சிவகங்கை

மானாமதுரை:

சிவகங்கை மாவட்டம் மானாமதுரை அருகே உள்ள பஞ்சபூதேஸ்வரம் என்ற இடத்தில் உள்ள மகா பிரித்தியங்கிரா தேவி கோவிலில் உலக மக்கள் ஆனந்தமாய் வாழ வேண்டி சகஸ்ர சண்டீயாக பெருவிழா கடந்த 29–ந்தேதி தொடங்கியது.

மகா கணபதி ஹோமத்துடன் தொடங்கிய 3–ம் நாள் விழாவில் குழந்தை இல்லாத தம்பதிகள் மட்டும் கலந்து கொள்ளும் புத்திர காமேஷ்டி யாகம் நடந்தது. அதை தொடர்ந்து திருமண தடை நீங்க சுயம்வர பார்வதி ஹோமும், நோய்கள் இன்றி வாழ தன்வந்தரி ஹோமமும் நடந்தது.

இன்று (திங்கட்கிழமை) காலை 7 மணிக்கு சகஸ்ர சண்டீ என அழைக்கப்படும் ஆயிரம் சண்டீ யாகம் தொடங்கியது. தஞ்சை குருஜீ கணபதி சுப்பிரமணியம் சாஸ்திரி, யாகத்தில் உயர்ரக பட்டாடை, பட்டு புடவைகள், தங்க, வெள்ளி ஆபரணங்கள், பூமாலைகள், 21 வகையான மூலிகை பொருட்கள் போட்டு யாக வேள்வியை நடத்தினார்.

2–ந்தேதி (செவ்வாய்க் கிழமை) காலை 7 மணி முதல் இரவு 9 மணி வரை ஆடி அமாவாசை, பதினெட்டாம் பெருக்கு, குருபெயர்ச்சியை முன்னிட்டு ஹோமம், கணபதி ஹோமம், வித்யா கணபதி ஹோமம், பஞ்சமுக பிரித்தியங்கிரா ஹோமம் நடைபெறுகிறது.

அதை தொடர்ந்து அம்பாளுக்கு பாத சமர்ப்பணம், கடம்புறப்பாடு நடைபெறுகிறது.

இரவு 9 மணிக்கு அம்பாளின் திரு அவதார நாடகமும் நடைபெறுகிறது. சகஸ்ர சண்டீ யாக விழா ஏற்பாடுகளை மானாமதுரை பஞ்சமுக பிரித்தியங்கிரா வேத தர்ம ஷேத்ரா டிரஸ்டியினர் செய்து வருகின்றனர். சிறப்பு யாக விழாவை முன்னிட்டு அன்னதானம் நடைபெறுகிறது. மதுரை, சிவகங்கை, மானாமதுரை பகுதியில் இருந்து சிறப்பு பஸ்கள் விடப்பட்டு உள்ளன.

காரைக்குடி:

காரைக்குடி அருகே உள்ள சாக்கோட்டை, திருக பட்டி பகுதியில் உள்ள ஒரு தனியார் பள்ளியில் கட்டிட பணிகள் நடந்து வருகிறது. இதில் மதுரை அவனியாபுரத்தைச் சேர்ந்த லட்சுமணன், எழுமலையை சேர்ந்த பாண்டியராஜன், மானாமதுரையை சேர்ந்த பழனிக்குமார், மோகன், மருதுபாண்டி ஆகியோர் தங்கி இருந்து வேலை பார்த்து வருகின்றனர்.

நேற்று வேலை இல்லாத தால் 5 பேரும் கட்டிடத்தின் ஒரு பகுதியில் மது குடித்த தாக கூறப்படுகிறது. மருது பாண்டி கட்டிடத்தின் மேல்பகுதிக்கு சென்றபோது எதிர்பாராதவிதமாக மேலே இருந்து தவறி கீழே விழுந்தார்.

ரத்த வெள்ளத்தில் படுகாயம் அடைந்த அவர் காரைக்குடி அரசு ஆஸ்பத்திரிக்கு கொண்டு செல்லப்பட்டார். அவரை பரிசோதித்த டாக்டர்கள் மருதுபாண்டி ஏற்கனவே இறந்துவிட்டதாக தெரிவித்தனர்.

