நெல்லை:
தமிழகத்தில் கடந்த சில மாதங்களாக தக்காளி, சின்ன வெங்காயம் உள்ளிட்ட அனைத்து காய்கறிகளின் விலையும் தொடர்ந்து அதிகரித்த வண்ணம் இருந்தது. வட மாநிலங்களில் ஏற்பட்ட பெருமழை காரணமாகவும், உள்ளூரில் விளைச்சல் குறைவு உள்ளிட்ட காரணங்களாலும் தொடர்ந்து காய்கறியின் விலை அதிகரித்து வந்தது.
இந்நிலையில் கடந்த வாரம் ஒரு கிலோ தக்காளி விலை ரூ.200 ஐ தொட்டது. இல்லத்தரசிகள் கடும் அதிர்ச்சிக்குள்ளான நிலையில் தொடர்ந்து படிப்படியாக தக்காளி விலை குறைய தொடங்கியது. வரத்து அதிகரிப்பால் நேற்று ஒரு கிலோ தக்காளி ரூ.70- ஆக குறைந்தது.
இந்நிலையில் இன்று தக்காளி விலை திடீரென கிலோ ரூ.30 வரையில் உயர்ந்தது. இன்று ஒரு கிலோ ரூ.100-க்கு விற்பனை செய்யப்பட்டது. நேற்று ஒரு பெட்டி தக்காளி ரூ.1,900-க்கு விற்பனையான நிலையில் இன்று ஒரு பெட்டி ரூ.2,800 வரையிலும் விற்பனை செய்யப்பட்டது. இதே போல் இஞ்சி விலை ரூ.250 முதல் 280 வரையிலும், ஒரு கிலோ பல்லாரி ரூ.25 முதல் தரத்துக்கு ஏற்ப ரூ.35 வரையிலும், சின்ன வெங்காயம் ரூ.60 முதல் ரூ.70 வரையிலும் விற்பனை செய்யப்படுகிறது.
