காஞ்சிபுரம்

காஞ்சிபுரம்:

காஞ்சிபுரம் கலெக்டர் அலுவலகம் அருகே உள்ள வடிவேல் நகர் பகுதியைச் சேர்ந்தவர் பச்சையப்பன் (47). இவர் சென்னையில் உள்ள ஓட்டல் ஒன்றில் வேலை பார்த்து வருகிறார். விடுமுறையில் காஞ்சிபுரம் வந்த அவர் தனது இரு சக்கர வாகனத்தில் நண்பர் வீட்டிற்கு சென்றுவிட்டு செவிலிமேடு பாலாற்று பாலத்தில் வந்து கொண்டிருந்தார். அப்போது காஞ்சிபுரத்தில் இருந்து வந்தவாசி நோக்கி சென்ற லாரி திடீரென மோட்டார் சைக்கிள் மீது மோதியது. இதில் பச்சையப்பன் சம்பவ இடத்திலேயே பலியானார்.

தகவலறிந்த காஞ்சிபுரம் தாலுகா இன்ஸ்பெக்டர் அண்ணாதுரை பச்சையப்பன் உடலை கைப்பற்றி பரிசோதனைக்காக காஞ்சிபுரம் அரசு ஆஸ்பத்திரிக்கு அனுப்பி வைத்தார். தலைமறைவான லாரி டிரைவரை போலீசார் தீவிரமாக தேடி வருகின்றனர்.

ஆலந்தூர்:

சென்னையில் நேற்று நள்ளிரவில் இடி-மின்னலுடன் பலத்த மழை கொட்டியது. இன்று காலை வரை விடிய, விடிய மழை பெய்ததால் சென்னை விமான நிலைய ஓடுபாதையில் மழைநீர் தேங்கியது.

இதனால் வெளிநாட்டு, உள்நாட்டு விமானங்கள் நேற்று இரவு தரை இறங்குவதில் பாதிப்பு ஏற்பட்டது. மலேசியாவின் கோலாலம்பூரில் இருந்து வந்த மலேசியா ஏர்லைன்ஸ், ஜெர்மனியின் பிராங்பர்ட் விமானம், டெல்லியில் இருந்து வந்த ஏர்இந்தியா விமானம் ஆகிய 3 விமானங்கள் வானிலை சரியில்லாத காரணத்தால் பெங்களூருக்கு திருப்பி விடப்பட்டன.

இந்த 3 விமானங்களும் வானிலை சீரடைந்த பிறகு இன்று காலை சென்னை விமான நிலைணுயத்தில் தரை இறங்கியது. இதனால் பயணிகள் கடும் அவதி அடைந்தனர்.

வானிலை மோசம் காரணமாக வெளிநாட்டு, உள்நாட்டு விமானங்கள் புறப்படுவதில் தாமதம் ஏற்பட்டது. குவைத், சிங்கப்பூர், மலேசியா, இலங்கை ஆகிய விமானங்கள் தாமதமாக புறப்பட்டன. இதே போல் உள்நாட்டு விமானங்கள் புறப்படுவதிலும் தாமதம் ஏற்பட்டதால் பயணிகள் கடும் அவதி அடைந்தனர். அவர்கள் விமான நிலையத்திலேயே காத்துகிடந்தனர்.

டெல்லிக்கு காலை 6.30 மணிக்கு செல்ல வேண்டிய ஏர்இந்தியா விமானம் 10.30 மணிக்கு புறப்படும் என்றும், காலை 6.40 மணிக்கு புறப்பட வேண்டிய ஜெட்ஏர்வேஸ் விமானம் காலை 9.30 மணிக்கு புறப்படும் என்றும் அறிவிக்கப்பட்டது. வானிலை மோசம் காரணமாக சுமார் 20 விமானங்கள் 6 மணி நேரம் தாமதமாக புறப்பட்டு சென்றன.

