காஞ்சிபுரம்

காஞ்சிபுரம்:

காஞ்சிபுரத்தை அடுத்த பாலுச்செட்டிசத்திரம் தாமல் அருகே உள்ள தைப்பாக்கம் கிராமத்தில் பெரியபாளையத்தம்மன் கோயில் உள்ளது.

இங்கு ஆடி மாதம் ஞாயிற்றுக்கிழமையை முன்னிட்டு அப்பகுதியில் உள்ள ஒருவர் கிராம மக்களுக்கு கூழ் ஊற்றினார்.

இதில் கூழ் குடித்த ஏராளமானோருக்கு உடல்நிலை பாதிக்கப்பட்டது. சிலருக்கு வாந்தி-மயக்கம் ஏற்பட்டது.

இன்று காலை உடல்நிலை மிகவும் பாதிக்கப்பட்ட யமுனா, கவிதா, முனியம்மாள், கிருஷ்ணவேணி, சிவகாமி, ரேவதி, அம்மு உள்ளிட்ட 28 பேர் காஞ்சிபுரம் அரசு ஆஸ்பத்திரியில் அனுமதிக்கப்பட்டனர். அவர்களுக்கு சிகிச்சை அளிக்கப்படுகிறது.

இதுபற்றி அறிந்ததும் சுகாதாரத்துறையினர் உடனடியாக மருத்துவக் குழுவினரை கிராமத்திற்கு அனுப்பி சிகிச்சை அளித்தனர்.

இது குறித்து அரசு மருத்துவர்கள் கூறும்போது, கூழினால் ஏற்பட்ட ஒவ்வாமை மற்றும் புட் பாய்சன் காரணமாக பாதிப்பு ஏற்பட்டிருக்கலாம். பாதிக்கப்பட்டவர்களை பரிசோதனை செய்த பின்னர்தான் அது குறித்து தெரிய வரும் எனக் கூறினர்.

கூழ் குடித்து பாதிக்கப்பட்ட இன்னும் பலர் தொடர்ந்து சிகிச்சை பெற்று வருகிறார்கள். இதனால் ஆஸ்பத்திரி வளாகத்தில் பெரும் பரபரப்பு நிலவிவருகிறது.

மாமல்லபுரம்:

மாமல்லபுரம் கடற்கரையில் சிற்பங்கள் மற்றும் குடவரை கோவில்களின் பின்னனியில் தத்ரூப மாக போட்டோ மற்றும் வீடியோ எடுப்பதற்காக புதுமணத் தம்பதியர் பலர் சென்னை, பெங்களுர், கேரளா,ஆந்திரா, போன்ற பல பகுதிகளில் இருந்து கேமராமேன்களுடன் மாமல்லபுரம் வந்து தங்குகிறார்கள்.

இவர்கள் எடுக்கும் காட்சிகளுக்கு சன்ரைஸ் ஷாட், ரியல் ஷாட், கேன்டிட் ஷாட் என பல பெயர்கள் வைத்துள்ளனர். இந்த படப்பிடிப்பின் போது எல்லை மீறி ஆபாசமாகவும், நெருக்கமாகவும் படம் பிடிக்கப்படுவதாக தெரிகிறது.

இதனால் கேளி, கிண்டல், ஆபாச பேச்சு போன்ற செயல்களால் சட்டம் ஒழுங்கு பிரச்சினை ஏற்பட்டு சில நேரங்களில் அடிதடியாகவும் மாறுகிறது. இது விசாரணைக்கு வரும் போது அனைவரும் பெரிய இடத்து நபர்களாகவும், புதுமணத் தம்பதியராகவும் உள்ளனர்.

இது குறித்து மாமல்லபுரம் டி.எஸ்.பி சேகர் கூறும் போது, “சாதாரண உடையில் ஆண்,பெண் போலீசார் சுற்றுலா பயணிகள் அதிகமாக கூடும் கடற்கரை, மற்றும் புராதன சின்னங்கள் பகுதியை கண்காணித்து வருகிறார்கள்.