இதுகுறித்து சாக்கோட்டை போலீஸ் இன்ஸ்பெக்டர் செல்வராஜ் வழக்குப்பதிவு செய்து விசாரணை நடத்தி வருகிறார்.

காரைக்குடி:

காரைக்குடி அருகே பெரியகோட்டையை சேர்ந்தவர் செல்லையா மகன் பாண்டி (வயது 30). இவர் சிங்கப்பூரில் வேலை செய்து வந்தார். தற்போது 1 மாத விடுமுறையில் ஊருக்கு வந்துள்ளார்.

பாண்டியும், அவருடன் 4 நண்பர்களும் சேர்ந்து இரவு மோட்டார் சைக்கிளில் எலி வேட்டைக்கு சென்றனர். எலி வேட்டையை முடித்து விட்டு இன்று அதிகாலை 4 மணிக்கு தீர்த்தலைக்காடு அருகே வந்து கொண்டு இருந்தனர்.

அப்போது இரவு நேர ரோந்து போலீசார், பாண்டியுடன் வந்தவர்கள் முன்னதாக சென்ற மோட்டார் சைக்கிளை தடுத்து நிறுத்தினர். போலீசார் அவர்களிடம் டிரைவிங் லைசென்ஸ், ஆர்.சி.புத்தகம் ஆகியவற்றை வாங்கி பார்த்தனர்.

அதனை கண்ட பாண்டியும் அவருடன் வந்த மற்ற இரண்டு நண்பர்களும் மோட்டார் சைக்கிள்களை போலீசார் சோதனையிடும் பகுதிக்கு முன்பாகவே நிறுத்தினர். பின்னர் அங்கிருந்து தப்பி அருகே உள்ள தோட்டத்திற்கு சென்று பதுங்கினார்கள். இதை பார்த்து தோட்டத்தில் இருந்த நாய்கள் குரைத்ததால், தோட்டக் காரர்கள் மின் விளக்கை எரிய விட்டு சுற்றி பார்த்தனர்.

இதனால் அதிர்ச்சி அடைந்த பாண்டி, அங்கிருந்து தப்பி செல்ல முயற்சி செய்தபோது எதிர்பாராத விதமாக தோட்டத்தில் இருந்த கிணற்றுக்குள் விழுந்து விட்டார். இதில் காயம் அடைந்த அவர் சம்பவ இடத்திலேயே பரிதாபமாக இறந்தார்.

காரைக்குடி போலீஸ் டி.எஸ்.பி. கார்த்திகேயன் சம்பவ இடத்தை பார்வையிட்டு விசாரணை நடத்தினார். சாக்கோட்டை போலீசார் வழக்குப்பதிவு செய்து விசாரணை நடத்தி வருகிறார்கள்.

காரைக்குடி:

சிவகங்கை மாவட்டம் காரைக்குடி காளவாய் பொட்டல் பகுதியை சேர்ந்தவர் சரவணன் (வயது23). டிப்ளமோ பொறியாளரான இவர் சென்னையில் உள்ள தனியார் கட்டுமான நிறுவனத்தில் வேலை செய்தார்.

பின்னர் ராஜஸ்தான் மாநிலம் ஜிம்ஜிம் பகுதியில் கேத்தரின் என்ற இடத்துக்கு இடமாற்றம் செய்யப்பட்டார். இவருடன் உ.பி.மாநிலத்தை சேர்ந்தவர்கள் உள்பட 5 பேர் அங்கு இருந்தனர். கடந்த 24-ந்தேதி வெளியே சென்ற சரவணன் பின்னர் இருப்பிடத்துக்கு திரும்ப வில்லை. இது குறித்து ஜிம்ஜிம் பகுதி போலீசார் வழக்குப்பதிவு செய்து விசாரணை நடத்தி வருகிறார்கள்.