ஆலத்தூர் துணை மின் நிலையத்தில் நாளை (திங்கட்கிழமை) மாதாந்திர பராமரிப்பு பணிகள் நடை பெற உள்ளது. எனவே ஆலத்தூர் துணை மின்நிலையத்திலிருந்து மின்சப்ளை பெறும் ஆலத்தூர், ஆலத்தூர் சிட்கோ, தண்டலம், கருங் குழிப்பள்ளம், பண்டிதமேடு, பையனூர், கூத்தவாக்கம், சாவடி, பூஞ்சேரி, கடம்பாடி, வடகடம்பாடி, கோவளம், திருவிடந்தை, தெற்குப்பட்டு, வடநெம்மேலி,

பட்டிபுலம், பெரியநெம்மேலி, சூளேரிக்காடு, கிருஷ்ணன்காரணை, இளந்தோப்பு, சாலவான் குப்பம், தேவனேரி, மாமல்லபுரம், உள்ளிட்ட கிராமங்களில் காலை 9 மணி முதல் பிற்பகல் 2 மணி வரை மின்சப்ளை இருக்காது இந்த தகவலை செயற்பொறியாளர் மாலதி தெரிவித்துள்ளார்.

தாம்பரம்:

தாம்பரம் அடுத்த பெருங்களத்தூர் சூரத்தம்மன் கோவில் தெருவை சேர்ந்தவர் மேரி. இவர் நேற்று இரவு கடைக்கு சென்று விட்டு வீட்டுக்கு நடந்து சென்ற போது மோட்டார் சைக்கிளில் வந்த போது 2 பேர் 7 பவுன் தங்க செயினை பறித்து கொண்டு தப்பி விட்டனர்.

இதேபோல நேற்று இரவு சேலையூர் அடுத்த மாடம் பாக்கம் மாருதி நகரை சேர்ந்த கவிதா மார்க்கெட்டுக்கு சென்று விட்டு வீடு திரும்பிய போது 2 மர்ம நபர்கள் 5 பவுன் நகையை பறித்து விட்டு மோட்டார் சைக்கிளில் தப்பி விட்டான்.

தாம்பரம் ரெங்கநாத புரத்தில் ஒரு பெண்ணிடம் நகையை பறித்துவிட்டு ஒடிவிட்டனர். இந்த 3 சம்பவத்திலும் ஈடுபட்டது ஒரே கும்பலாக இருக்கலாம் என்று போலீசார் சந்தேகிக்கிறார்கள்.

வேளச்சேரி:

கோவில்பட்டியை சேர்ந்தவர் ரவிசங்கர் மகன் முத்துக்குமார். வேளச்சேரி விஜயநகர் பஸ்நிலையம் அருகே உள்ள கால்சென்டரில் வேலை பார்த்து வந்தார்.

நேற்று நள்ளிரவு வேலை முடித்து மோட்டார் சைக்கிளில் தான் தங்கியிருந்த அறைக்கு சென்றார்.

வேளச்சேரி போலீஸ் நிலையம் அருகே ஒரு திருப்பத்தில் திரும்பும் போது பைக்கில் இருந்து தவறி விழுந்தார். இதில் தலையில் பலத்த காயம் அடைந்து சம்பவம் இடத்திலேயே இறந்தார்.

இதுகுறித்து கிண்டி போக்குவரத்து போலீசார் வழக்கு பதிவு செய்தார்.

முத்துக்குமார் உடலை மீட்டு பிரேத பரிசோதனை செய்ய ராயப்பேட்டை அரசு ஆஸ்பத்திரிக்கு அனுப்பி வைத்தார்கள்.

காஞ்சிபுரம்:

கடந்த சில வாரங்களாக கடும் வெயிலின் தாக்கத்தால் காஞ்சிபுரம் மக்கள் தவித்து வந்து நிலையில் கடந்த இரு நாட்களாக வெய்யிலின் தாக்கம் மிகவும் குறைந்ததால் மக்கள் மகிழ்ச்சி அடைந்தனர்.

