தமிழக முதலமைச்சர் மு.க. ஸ்டாலினுக்கு இன்று பிறந்த நாள். 70 வயது நிறைவடைந்து 71-வது வயதில் அடியெடுத்து வைக்கிறார். அவருக்கு கட்சி தலைவர்கள், திமுக தொண்டர்கள் வாழ்த்து தெரிவித்து வருகின்றனர்.
இந்த நிலையில் பிரதமர் மோடி எக்ஸ் தளம் மூலமாக மு.க. ஸ்டாலினுக்கு பிறந்த நாள் வாழ்த்து தெரிவித்துள்ளார்.
பிரதமர் மோடி தனது எக்ஸ் பக்கத்தில் "தமிழக முதலமைச்சர் மு.க. ஸ்டாலினுக்கு பிறந்த நாள் வாழ்த்துக்கள். நீண்ட ஆயுள் மற்றும் உடல் ஆரோக்கியத்திடன் வாழ வாழ்த்துக்கள்" எனத் தெரிவித்துள்ளார்.
அரசியல் ரீதியாக பிரதமர் மோடிக்கும் தமிழக முதலமைச்சர் மு.க. ஸ்டாலினுக்கும் இடையில் கடும் மோதல் இருந்து வருகிறது.
இந்த வாரத் தொடக்கத்தில் பல்லடம், நெல்லை, தூத்துக்கடி வந்த பிரதமர் மோடி திமுக-வை கடுமையாக விமர்சனம் செய்தார். மக்களவை தேர்தலுக்குப் பிறகு திமுக இருக்காது எனத் தெரிவித்திருந்தார்.
இதற்கு பதிலடியாக தமிழக முதலமைச்சர் மு.க ஸ்டாலின், தமிழ்நாட்டுக்கு அடிக்கடி வரத் தொடங்கி இருக்கிறார் பிரதமர் மோடி. தோல்வி பயம் அவர் முகத்தில் தெரிகிறது. அந்தக் கோபத்தைத்தான் அவரது முகம் காட்டுகிறது. தி.மு.க.வைப் பற்றியும், கழக அரசைப் பற்றியும் அவதூறுகளை அள்ளி வீசி இருக்கிறார் பிரதமர்.
அவர் கொண்டு வந்த திட்டங்களுக்கு நாம் தடை போடுகிறோமாம். எந்தத் திட்டங்களைக் கொண்டு வந்தார், எதற்கு நாம் தடையாக எப்படி இருந்தோம் என்று பட்டியல் போட்டிருந்தால் பதில் சொல்ல வசதியாக இருக்கும் எனக் குறிப்பிட்டிருந்தார்.
