உள்ளன. இந்த கடைகளை அகற்ற வேண்டும் என்று நடுக்கரை ஊராட்சியில் நடைபெற்ற கிராமசபை கூட்டத்தில் தீர்மானம் நிறைவேற்றப்பட்டது. ஆனால் இந்த கடைகள் மூடப்படாததால் மார்க்சிஸ்ட் கம்யூனிஸ்டு கட்சி சார்பில் கடந்த 22-ந் தேதி மதுக்கடைகளை முற்றுகையிட்டு போராட்டம் நடத்தப்பட்டது. இந்த போராட்டத்தில் மேலப்பாதி, செம்பனார்கோவில், பரசலூர், கருவாழக்கரை, மேலையூர், கஞ்சாநகரம் மற்றும் அதன் சுற்றுவட்டார பகுதிகளை சேர்ந்த பொதுமக்கள் கலந்து கொண்டனர். அப்போது தரங்கம்பாடி தாசில்தார் முருகேசன், போராட்டக்காரர்களிடம் பேச்சுவார்த்தை நடத்தினார். ஆனால், பேச்சுவார்த்தை தோல்வியில் முடிவடைந்தது. இந்த பிரச்சினையால் மதுக்கடைகள் தற்காலிகமாக மூடப்பட்டன.
இந்த நிலையில் கடந்த 27-ந் தேதி போலீஸ் பாதுகாப்புடன் மீண்டும் மதுக்கடைகள் திறக்கப்பட்டன. இதனால் ஆத்திரம் அடைந்த அந்த பகுதி மக்கள் நேற்று மீண்டும் மதுக்கடைகளை முற்றுகையிட்டு போராட்டத்தில் ஈடுபட்டனர். இதுகுறித்து தகவல் அறிந்த மயிலாடுதுறை உதவி கலெக்டர் சுபாநந்தினி சம்பவ இடத்திற்கு விரைந்து சென்று பொதுமக்களிடம் பேச்சுவார்த்தை நடத்தினார்.
மயிலாடுதுறை துணை போலீஸ் சூப்பிரண்டு கலிதீர்த்தான் தலைமையில் போலீசார் பாதுகாப்பு பணியில் ஈடுபட்டனர். அப்போது ஆத்திரத்தில் பொதுமக்கள் கடையை அடித்து உடைத்து சூறையாடினர். மேலும், மதுக்கடைகளை தொடர்ந்து இயக்கினால் ஜூன் 2-ந் தேதி அனைத்து கட்சியினர் மற்றும் நடுக்கரை, பரசலூர், செம்பனார்கோவில் ஆகிய ஊராட்சிகளை சேர்ந்த பொதுமக்களை ஒன்று திரட்டி உண்ணாவிரதம் மற்றும் கண்டன ஆர்ப்பாட்டம் நடத்தப்படும் என்று போராட்டக்காரர்கள் தெரிவித்தனர்.
மேலும் அசம்பாவித சம்பவம் நடைபெறாமல் இருக்க 3 டி.எஸ்.பி.க்கள், தலைமையில் 8 இன்ஸ்பெக்டர் உள்பட ஏராளமான போலீசார் குவிக்கப்பட்டனர். இதனால் அப்பகுதியில் பரபரப்பு ஏற்பட்டது.
இந்த சம்பவம் குறித்து டாஸ்மாக்கடை மேற்பார்வையாளர் அண்ணாதுரை கொடுத்த புகாரின் பேரில் டாஸ்மாக் கடையை சூறையாடிய 98 பேர் மீது போலீசார் வழக்குப் பதிவு செய்துள்ளனர்.