இந்நிலையில் நேற்று மாலை முதல் 5 மணிக்கு ஆரம்பித்த மழை ஏறத்தாழ 7 மணிவரை இரண்டு மணி நேரம் கொட்டி தீர்த்தது. நகரின் முக்கிய சாலையான காந்திரோடு, காமராஜர் வீதி, மூங்கில் மண்டபம், பஸ்நிலையம், சங்கரமடம் உள்ளிட்ட நகரின் பல்வேறு பகுதிகளிலும் மழை நீர் பெருக்கெடுத்து ஓடியது. தாழ்வான சாலைபகுதிகளாக மேட்டுத்தெரு, ஓரிக்கை ஆகிய பகுதிகளில் மழைநீர் வெள்ளம் போல் தேங்கி நின்றதால் வாகன ஓட்டிகள் கடும் அவதிக்குள்ளாகினர்.

இடி, மின்னல் மற்றும் சூறைகாற்றுடன் மழை பெய்ததால் நகரின் சில பகுதிகளில் சாலைகளில் மரங்கள் ஒடிந்து விழுந்தன. தீயணைப்பு துறையினரும் காவல் துறையினரும் துரிதமாக செயல்பட்டு இடர்பாடுகளை அகற்றி போக்குவரத்தினை சீர் செய்தனர்.

மழை காரணமாக இரவு ஏறத்தாழ மூன்று மணி நேரம் மின்சாரம் துண்டிக்கப்பட்டதால் நகரின் முக்கிய பகுதிகள் இருளில் மூழ்கின. கடும் வெய்யிலில் அவதிப்பட்ட காஞ்சிபுரம் மக்களுக்கு நேற்று பெய்த மழை மக்களுக்கு பெரும் மகிழ்ச்சியை ஏற்படுத்தியது.

மதுராந்தகம்:

நாகை மாவட்டம் தரங்கம்பாடி தாலுகா சங்கரப் பந்தல் கிராமத்தை சேர்ந்தவர் ஆசிக்அலி (வயது 45) துபாயில் டிரைவராக வேலை பார்த்து வந்தார். இவர் விடுமுறைக்கு சொந்த ஊருக்கு வந்திருந்தார்.

மீண்டும் துபாய்க்கு செல்வதற்காக நேற்று வீட்டில் இருந்து கார் மூலம் புறப்பட்டு சென்னை விமான நிலையம் வந்து கொண்டிருந்தார்.

காரை அவரது உறவினர் முகமது அஸ்ரப்அலி ஓட்டினார். காரில் உறவினர்கள் சுல்தான் ஆரிப், ஜாகீர்உசேன் ஆகியோர் இருந்தனர்.

இரவு 7 மணியளவில் மேல் மருவத்தூர் அருகே கார் வந்து கொண்டிருந்தது. அப்போது சென்னையில் இருந்து அரசு பஸ் திருச்சிக்கு சென்று கொண்டிருந்தது. அந்த பஸ் திடீரென்று தறிகெட்டு ஓடியது. சாலை நடுவில் உள்ள தடுப்புச் சுவரை இடித்துக் கொண்டு மறுபுறம் சென்று எதிரே வந்த கார் மீது மோதியது. இதில் கார் நொறுங்கியது.

இந்த விபத்தில் காரை ஓட்டிய முகமது அஸ்ரப் அலி சம்பவ இடத்திலேயே பலியானார். படுகாயம் அடைந்த மற்ற 3 பேரும் செங்கல்பட்டு அரசு ஆஸ்பத்திரிக்கு கொண்டு செல்லப்பட்டனர். ஆனால் செல்லும் வழியிலேயே ஆசிக்அலி இறந்தார். சுல்தான் ஆரிப், காசீர்உசேன் ஆகிய இருவரும் செங்கல்பட்டு அரசு ஆஸ்பத்திரியில் முதலுதவி சிகிச்சை அளிக்கப்பட்டது.

பின்னர் மேல் சிகிச்சைக்காக புதுச்சேரி ஜிப்மர் மருத்துவ மனைக்கு அனுப்பி வைக்கப்பட்டார்கள். அங்கு அவர்களுக்கு தீவிர சிகிச்சை அளிக்கப்படுகிறது. இது தொடர்பாக மேல்மருவத்தூர் போலீஸ்சார் வழக்கு பதிவு செய்து சென்று விசாரணை நடத்தி வருகிறார்கள்.