சிவகங்கை

திருப்பத்தூர்:

திருப்பத்தூர் ஓன்றியம் வஞ்சினிபட்டி ஊராட்சி மன்ற தலைவராக இருப்பவர் கண்ணன். இவர் 2 முறை இக்கிராமத்தில் தலைவராக உள்ளார்.

இவருக்கும் அதே ஊரைச் சேர்ந்த வெள்ளைச்சாமி, அவரது மகன் சுப்புராம் ஆகியோருக்கும் சுற்று சுவர் எடுப்பதில் ஏற்கனவே தகராறு இருந்துள்ளது.

இந்நிலையில் நேற்று இருவருக்கும் ஏற்பட்ட வாய் தகராறு கைகலப்பாக மாறியது. இதில் ஊராட்சி மன்ற தலைவர் கண்ணன் காயங்களுடன் திருப்பத்தூர் அரசு மருத்துவமனையில் அனுமதிக்கப்பட்டு முதலுதவி சிகிச்சை பெற்றார். பின்பு மேல் சிகிச்சைக்கு மதுரை அரசு ஆஸ்பத்திரிக்கு அனுப்பி வைக்கப்பட்டார்.

இச்சம்பவம் குறித்து கண்டவராயன்பட்டி போலீசார் வெள்ளைச்சாமி, அவரது மகன் சுப்புராம் ஆகியோர் மீது வழக்கு பதிவு செய்து விசாரித்து வருகின்றனர்.

காரைக்குடி:

சிவகங்கை மாவட்டம் காரைக்குடியை சேர்ந்த தனியார் பள்ளியில் 10–ம் வகுப்பு படித்து வந்தவர்கள் பாலாஜி (வயது14), விக்னேஷ் (14), சஞ்சய் ராமசாமி (14), சிவபாலன் (14).

இவர்கள் 4 பேரும் கடந்த 21–ந்தேதி காலை வீட்டில் இருந்து வழக்கம் போல் பள்ளிக்கு புறப்பட்டு சென்றனர். ஆனால் அவர்கள் பள்ளிக்கு வரவில்லை என தலைமையாசிரியர் மாணவர்களின் பெற்றோருக்கு தகவல் கொடுக்க பரபரப்பு ஏற்பட்டது.

4 மாணவர்கள் ஒரே நேரத்தில் மாயமானதால் அவர்கள் கடத்தப்பட்டார்களா? அல்லது வேறு எங்காவது சேர்ந்து சென்றார்களா? என தெரியாமல் பல்வேறு பகுதிகளிலும் பெற்றோர் தேடினர். இருப்பினும் அவர்களை பற்றி எந்த தகவலும் கிடைக்கவில்லை.

இதனை தொடர்ந்து காரைக்குடி வடக்கு போலீசில் புகார் செய்யப்பட்டது. இன்ஸ்பெக்டர் பிச்சைப்பாண்டியன் வழக்குப்பதிவு செய்து மாயமான 4 மாணவர்களையும் தேடி வந்தார். இந்த சூழலில் மாணவர்கள் பெங்களூருவில் இருப்பதாக தகவல் கிடைத்துள்ளது.

மாயமான 4 மாணவர்களும் பெங்களூரு சென்றுள்ளனர். அங்கு அவர்கள் சுற்றி திரிந்தபோது மாணவன் பாலாஜியின் உறவினர் கண்ணில் பட்டு விட்டனர். அவர் 4 மாணவர்களையும் மீட்டு பெற்றோருக்கு தகவல் கொடுத்துள்ளார்.

இதன் அடிப்படையில் மாணவர்களின் பெற்றோரும், போலீசாரும் பெங்களூரு விரைந்துள்ளனர். அவர்கள் வந்த பிறகே மாணவர்கள் பெங்களூரு சென்றது எப்படி என்பது குறித்த விவரம் தெரியவரும்.

மாணவர்கள் மாயமான பள்ளியில் படித்து வந்த 12–ம் வகுப்பு மாணவி ஒருவரும், கடந்த 13–ந்தேதி முதல் மாயமாகி இருப்பது தற்போது தெரியவந்துள்ளது. வீட்டில் இருந்து மாயமான அவர் ஆந்திர மாநிலம் ஹைதராபாத்தில் இருப்பதாக போலீசாருக்கு தகவல் கிடைத்துள்ளது. அவரை மீட்க காரைக்குடி போலீசார் ஹைதராபாத் சென்றுள்ளனர்.

மானாமதுரை:

சிவகங்கை மாவட்டம் மானாமதுரை அருகே உள்ள கீழமேல்குடி கிராமத்தைச் சேர்ந்தவர் ஜெயகணேஷ் (வயது45), கூலி தொழிலாளி. இவரது மனைவி வீரமல்லி. கடந்த சில மாதங்களாக ஜெயகணேஷ் சரியாக வேலைக்கு செல்லாமல் மது பழக்கத்துக்கு அடிமையானார். இதனால் அடிக்கடி குடித்து விட்டு வந்து மனைவியிடம் தகராறு செய்வது வாடிக்கையாக இருந்தது.

இந்த நிலையில் நேற்று இரவும் மது குடித்த நிலையில் வீட்டுக்கு வந்த ஜெயகணேஷ் வழக்கம் போல் மனைவியிடம் தகராறு செய்தார். அப்போது வீட்டில் இருந்து வீரமல்லியின் தாயார் செல்லம்மாள், ஏன் தினமும் குடித்து விட்டு மகளிடம் பிரச்சினை செய்கிறாய் என கேட்டார்.