அப்போது எல்லை மீறி ஆபாசமாக படம் பிடிப்போரை காவல் நிலையம் அழைத்து வந்து விசாரித்து வருகிறோம். அவர்கள் உண்மையிலேயே தம்பதியர்களாக இருந்தால் பெற்றோரிடம் போனில் பேசவைத்து அவர்களுடன் சேர்ந்து வரும்படி அறிவுறுத்தி அனுப்புகிறோம்.

அதேநேரம் குறும்படம், டாக்குமென்டரி எடுக்கும் கல்லூரி மாணவர்கள் என தெரிய வந்தால் முதல் தடவை எச்சரிக்கையும் பின்னர் சட்டப்படி கடும் நடவடிக்கையும் எடுக்கப்படும்” என்றார்.

காஞ்சிபுரம்:

ஆந்திர மாநிலம் கடப்பாவைச் சேர்ந்தவர் துளசிதர். இவர் தனது நண்பர் சுகுமாருடன் மோட்டார் சைக்கிளில் காஞ்சிபுரத்தில் உள்ள கோவில்களில் தரிசனம் செய்ய வந்தார்.

காஞ்சிபுரம் எல்லையான கீழ்அம்பி என்ற இடத்தில் உள்ள ஒரு வளைவில் திரும்பியபோது எதிரே சென்னையில் இருந்து பெங்களூர் சென்ற கார் மோட்டார்சைக்கிள் மீது மோதியது.

இதில் இருவரும் தூக்கி வீசப்பட்டனர். படுகாயம் அடைந்த துளசிதர் சம்பவ இடத்திலேயே பரிதாபமாக இறந்தார். அக்கம் பக்கத்தினர் சுகுமாரை மீட்டு ஆஸ்பத்திரியில் சேர்த்தனர்.

இதுகுறித்து போலீசார் வழக்குப்பதிவு செய்து விசாரிக்கிறார்கள்.

திருவான்மியூர்:

பெருங்குடியை அடுத்த கந்தன்சாவடி சோழன் நகர், திரு.வி.க. தெருவில் வசித்து வந்தவர் சத்யா (வயது27). எலக்ட்ரீசன். இவருடன் அவருடைய தம்பிகள் சரவணன், முகுந்தன் ஆகியோரும் தங்கி வேலை பார்த்து வந்தனர். இவர்கள் சொந்த ஊர் அம்பாசமுத்திரம் ஆகும்.

கடந்த 4-ந்தேதி சரவணனை அதே பகுதியைச் சேர்ந்த வெங்கடேசன் மற்றும் சிலர் கேலி - கிண் டல் செய்தனர். இதனை சத்யா கண்டித்தார்.

இதில் அவர்களுக்கு இடையே மோதல் ஏற்பட்டு ஒருவரை ஒருவர் தாக்கிக் கொண்டனர். பின்னர் அவர்கள் அங்கிருந்து சென்று விட்டனர்.

இதுபற்றி அறிந்ததும் வெங்கடேசனுக்கு ஆதரவாக 10-க்கும் மேற்பட்ட வாலிபர்கள் நள்ளிரவில் அங்கு வந்தனர். அவர்கள் வீட்டில் இருந்த சத்யா, சரவணனை வெளியே இழுத்து வந்து சரமாரியாக உருட்டு கட்டையால் தாக்கினர்.

இதனை பார்த்து அதிர்ச்சி அடைந்த முகுந்தன் அங்கிருந்து தப்பி ஓட்டம் பிடித்தார்.

தாக்குதலில் பலத்த காயம் அடைந்த சத்யாவும், சரவணனும் ரத்த வெள்ளத்தில் மயங்கினர். உடனே மர்ம கும்பல் அங்கிருந்து தப்பி ஓடி விட்டனர்.

