டி.என்.பி.எல். கிரிக்கெட்: சேப்பாக் சூப்பர் கில்லீஸ் 5-வது வெற்றி பெறுமா?

திண்டுக்கல்:

டி,என்.பி.எல். என்று அழைக்கப்படும் தமிழ்நாடு பிரிமீயர் ‘லீக்’ 20 ஓவர் கிரிக்கெட் போட்டி சென்னை, நெல்லை, திண்டுக்கல் ஆகிய 3 இடங்களில் நடைபெற்று வருகிறது.

8 அணிகள் பங்கேற்று விளையாடி வரும் இந்தப் போட்டியில் ‘லீக்’ முடிவில் புள்ளிகள் அடிப்படையில் முதல் 4 இடங்களை பிடிக்கும் அணிகள் ‘பிளேஆப்’ சுற்றுக்கு தகுதிபெறும்.

கடந்த முறை 2-வது இடத்தை பிடித்த சேப்பாக் சூப்பர் கில்லீஸ் அணி 5 ஆட்டத்தில் விளையாடி 4 வெற்றி, 1 தோல்வியுடன் 8 புள்ளிகள் பெற்று உள்ளது. 2-வது இடத்தில் இருக்கும் அந்த அணி திருவள்ளூர் வீரன்ஸ் (6 விக்கெட்), கோவை கிங்ஸ் (6 விக்கெட்), காரைக்குடி காளை (6 விக்கெட்), மதுரை சூப்பர் ஜெயன்ட் (5 விக்கெட்) ஆகியவற்றை வீழ்த்தியது. நடப்பு சாம்பியன் தூத்துக்குடி பேட்ரியாட்சிடம் 27 ரன்னில் தோற்றது.

ஆர்.சதீஷ் தலைமையிலான சேப்பாக் சூப்பர் கில்லீஸ் அணி 6-வது ஆட்டத்தில் ரூபி திருச்சி வாரியர்சை எதிர்கொள்கிறது. இந்த ஆட்டம் திண்டுக்கல்லை அடுத்த நத்தம் என்.பி.ஆர். கல்லூரி மைதானத்தில் நாளை (9-ந் தேதி) நடக்கிறது.

சேப்பாக் சூப்பர் கில்லீஸ் அணி ரூபி திருச்சி வாரியர்சை வீழ்த்தி 5-வது வெற்றியை பெற்று ‘பிளேஆப்’ சுற்றுக்கு முன்னேறும் ஆர்வத்துடன் உள்ளது.

சேப்பாக் சூப்பர் கில்லீஸ் அணியின் பேட்டிங்கில் தொடக்க வீரர்கள் கோபிநாத் (160 ரன்), தலைவன் சற்குணம் மற்றும் சசிதேவ், கார்த்திக், வசந்த் சரவணன் ஆகியோரும் பந்துவீச்சில் சாய் கிஷோர் (10விக்கெட்), அலெக்சாண்டர், யோ மகேஷ் ஆகியோரும் நல்ல நிலையில் உள்ளனர். ஆல்ரவுண்டர் வரிசையில் கேப்டன் ஆர்.சதீஷ், அந்தோணிதாஸ் உள்ளனர்.

கடந்த ஆண்டு நடந்த போட்டியில் சேப்பாக் சூப்பர் கில்லீஸ் அணி 7 விக்கெட் வித்தியாசத்தில் வென்று இருந்தது. இதனால் இந்த முறையும் ரூபி திருச்சி வாரியர்சை வீழ்த்த முடியும் என்ற நம்பிக்கையில் இருக்கிறது. சேப்பாக் சூப்பர் கில்லீஸ் அணி இந்த சீசனில் திண்டுக்கல்லில் விளையாடும் முதல் போட்டியாகும்.

பாபா இந்திரஜித் தலைமையிலான ரூபி திருச்சி வாரியர்ஸ் அணி 1 வெற்றி, 3 தோல்வியுடன் 2 புள்ளிகள் பெற்று 7-வது இடத்தில் உள்ளது. அந்த அணி மதுரை அணியை மட்டும் (2 ரன்) வென்று இருந்தது. தூத்துக்குடி (10 விக்கெட்), திருவள்ளூர் (57 ரன்), திண்டுக்கல் (23 ரன்) ஆகிய அணிகளிடம் தோற்று இருந்தது.

ரூபி திருச்சி வாரியர்ஸ் அணி 2-வது வெற்றியை பெறும் ஆர்வத்தில் உள்ளது.

இரவு 7.15 மணிக்கு நடைபெறும் இந்த ஆட்டம் ஸ்டார் ஸ்போர்ட்ஸ் டெலிவி‌ஷனில் நேரடியாக ஒளிபரப்பு செய்யப்படுகிறது.