ஈரோடு

ஈரோடு:

மேட்டூர் அணையில் இருந்து காவிரி ஆற்றில் திறந்து விடப்பட்ட தண்ணீர் ஈரோடு மாவட்டத்தின் எல்லை பகுதியான நெரிஞ்சி பேட்டை மற்றும் அம்மா பேட்டை வழியாக பவானி கூடுதுறைக்கு வந்து இன்று காலை ஈரோட்டுக்கு வந்தது.

புது ரத்தம் பாய்ச்சியது போல் ஈரோடு காவிரி ஆற்றில் தண்ணீர் பாய்ந்து சென்று கொண்டிருக்கிறது.

வெறும் பாறைகளாக தெரிந்து ஈரோடு காவிரி ஆற்றில் தண்ணீர் அதிகமாக தற்போது வருவதால் பொதுமக்கள் ஆவலுடன் காவிரி ஆற்றுக்கு சென்று பாய்ந்து செல்லும் தண்ணீரை பார்த்தனர்.

கவுந்தப்பாடி:

ஈரோடு மாவட்டம் அய்யம்பாளையம் போஸ்ட் ஆபிஸ் அருகே வசிப்பவர் முருகன் இவரது மனைவி விஜயா. இவர்களது மகன் ரஞ்சித் (வயது 22) கட்டிட மேஸ்திரியாக பணிபுரிந்து வந்தார்.

ரஞ்சித் இன்று காலை தனது மோட்டார் சைக்கிளில் டீ குடிப்பதற்காக கோபி ரோட்டில் உள்ள ஒரு டீ கடைக்கு வந்தார்.

பிறகு டீ குடித்து விட்டு மீண்டும் மோட்டார் சைக்கிளில் தனது வீட்டுக்கு திரும்பி சென்று கொண்டிருந்தார். கவுந்தப்பாடி நெசவாளர் கூட்டுறவு சங்கம் அருகே காலை 7.50மணிக்கு சென்று கொண்டிருந்தபோது எதிரே மணல் அள்ளிக் கொண்டு ஒரு டிப்பர் லாரி வந்து கொண்டிருந்தது.

அப்போது எதிர்பாராத விதமாக இரு வாகனங்களும் நேருக்கு நேர் மோதிக் கொண்டன. இதில் தூக்கி வீசப்பட்டு உடல் நசுங்கி ரத்த வெள்ளத்தில் சம்பவ இடத்திலேயே ரஞ்சித் பரிதாபமாக இறந்தார்.

இந்த விபத்து பற்றிய தகவல் கிடைத்ததும் சம்பவ இடத்துக்கு கவுந்தப்பாடி போலீசார் விரைந்து வந்தனர். போக்குவரத்தை ஒழுங்குபடுத்தினர். ரோட்டில் பிணமாக கிடந்த ரஞ்சித் உடலை பார்த்து அவரது பெற்றோரும், உறவினர்களும் கதறி அழுத காட்சி உருக்கமாக இருந்தது. இந்த விபத்து கவுந்தப்பாடியில் இன்று பெரும் சோகத்தை ஏற்படுத்தி உள்ளது.

விபத்து குறித்து கவுந்தப்பாடி போலீஸ் இன்ஸ்பெக்டர் அருள் வழக்கு பதிவு செய்து விசாரணை நடத்தி வருகிறார்.

மொடக்குறிச்சி,

மொடக்குறிச்சி சுற்று வட்டார பகுதிகளை சேர்ந்த விவசாயிகள் 2ஆயிரத்து 17 மூட்டைகளில் 94 ஆயிரத்து 735 கிலோ எடையுள்ள கொப்பரை விற்பனைக்கு கொண்டு வந்திருந்தனர்.

இதில் முதல் தர கொப்பரை அதிகபட்ச விலையாக கிலோ ஒன்றுக்கு ரூ.53.25–க்கும், குறைந்தபட்ச விலை ரூ.50.05–க்கும், இரண்டாம் தர கொப்பரை அதிகபட்ச விலை கிலோ ஒன்றுக்கு ரூ.52.05–க்கும் குறைந்த பட்ச விலை ரூ.39.60–க்கும் என மொத்தம் ரூ.45 லட்சத்து 84 ஆயிரத்துக்கு ஏலம் நடைபெற்றது.