அக்கம் பக்கத்தினர் உயிருக்கு போராடிய 2 பேரையும் மீட்டு ராயப்பேட்டை அரசு ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி நேற்று இரவு சத்யா பரிதாபமாக இறந்தார். தொடர்ந்து சரவணனுக்கு தீவிர சிகிச்சை அளிக்கப்படுகிறது.

இதையடுத்து துரைப்பாக்கம் போலீசார் கொலை வழக்கு பதிவு செய்து விசாரணை நடத்தினர். இந்த கொலை தொடர்பாக கந்தன்சாவடியை சேர்ந்த வெங்கடேசன், சிவக்குமார், கோபாலகிருஷ்ணன், சூர்யா, விஸ்வநாதன் ஆகிய 5 பேரை கைது செய்தனர்.

மேலும் தலைமறைவான அதே பகுதியைச் சேர்ந்த பிரதாப், ராமுவை தேடி வருகிறார்கள். தம்பியை கிண்டல் செய்ததை தட்டிக் கேட்ட அண்ணன் அடித்து கொலை செய்யப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.

திருவான்மியூர்:

துரைப்பாக்கம் மேட்டு குப்பத்தை சேர்ந்தவர் குமரேசன். இவரது மகன் பிரசாத் (9) இவன் அங்குள்ள அரசு பள்ளியில் 5-ம் வகுப்பு படித்து வந்தான்.

நேற்று மாலை வீட்டின் அருகே உள்ள கடையில் தண்ணீர் கேனை எடுக்க  நடந்து சென்றான். அப்போது கால் தவறி சாலையில் இருந்த கல் மீது விழுந்தான்.

இதில் அவனுக்கு தலையில் பலத்த அடிபட்டது. உடனே அவனை மீட்டு சிகிச்கைக்காக அங்குள்ள தனியார் மருத்துவ மனையில் சேர்த்தனர். அங்கு சிகிச்சை பலன் இன்றி இறந்தான்.

இதுகுறித்து துரைப்பாக்கம் போலீசார் விசாரித்து வருகிறார்கள்.

செங்கல்பட்டு:

வாணியம்பாடி அடுத்த பில்லூரில் பாலற்றின் குறுக்கே ஆந்திர அரசு தடுப்பணையை கட்டி உள்ளது. இதற்கு தமிழக அரசியல் கட்சிகள் கண்டனம் தெரிவித்துள்ளன.

இந்த நிலையில் தமிழ்தேச மக்கள் கட்சி, த.மு.மு.க. ஆகியவை இணைந்து செங்கல்பட்டு அருகே பாலூரில் உள்ள மத்திய அரசின் ரெயில் குடிநீர் சுத்திகரிப்பு தொழிற்சாலை முன்பு ஆர்ப்பாட்டத்தில் ஈடுபட்டனர்.

பாலாற்றில் தடுப்பணை கட்டிய ஆந்திர அரசை கண்டித்தும். இதில் தலையிடாமல் உள்ள மத்திய அரசை கண்டித்தும் இந்த முற்றுகை போராட்டத்தில் ஈடுபட்டனர். மேலும் பாலாற்று படுகையில் உள்ள இந்த தொழிற்சாலையால் சுற்று வட்டார கிராமங்களில் குடிநீர் தட்டுப்பாடு ஏற்படு வதாகவும் குற்றச்சாட்டு கூறினர்.

தகவல் அறிந்த போலீசார் ஆர்ப்பாட்டத்தில் ஈடு பட்ட 33 பேரை கைது செய்தனர். அவர்கள் ஒரு திருமண மண்டபத்தில் தங்க வைக்கப்பட்டுள்ளனர்.

ஆலந்தூர்:

மத்திய மந்திரி பொன்ராதாகிருஷ்ணன் டெல்லியில் இருந்து நேற்று இரவு 11.30 மணிக்கு விமானம் மூலம் சென்னை வந்தார்.