இதனால் ஆத்திரம் அடைந்த ஜெயகணேஷ், போதையில் தன் நிலையை மறந்து செல்லம்மாளை சுவற்றில் மோதச்செய்தும், கீழே தள்ளியும் தாக்கினார். இதில் படுகாயம் அடைந்த அவர், சிறிது நேரத்திலேயே பரிதாபமாக இறந்தார். இதனால் அதிர்ச்சி அடைந்த ஜெயகணேஷ் உடனே மானாமதுரை போலீஸ் நிலையத்திற்கு சென்று நடந்த சம்பவங்களை கூறி சரண் அடைந்தார். போலீசார் அவரை கைது செய்தனர்.

இந்த நிலையில் கொலை நடந்த இடத்திற்கு வந்து மானாமதுரை போலீஸ் துணை சூப்பிரண்டு புருசோத்தமன் விசாரணை நடத்தினார். இந்த சம்பவம் குறித்து மானாமதுரை போலீசார் வழக்குப்பதிவு செய்தனர்.

காரைக்குடி:

சிவகங்கை மாவட்டம் காரைக்குடி தலைமை அஞ்சலகத்தில் சிலர் தங்களது சேமிப்பு கணக்குகளை பராமரிக்காமல் இருந்து வருகின்றனர். இதை பயன்படுத்தி அந்த கணக்குகளில் இருந்து லட்சக்கணக்கில் பணப் பரிமாற்றம் நடந்திருப்பது தெரியவந்தது.

இதுகுறித்து தென்மண்டல இயக்குநர் நிர்மலாதேவி தலைமையிலான குழுவினர் விசாரணை மேற்கொண்டனர். இதில் அஞ்சலக உதவி பெண் அலுவலர் முத்துமதி (வயது27) என்பவர் கடந்த 2 ஆண்டுகளாக பல லட்ச ரூபாயை முறைகேடாக பரிமாற்றம் செய்திருப்பது தெரியவந்தது.

இவர் எம்.சி.ஏ. பட்டதாரி என்பதால் அஞ்சலக அதிகாரிகளின் பாஸ்வேர்டை முறைகேடாக பயன்படுத்தி ஏ.டி.எம். மூலம் பணப்பரிமாற்றம் செய்திருப்பது தெரியவந்தது. இதையடுத்து அவர் மீது காவல் நிலையத்தில் புகார் அளிக்கப்பட்டது.

இதில் பல லட்சம் ரூபாய்க்கு முறைகேடு நடந்து இருக்கலாம் என்பதால் விசாரணை சி.பி.ஐ.க்கு மாற்றப்பட்டது. அதன்படி சி.பி.ஐ. உதவி ஆணையர் சடகோபன் தலைமையில் அதிகாரிகள், காரைக்குடி அஞ்சலகத்தில் பண பரிவர்த்தனையில் தொடர்புடைய அலுவலர்கள் வீடுகளிலும், அஞ்சலக சேமிப்பு கணக்கு முகவரின் வீட்டிலும் சோதனை நடத்தினார்கள்.

இதில் சுமார் ரூ.1 கோடிக்கும் மேல் முறைகேடு நடந்திருப்பதாக விசாரணையில் தெரியவந்துள்ளது. சில ஆவணங்கள் கைப்பற்றப்பட்டன.

இதைத்தொடர்ந்து 2 அஞ்சலக உதவி அலுவலர்கள் உள்பட 7 பேர் பணியிடை நீக்கம் செய்யப்பட்டுள்ளனர். குற்றம் சாட்டப்பட்டுள்ள உதவி அலுவலர் முத்துமதி மதுரை ஐகோர்ட்டில் முன் ஜாமீன் பெற்றுள்ளதாக தெரிகிறது.

மானாமதுரை:

சிவகங்கை மாவட்டம் மானாமதுரையில் முழு சுகாதார திட்டம் செயல்படுத்தப்பட்டு சேகரிக்கப்படும் குப்பைகள் மறு சுழற்சி செய்யப்படுகிறது.

நகரில் பிளாஸ்டிக் பைகள் பயன்பாட்டிற்கு தடை விதிக்கப்பட்டு உள்ளது. வைகை ஆற்றிலும் மருத்துவ கழிவுகள், கோழி இறைச்சி கழிவுகள் கொட்டப்படாத வகையில் வைகை ஆறும் கண்காணிப்பட்டு வருகிறது. வைகை ஆற்றில் கோழிகழிவுகளை வீசும் நபர்கள் மீதும் நடவடிக்கை எடுக்கப்பட்டு வருகிறது.

இது தவிர நாள்தோறும் தினமும் காலையில் அனைத்து தெருக்களிலும் வீடுகளுக்கே சென்று மக்கும் குப்பைகள், மக்காத குப்பைகள் பிரித்து வாங்கும் பணியும் நடந்து வருகிறது.

தற்போது திருமண விழா மற்றும் திருவிழா காலங்களில் வீதிகளில் வீசப்படும் குப்பைகளை தடுக்க பிளாஸ்டிக் குப்பை தொட்டிகள் தயார் நிலையில் உள்ளது. புதிய உறுதியான இந்த குப்பை தொட்டிகள் மானாமதுரை பஸ் நிலையம், மருத்துவமனை, வாரச்சந்தை, வைகை ஆற்று கரை பகுதி, மூன்று தெருக்கள் சந்திக்கும் இடம் ஆகிய இடங்களில் வைக்கப்பட உள்ளன என மானாமதுரை பேரூராட்சி செயல் அலுவலர் மங்களேஸ்வரன், சுகாதார ஆய்வாளர் அபுபக்கர் ஆகியோர் தெரிவித்தனர்.