பெரம்பலூர்

பெரம்பலூர்:

பெரம்பலூர் மாவட்டம், குன்னம் அருகே உள்ள மருதையான் கோவில். இந்த கோவிலில் கும்பாபிஷேகம் நடைபெற்றது. இந்த கும்பாபிஷேக விழாவில் ஏராளமான பக்தர்கள் கலந்து கொண்டனர்.

கும்பாபிஷேகத்தையொட்டி கோவில் அருகே சாலையோரம் வேனில் இருந்து பக்தர்களுக்கு உணவு வழங்கப்பட்டது. அப்போது கொளத்தூர் கிராமத்தை சேர்ந்த மயில்வாகனம் மனைவி தெய்வகன்னி என்பவர் வரிசையில் நின்று உணவு பொட்டலத்தை வாங்கிக் கொண்டிருந்தார். சிறிது நேரம் கழித்து பார்த்தபோது தெய்வ கன்னி கழுத்தில் அணிந்திருந்த 3 பவுன் சங்கிலியை காணவில்லை. இதனால், கூச்சலிட்டார்.

இதனை பார்த்ததும் நகையை திருடியவர்கள் நைசாக கீழே போட்டுவிட்டு தப்ப முயன்றனர். இதுகுறித்து தெய்வக்கன்னி அருகில் பாதுகாப்பு பணியில் ஈடுபட்டிருந்த போலீசாரிடம் தெரிவித்தார்.

போலீசார், தெய்வகன்னி பின்னால் நின்று கொண்டிருந்த பெண்களிடம் விசாரணை நடத்தினர். விசாரணையில், ஆந்திராவை சேர்ந்த லீலா (வயது 35), சிவம்மா (36), மஞ்சுளா(40), திண்டுக்கல்லை சேர்ந்த பழனியம்மாள்(45), ஓசூர் பகுதியை சேர்ந்த சாந்தி (42), பொன்னாத்தாள் (36), வெள்ளையம்மாள் (48) ஆகிய 7 பேர் கூட்டாகச் சேர்ந்து கூட்டத்தில் நகை திருட முயற்சித்தது தெரியவந்தது.

இதுகுறித்து குன்னம் போலீசார் வழக்குப்பதிவு செய்து அவர்கள் 7 பேரையும் கைது செய்து விசாரணை நடத்தி வருகின்றனர்.

பெரம்பலூர்:

பெரம்பலூர் மாவட் டம், ஆலத்தூர் தாலுகா, கொளக்காநத்தம் கிரா மத்தை சேர்ந்த 50-க்கும் மேற்பட்ட பொதுமக்கள் எஸ்.பி. மணியிடம் மனு அளித்தனர். அதில் தெரிவித்துள்ளதாவது:

கொளக்காநத்தம் கிராமத்தில் கடந்த 3 ஆண்டுகளாக ராஜஸ்தான் மாநிலத்தை சேர்ந்த ஒருவர் தீபக் என்ற பெயரில் நகை அடகு கடை வைத்து தொழில் செய்து வந்தார். கொளக்காநத்தம், அயினாபுரம், கொளத்தூர் உள்ளிட்ட சுற்றுவட்டார கிராமத்தை சேர்ந்த 100&க்கும் மேற்பட்ட பொதுமக்கள் தங்களது பண தேவைக்காக அந்த அடமான கடையில் நகைகளை அடமானம் வைத்து பணம் பெற்றுள்ளனர்.

இந்நிலையில் தற்பொது விளைபொருட்கள் அறுவடை செய்த நாங்கள் பணத்தை திருப்பி கொடுத்து நகைகளை மீட்க சென்றோம். ஆனால் நகை கடை மூடியே உள்ளது. இது குறித்து அந்த கடையில் வேலை செய்த பெண்ணிடம் கேட்டபோது கடை திறப்பார்கள் என பதில் கூறுகிறார்.

ஆனால் கடந்த சில தினங்களாகவே கடை திறக்கவே இல்லை. அதுமட்டு மின்றி கடை உரிமையாளர் தான் தங்கியிருந்த வீட்டையும் காலி செய்துவிட்டு கடையை மூடிவிட்டு சென்றுவிட்டதாக கூறப்படுகிறது. இதனால் எங்களது 200 பவுனுக்கு மேலான நகை பறிபோயுள்ளது.