இதே போல் 13 ஆறாயிரத்து 642 கிலோ எடையுள்ள 33 ஆயிரத்து 811 தேங்காய்கள் விற்பனைக்கு கொண்டு வந்திருந்தனர்.

இதில் அதிக விலை டன் ஒன்றுக்கு ரூ.14 ஆயிரத்து 9, குறைந்த விலை டன் ஒன்றுக்கு ரூ.10 ஆயிரத்து 519 என ரூ.1 லட்சத்து 79 ஆயிரத்துக்கு ஏலம் நடைபெற்றது.

ஈரோடு:

ஈரோடு, காளிங்கராயன் பாளையம், மணக்காட்டூர் பகுதியை சேர்ந்தவர் லட்சுமி(42).

இவருக்கும் இவரது கணவர் ராம்குமாருக்கும் குடும்ப பிரச்சனை ஏற்பட்டு கடந்த 8 வருடமாக பிரிந்து வாழ்ந்து வருகிறார்கள். இவர்களுக்கு பைரவி என்ற மகளும் உள்ளார்.

இந்நிலையில் சம்பவத்தன்று லட்சுமி வீட்டில் இருந்தார். அப்போது கணவர் ராம்குமாரின் உறவினரும், அவரது மனைவியும் லட்சுமி வீட்டிற்கு வந்தனர்.

அப்போது அவர்களுக்குள் வாக்கு வாதம் ஏற்பட்டுள்ளதாக கூறப்படுகிறது. இதில் ஆத்திரம் அடைந்த உறவினரும், அவரது மனைவியும் சேர்ந்து லட்சுமியை கீழே தள்ளி காலால் எட்டி உதைத்தும் தாக்கினார்களாம்.

லட்சுமியின் அலறல் சத்தம் கேட்டு அருகில் இருந்தவர்கள் ஓடி வந்தனர். ஆனால் அதற்குள் அவர்கள் இரண்டு பேரும் தப்பி ஓடிவிட்டனர்.

இது குறித்து சித்தோடு போலீசார் வழக்கு பதிவு செய்து விசாரணை நடத்தி வருகிறார்கள்.

ஈரோடு:

ஈரோடு பவானி ரோடு வ.உ.சி. பூங்கா ஆஞ்சநேயர் கோவில் அருகே அம்மா உணவகம் செயல்பட்டு வருகிறது.

இன்று காலை 7 மணி முதல் பொதுமக்கள், பெண்கள் மற்றும் தொழிலாளர் என பலர் இட்லி வாங்கி சாப்பிட்டனர். பரபரப்பாக இருந்த அம்மா உணவகத்துக்கு காலை 9 மணியளவில் 50 வயது மதிக்கத்தக்க ஒருவர் குடிபோதையில் வந்தார்.

யாரும் எதிர்பார்க்காத வகையில் குடிபோதையில் வந்தவர் அம்மா உணவகத்தின் கண்ணாடிகளை அடித்து நொறுக்கினார்.

பிறகு அங்குள்ள டேபிள் சேர் மற்றும் பொருட்களையும் துவம்சம் செய்தார். அப்போது அங்கு சாப்பிட வந்தவர்களை அவர் நொறுங்கி கண்ணாடியை எடுத்து மிரட்டி கொண்டே குத்த வந்தார். இதனால் அவர்கள் அலறி அடித்து ஓடினர். அம்மா உணவக ஊழியர்களையும் கண்ணாடியை கொண்டு குத்த வந்தார். செய்வதறியாமல் திகைத்த ஊழியர்கள் முன் பக்க கதவை மூடி விட்டு அலறி அடித்து பின் பக்க வாசல் வழியாக தப்பி ஓடினர்.

