உடுமலை:
உடுமலை தளி ரோடு அருகே உள்ள பசுபதி வீதியில் டாஸ்மாக் மதுக்கடை செயல்படுகிறது. தளி ரோட்டில் பிரதான வர்த்தக நிறுவனங்கள், கடைகள் உள்ளன. 20க்கும் மேற்பட்ட லேஅவுட்களுக்கும் இந்த வழியாகத்தான் மக்கள் செல்கின்றனர்.
டாஸ்மாக் கடை எதிரே நகர கூட்டுறவு வங்கி , மத்திய கூட்டுறவு வங்கி உள்ளிட்டவை உள்ளன. டாஸ்மாக் கடையில் எப்பொழுதும் கூட்டம் காணப்படுகிறது. மது வாங்குவதற்கு சாலையை பாதி ஆக்கிரமித்தவாறு குடிமகன்கள் நின்று விடுகின்றனர். இதனால் குடியிருப்பு வாசிகள் அந்த வழியாக செல்ல முடியவில்லை.
குடிமகன்கள் தள்ளாடி வருவதால் போக்குவரத்துக்கும் இடையூறு ஏற்படுகிறது. மேலும் அப்பகுதியில் இருந்த ஒரு மதுக்கடை மூடப்பட்டு விட்டதால் இந்த மதுக்கடையில் எப்பொழுதும் கூட்டம் அலைமோதுகிறது. இந்த கடையை வேறு இடத்திற்கு மாற்ற வேண்டும் என பொதுமக்கள் ஏற்கனவே ஆர்ப்பாட்டம் மற்றும் மறியல் நடத்தியுள்ளனர்.
ஆனால் எந்த நடவடிக்கையும் எடுக்கவில்லை. எனவே பொதுமக்களுக்கும் வியாபாரிகளுக்கும் இடையூறாக இருக்கும் இந்த கடையை அகற்றி வேறு இடத்திற்கு மாற்ற வேண்டும் என குடியிருப்போர் கோரிக்கை விடுத்துள்ளனர்.