என்ஜினீயர் சரவணனின் தாய் புஷ்பா கூறுகையில், எனது மகன் காணாமல் போன தகவலை அவனுடன் வேலை செய்த நபர் எனக்கு போன் மூலம் தகவல் தெரிவித்தார். ராஜஸ்தான் மாநிலத்தில் உள்ள தனியார் நிறுவனத்துக்கு கணவர் மற்றும் மருமகனுடன் சென்று விசாரித்தபோது காணவில்லை என்று போலீசார் வழக்குப்பதிவு செய்துள்ளதாக மட்டும் தெரிவித்தனர். இது தவிர வேறு ஏதும் தெரிவிக்க மறுத்துவிட்டனர்.

எனது மகன் பணத்துக்காக கடத்தப்பட்டானா? அல்லது வேறு ஏதும் பிரச்சினையா? என்று தெரிய வில்லை. அவனை கண்டு பிடித்து தரக்கோரி தமிழக முதல்-அமைச்சரின் தனிப் பிரிவுக்கு மனு அனுப்பியுள்ளோம் என்று கண்ணீர் மல்க தெரிவித்தார்.

சிவகங்கை:

இளையான்குடி தாலுகா சங்க மங்கலத்தை சேர்ந்தவர் கலா (வயது 28). இவருக்கும் மேலத்துறையூர் கிராமத்தை சேர்ந்த விவசாயி ரஜினிகாந்த் என்பவருக்கும் கடந்த 5 ஆண்டுகளுக்கு முன்பு திருமணம் நடைபெற்றது.

இந்த நிலையில், ரஜினிகாந்த் மது பழக்கத்திற்கு அடிமையானார். அதனை கைவிடுமாறு கலா பலமுறை வலியுறுத்தியும் அவர் கேட்கவில்லை.

இதனால் வாழ்க்கையில் வெறுப்படைந்த கலா, வீட்டிற்குள் தூக்குப்போட்டு தற்கொலை செய்து கொண்டார். இது குறித்து கலாவின் தந்தை சஞ்சய் இளையான்குடி போலீசில் புகார் செய்தார்.

இதன்பேரில் சிவகங்கை காவல் துணை கண்காணிப்பாளர் வனிதா விசாரணை நடத்தி வருகிறார்.

காரைக்குடி:

சிவகங்கை மாவட்டம் காரைக்குடி அருகே உள்ள வ.சூரக்குடியில் மீனாட்சி–சுந்தரேசுவரர் ஆலயம் உள்ளது. சிவகங்கை சமஸ்தானம் தேவஸ்தானத்திற்கு சொந்தமான இந்தக் கோவிலில் உதவி அர்ச்சகராக செயல்பட்டவர் வைத்தியநாதன் (வயது 43).

இவர், நேற்று பகல் கோவிலில் பூஜை, புனஸ் காரங்களில் ஈடுபட்டுள்ளார். அதன் பிறகு வீட்டுக்கு புறப்பட்டுச் சென்றார்.

அதன் பிறகு மதியம் மற்றும் மாலை, இரவு பூஜைகளுக்கு வைத்தியநாதன் வரவில்லை. இதனால் சக அர்ச்சகர்கள் அவரை தேடினர். வீட்டில் கேட்டபோது, காலையில் கோவிலுக்கு சென்றவர் அதன் பிறகு வீட்டிற்கு வரவில்லை என தெரிவித்தனர்.

இந்த நிலையில் இன்று (செவ்வாய்க்கிழமை) காலை கோவிலுக்கு வெளியே உள்ள கோவில் தெப்பக் குளத்தில் வைத்தியநாதன் உடல் மிதப்பது தெரியவந்தது. இது குறித்த தகவல் கிடைத்ததும் குன்றக்குடி போலீஸ் இன்ஸ்பெக்டர் ரவிச்சந்திரன் மற்றும் போலீசார் விரைந்து சென்று உடலை கைப்பற்றி விசாரணை நடத்தினர்.

அப்போது குளத்தின் கரையில், வைத்தியநாதனின் சைக்கிள் நிற்பது தெரிய வந்தது. இதனால் குளத்தில் கால் கழுவச்சென்ற போது, அவர் தவறி விழுந்து இறந்து இருக்கலாம் என தெரிகிறது. தொடர்ந்து விசாரணை நடைபெற்று வருகிறது.