எனவே நாங்கள் வைத்த அடமான நகையை மீட்டுத்தர நடவடிக்கை எடுக்கவேண்டும் என அம்மனுவில் தெரிவித்துள் ளனர். மனுவினை பெற்றுக் கொண்ட எஸ்.பி. மனு மீது உரிய நடவடிக்கை எடுக்கப்படும் என உறுதி அளித்தார்.

பெரம்பலூர் :

பெரம்பலூர் மாவட்டம், குன்னம் தாலுகா, வேப்பூர் அருகே பள்ளக்காளிங்கராயநல்லூர் கிராமத்தை சேர்ந்தவர் தர்மலிங்கம். இவரது மனைவி லெட்சுமி (வயது 65), மகன் கலைவாணன்(44). லெட்சுமி அதே ஊரில் உள்ள அவரது மற்றொரு வீட்டின் மாடியில் குடியிருந்து வந்த நிலையில், கடந்த மாதம் 18- ந் தேதி அவர் இறந்து கிடந்தார். அவர் இயற்கையாக இறந்து விட்டதாக கருதி, அவரது உடலை உறவினர்களுடன் சேர்ந்து, மயானத்தில் அடக்கம் செய்தனர்.

இந்நிலையில் ஒரு வாரம் கழித்து கலைவாணன் தனது வீட்டில் பொருத்தப்பட்டிருந்த கண்காணிப்பு கேமராவில் பதிவான காட்சிகளை பார்த்தபோது, அவரது தாய் லெட்சுமி இறந்ததாக தெரியவந்த நாளுக்கு, முந்தைய நாள் இரவு 10 மணிக்கு மேல், அவர் வசித்து வந்த வீட்டின் மேல்மாடி பகுதிக்கு, சந்தேகிக்கும் வகையில் அவரது நெருங்கிய உறவினர் சிலர் வந்து சென்றது பதிவாகி இருந்தது.

இதனால் தனது தாயின் சாவில் சந்தேகம் ஏற்பட்டுள்ளது என்றும், அடக்கம் செய்யப்பட்டுள்ள அவரது உடலை தோண்டி எடுத்து, பிரேத பரிசோதனை செய்ய வேண்டும் என்றும் கடந்த மாதம் 28-ந்தேதி பெரம்பலூர் மாவட்ட போலீஸ் சூப்பிரண்டு அலுவலகத்தில் கலைவாணன் புகார் மனு கொடுத்திருந்தார்.

அதனுடன், கேமராவில் பதிவான காட்சிகளை ஆதாரமாக கொடுத்திருந்தார். இந்த மனு மீது உரிய விசாரணை நடத்த வேண்டும் என்று போலீஸ் சூப்பிரண்டு மணி உத்தரவிட்டதன் பேரில், குன்னம் போலீசார் முதற்கட்டமாக லெட்சுமியின் சாவு குறித்து சந்தேக மரணம் என்று வழக்குப்பதிந்து விசாரணை நடத்தினர்.

மேலும் நேற்று காலை குன்னம் தாசில்தார் அனிதா முன்னிலையில், அரசு டாக்டர் சரண்யா தலைமையிலான மருத்துவக்குழுவினர், அடக்கம் செய்யப்பட்டிருந்த லெட்சுமியின் உடலை தோண்டி எடுத்து பிரேத பரிசோதனை செய்து, மீண்டும் அடக்கம் செய்தனர்.

மேலும் லெட்சுமியின் உடலில் இருந்து மாதிரிகள் எடுக்கப்பட்டு ஆய்வுக்கு அனுப்பப்பட்டுள்ளது. இந்த பரிசோதனையின் முடிவுகள் கிடைக்கப்பெற்றதும், கண்காணிப்பு கேமராவில் பதிவாகியுள்ளவர்களை, சந்தேகத்தின் பேரில் கைது செய்து விசாரணை மேற்கொள்ளப்படும் என்று போலீசார் தெரிவித்தனர். இந்த சம்பவம் அந்தப்பகுதியில் பெரும் பரபரப்பை ஏற்படுத்தி உள்ளது.