கண்ணாடிகள் உடைக்கப்பட்டதால் அதன் தூள்கள் சிதறி கிடந்தன. இதில் குடிபோதையில் இருந்தவருக்கு ரத்த காயம் ஏற்பட்டது. இதனால் அந்த பகுதி முழுவதும் ரத்தம் படிந்திருந்தது. மேலும் அவர் அங்குள்ளவர்களை மிரட்டி கொண்டிருந்தார். அப்போது பொதுமக்கள் அவரை மடக்கி பிடித்தனர். இது குறித்து அம்மா உணவக ஊழியர்கள் வீரப்பன் சத்திரம் போலீசாருக்கு தகவல் கொடுத்தனர்.

அந்த ஆசாமியை போலீசார் விரைந்து வந்து பிடித்து ஈரோடு அரசு ஆஸ் பத்திரியில் சிகிச்சைக்காக சேர்த்தனர். விசாரணையில் அவரது பெயர் மூர்த்தி என்று தெரிய வந்தது. மேலும் அவரை பற்றி போலீசார் தொடர்ந்து விசாரணை நடத்தி வருகிறார்கள்.

ஈரோடு:

ஈரோடு மாவட்டம் கவுந்தப்பாடி கிருஷ்ணபுரம் காலனியை சேர்ந்த மாணவி தீபா (வயது 17) தந்தை பெயர் சுப்பிரமணி, தாயார் பூங்கொடி.

இருவரும் விவசாய கூலி வேலை பார்த்து குடும்பத்தை காப்பாற்றி வருகிறார்கள். இவர்களின் மகளான தீபா கவுந்தப்பாடி அரசு பெண்கள் மேல்நிலைப்பள்ளியில் பிளஸ்–2 படித்து 1153 மதிப்பெண்கள் வாங்கி சாதனை படைத்தார். பள்ளியிலேயே முதல் மார்க் வாங்கி தான் படித்த அரசு பள்ளிக்கு பெருமை சேர்த்தார்.

பள்ளியில் முதலிடம் பிடித்த மாணவி தீபாவின் லட்சியம் தான் டாக்டருக்கு படித்து தன்னைப்போல் கஷ்டப்படும் ஏழைகளுக்கு மருத்துவ சேவை செய்ய வேண்டும் என்பது தான்.

மாணவியின் எண்ணத்துக்கேற்ப தஞ்சை அரசு மருத்துவ கல்லூரியில் படிக்க மாணவிக்கு இடம் கிடைத்தது. ஆனால் கல்லூரியில் சேர்ந்து படிக்க வேண்டிய போதிய வசதி இல்லை.

இந்த நிலையில் ஈரோடு மாவட்ட கலெக்டர் அலுவலகத்தில் இன்று நடந்த மக்கள் குறை தீர்க்கும் கூட்டத்தில் கலந்து கொண்ட மாணவி தீபா குறைகள் கேட்டு மனுக்கள் வாங்கிய மாவட்ட வருவாய் அலுவலர் சதீசிடம் கோரிக்கை மனு கொடுத்தார்.

அதில் அவர் கூறியிருப்பதாவது:–

நான் கவுந்தப்பாடி அரசு மேல்நிலைப்பள்ளியில் பிளஸ்–2 படித்து 1153 மதிப்பெண்கள் எடுத்துள்ளேன். எனக்கு தஞ்சை அரசு மருத்துவ கல்லூரியில் சேர்ந்து படிக்க இடம் கிடைத்துள்ளது. ஆனால் படிக்க தேவையான பணம் என்னிடம் இல்லை. லட்சக்கணக்கில் பணம் தேவைப்படும் என்கிறார்கள். என் பெற்றோர் கூலி வேலை செய்து குடும்பத்தை காப்பாற்றுகிறார்கள்.

இதனால் மருத்துவ கல்லூரியில் இடம் கிடைத்தும் பணம் இல்லாததால் படிக்க முடியாமல் போய் விடுமோ... என்ற கவலையில் உள்ளேன். இதனால் எனக்கு நிதி உதவி அளித்து உதவுமாறு கேட்டுக் கொள்கிறேன்.

இவ்வாறு மனுவில் மாணவி தீபா கூறி உள்ளார்.