செயின்ட் பீட்டர்ஸ் பர்க்:
சர்வதேச கால்பந்து சம்மேளனத்தின் 10-வது கான்படரேசன் கோப்பை கால்பந்து போட்டி ரஷியாவில் கடந்த 17-ந்தேதி தொடங்கியது. இதில் போட்டியை நடத்தும் ரஷியா, ஜெர்மனி, ஆஸ்திரேலியா, சிலி, மெக்சிகோ, நியூசிலாந்து, போர்ச்சுக்கல், கேமரூன் ஆகிய 8 நாடுகள் பங்கேற்றன.
‘லீக்’ முடிவில் போர்ச்சுக்கல், சிலி, ஜெர்மனி, மெக்சிகோ ஆகியவை அரையிறுதிக்கு தகுதி பெற்றன. அரையிறுதி முடிவில் போர்ச்சுக்கல், மெக்சிகோ வெளியேறின.
நேற்று நடந்த இறுதிப் போட்டியில் ஜெர்மனி-சிலி அணிகள் மோதின. இதில் ஜெர்மனி 1-0 என்ற கோல் கணக்கில் வென்று சாம்பியன் பட்டம் பெற்றது. ஆட்டத்தின் 20-வது நிமிடத்தில் ஜெர்மனி வீரர் லார்ஸ் ஸ்டின்டில் கோல் அடித்தார். இறுதி வரை சிலியால் பதில் கோல் அடிக்க இயலவில்லை.
ஜெர்மனி முதல் முறையாக கான்படரேசன் கோப்பையை வென்றது. பிரேசில் அதிகபட்சமாக 4 முறையும், பிரான்ஸ் 2 தடவையும் பட்டம் பெற்றுள்ளன. அர்ஜென்டினா, மெக்சிகோ, டென்மார்க் தலா 1 முறை வென்றுள்ளன. இந்த வரிசையில் தற்போது ஜெர்மனியும் இணைந்துள்ளது.
முன்னதாக நடந்த 3-வது இடத்துக்கான ஆட்டத்தில் போர்ச்சுக்கல் 2-1 என்ற கோல் கணக்கில் மெக்சிகோவை வீழ்த்தியது.
