IPL 2025: டெல்லி அணியின் வெற்றிப்பயணம் தொடருமா? பெங்களூருவுடன் இன்று பலப்பரீட்சை

ஐ.பி.எல். கிரிக்கெட் தொடரில் பெங்களூரு சின்னசாமி ஸ்டேடியத்தில் இன்று நடைபெறும் 24-வது லீக் ஆட்டத்தில் பெங்களூரு ராயல் சேலஞ்சர்ஸ் - டெல்லி கேப்பிட்டல்ஸ் அணிகள் மோதுகின்றன.

ரஜத் படிதார் தலைமையிலான பெங்களூரு அணி தனது முதல் இரு ஆட்டங்களில் முறையே 7 விக்கெட் வித்தியாசத்தில் கொல்கத்தாவையும், 50 ரன் வித்தியாசத்தில் சென்னையையும் வீழ்த்தியது. அடுத்து உள்ளூரில் நடந்த ஆட்டத்தில் 8 விக்கெட் வித்தியாசத்தில் குஜராத்திடம் தோற்றது. கடந்த ஆட்டத்தில் 12 ரன் வித்தியாசத்தில் மும்பையை அதன் சொந்த மண்ணில் அடக்கியது. அந்த ஆட்டத்தில் 221 ரன்கள் குவித்த பெங்களூரு அணி, 209 ரன்னில் மும்பையை கட்டுப்படுத்தி வெற்றி கண்டது.

பெங்களூரு அணியில் பேட்டிங்கில் விராட் கோலி (2 அரைசதத்துடன் 164 ரன்), கேப்டன் ரஜத் படிதார் (2 அரைசதத்துடன் 161 ரன்), பில் சால்ட், தேவ்தத் படிக்கல், விக்கெட் கீப்பர் ஜிதேஷ் ஷர்மாவும், பந்து வீச்சில் ஹேசில்வுட், குருணல் பாண்ட்யா, யாஷ் தயாளும் சிறப்பாக செயல்பட்டு வருகிறார்கள்.

டெல்லி அணி தனது முதல் மூன்று ஆட்டங்களில் லக்னோ, ஐதராபாத், சென்னை அணிகளை அடுத்தடுத்து பதம் பார்த்து 'ஹாட்ரிக்' வெற்றியை ருசித்தது.

நடப்பு சீசனில் தோல்வியை சந்திக்காக ஒரே அணியான டெல்லியின் பேட்டிங்கில் லோகேஷ் ராகுல், பாப் டுபிளிஸ்சிஸ், டிரிஸ்டான் ஸ்டப்ஸ், அஷூதோஷ் ஷர்மாவும், பந்து வீச்சில் மிட்செல் ஸ்டார்க், குல்தீப் யாதவ், விப்ராஜ் நிகம், முகேஷ் குமாரும் வலுசேர்க்கின்றனர். கேப்டன் அக்ஷர் பட்டேலின் பேட்டிங் மற்றும் பந்து வீச்சு இன்னும் எதிர்பார்ப்புக்கு ஏற்ப அமையவில்லை.

தனது வெற்றிப்பயணத்தை தொடர டெல்லி அணியும், 4-வது வெற்றியை குறிவைத்து பெங்களூரு அணியும் மல்லுக்கட்டும் இந்த ஆட்டத்தில் விறுவிறுப்புக்கு குறைவு இருக்காது.

இவ்விரு அணிகளும் இதுவரை 31 முறை நேருக்கு நேர் மோதி இருக்கின்றன. இதில் பெங்களூரு அணி 19 ஆட்டத்திலும், டெல்லி அணி 11 ஆட்டத்திலும் வெற்றி பெற்று இருக்கின்றன. ஒரு ஆட்டம் முடிவு இல்லாமல் போனது.

போட்டிக்கான இரு அணிகளின் உத்தேச பட்டியல் வருமாறு:-

பெங்களூரு: பில் சால்ட், விராட் கோலி, தேவ்தத் படிக்கல், ரஜத் படிதார் (கேப்டன்), லியாம் லிவிங்ஸ்டன், ஜிதேஷ் ஷர்மா, டிம் டேவிட், குருணல் பாண்ட்யா, புவனேஷ்வர் குமார், ஹேசில்வுட், யாஷ் தயாள், சுயாஷ் ஷர்மா அல்லது ஸ்வப்னில் சிங் அல்லது ராசிக் சலாம்.

டெல்லி: பாப் டுபிளிஸ்சிஸ் அல்லது சமீர் ரிஸ்வி, ஜேக் பிராசர் மெக்குர்க், அபிஷேக் போரல், லோகேஷ் ராகுல், டிரிஸ்டான் ஸ்டப்ஸ், அக்ஷர் பட்டேல் (கேப்டன்), விப்ராஜ் நிகம், மிட்செல் ஸ்டார்க், குல்தீப் யாதவ், முகேஷ் குமார், மொகித் ஷர்மா அல்லது டி.நடராஜன், அஷூதோஷ் ஷர்மா.

இரவு 7.30 மணிக்கு தொடங்கும் இந்த ஆட்டத்தை ஸ்டார் ஸ்போர்ட்ஸ் சேனல் நேரடி ஒளிபரப்பு செய்கிறது.