விமான நிலையத்தில் அவர் நிருபர்களிடம் கூறியதாவது:-

தமிழக மீனவர்கள் பிரச்சினையில் புதிய முன்னேற்றம் ஏற்பட்டுள்ளது. கடந்த வாரம் டெல்லியில் தமிழகத்தை சேர்ந்த அனைத்து மீனவர் சங்க பிரதிநிதிகளுடன் வெளியுறவுத்துறை மந்திரி சுஷ்மா சுவராஜ் பேச்சு வார்த்தை நடத்தினார். இந்த பேச்சு வார்த்தை திருப்தியாக அமைந்தது.

சில தினங்களுக்கு முன்பு நான் சுஷ்மா சுவராஜை சந்தித்து பேசினேன். அப்போது அவர் தமிழக மீனவர்கள் பிரச்சினையில் நிரந்தர தீர்வுகளை காண எல்லா நடவடிக்கைகளையும் எடுத்து வருவதாக தெரிவித்தார்.

அடுத்த கட்டமாக தமிழக- இலங்கை மீனவர்களை ஒன்றாக வைத்து பேச்சு வார்த்தை நடத்த நடவடிக்கை மேற்கொள்ளப்பட்டு வருகிறது.

இந்த மாத இறுதியில் தமிழக-இலங்கை மீனவர்களின் பிரதிநிதிகள் டெல்லியில் ஒன்றாக சந்தித்து பேச வாய்ப்பு உள்ளது. இதன் மூலம் பல ஆண்டு காலமாக உள்ள தமிழக மீனவர்கள் பிரச்சினைக்கு தீர்வு காணப்படும்.

ஆந்திராவுக்கு சென்ற 32 தமிழர்கள் கைது செய்யப்பட்டுள்ளனர். சட்டத்துக்கு புறம்பான முறையில் மரம் வெட்ட செல்பவர்களை கைது செய்வதில் தவறில்லை. ஆனால் கோவிலுக்கு சென்றவர்களை கைது செய்தது தவறு. தமிழர்களை கைது செய்யும் போது அவர்கள் என்ன காரணத்துக்காக கைது செய்யப்பட்டுள்ளனர் என்பதையும் அவர்களின் பெயர் மற்றும் முகவரியையும் தமிழக அரசுக்கு தெரியப்படுத்த வேண்டும். இவ்வாறு செய்தால்தான் இரு மாநிலங்களிடையே பரஸ்பர முறையில் நல்லுணர்வு ஏற்படும்.

இவ்வாறு அவர் கூறினார்.

ஸ்ரீபெரும்புதூர்:

வாலாஜாபாத்தை அடுத்த புலியம்பாக்கத்தை சேர்ந்தவர் தேவராஜ் (வயது 50). சொந்தமாக லாரி வைத்து ஓட்டி வந்தார்.

இவர் படப்பையை அடுத்த ஆரம்பாக்கத்தில் உள்ள தனியார் தொழிற்சாலையில் கண்ணாடி லோடு ஏற்றுவது வழக்கம். நேற்று இரவு கம்பெனிக்கு லோடு ஏற்ற தேவராஜ் லாரியை ஓட்டி சென்றார். இன்று அதிகாலை பொருட்கள் ஏற்ற இருந்ததால் கம்பெனி அருகே லாரியை நிறுத்தி விட்டு அதிலேயே தேவராஜ் தூங்கினார்.

இந்த நிலையில் லாரி திடீரென தீப்பற்றி எரிந்தது. தகவல் அறிந்ததும் தாம்பரம் தீயணைப்பு வீரர்கள் விரைந்து வந்து தீயை அணைத்தனர்.

அப்போது லாரிக்குள் தேவராஜ் கரிக்கட்டையாக இறந்து கிடப்பது தெரிந்தது. லாரியில் தீப்பிடித்த போது வெளியே வரமுடியாமல் அவர் தீயில் சிக்கி இறந்து இருப்பது தெரியவந்தது.

லாரியில் தீப்பிடித்தது எப்படி? நாசவேலை காரணமா? என்பது குறித்து மணிமங்கலம் இன்ஸ்பெக்டர் குமார் விசாரணை நடத்தி வருகிறார்.