கடலூர்

கடலூர்:

கடலூர் புதுப்பாளையம் மணலி எஸ்டேட் பகுதியைச் சேர்ந்தவர் பன்னீர் செல்வம். இவரது மகள் சரண்யா (வயது 20). இவர் கடலூரில் உள்ள தனியார் கல்லூரியில் பி.சி.ஏ படித்து முடித்துள்ளார்.

அதேபகுதியைச் சேர்ந்தவர் சம்பத்(25). தனியார் இன்சூரன்ஸ் கம்பெனியில் ஊழியராக பணியாற்றி வருகிறார். சரண்யாவுக்கும், சம்பத்துக்கும் இடையே பழக்கம் ஏற்பட்டது. பின்னர் இது காதலாக மாறியது.

கடந்த 2 ஆண்டுகளாக காதலித்து வந்தனர். திருமணம் செய்து கொள்ள முடிவு செய்தனர். சரண்யாவும், சம்பத்தும் வெவ்வேறு சமுதாயத்தை சேர்ந்தவர்கள். எனவே இவர்களது திருமணத்திற்கு இருவரின் பெற்றோர்களும் எதிர்ப்பு தெரிவித்து வந்தனர்.

இந்தநிலையில் கடந்த 22–ம் தேதி சரண்யாவும், சம்பத்தும் வீட்டைவிட்டு வெளியேறினார்கள். பெற்றோருக்கு தெரியாமல் தஞ்சை பெரியநாயகி கோவிலில் திருமணம் செய்து கொண்டனர்.

பின்னர் இன்று காலை கடலூர் மாவட்ட போலீஸ் சூப்பிரண்டு அலுவலகத்திற்க்கு இருவரும் வந்து தஞ்சம் அடைந்தனர். இதுதொடர்பாக சரண்யா கூறியதாவது:–

நானும், சம்பத்தும் காதலித்து திருமணம் செய்து கொண்டோம். நாங்கள் வெவ்வேறு சமுதாயத்தை சேர்ந்தவர்கள் என்பதால் எங்களது திருமணத்திற்கு பெற்றோர்கள் சம்மதிக்க வில்லை. எங்களது உயிருக்கு ஆபத்து ஏற்பட்டுள்ளது. எங்களுக்கு போலீசார் பாதுகாப்பு அளிக்க வேண்டும்.

இவ்வாறு அவர் கூறினார்.

பின்னர் அவர் போலீஸ் சூப்பிரண்டு அலுவலகத்தில் பாதுகாப்பு கேட்டு மனு அளித்தார்.

புவனகிரி:

கடலூர் மாவட்டம் சிதம்பரம் அருகேயுள்ள வல்லம்படுகை பழைய கொள்ளிடம் ஆற்றில் அதிக அளவில் முதலைகள் உள்ளன.

இந்த ஆற்றில் உள்ள கிளைவாய்க்கால்கள் வழியாக முதலைகள் அடிக்கடி கரையோரம் உள்ள கிராமங்களுக்குள் புகுந்து வருகின்றன. இதனால் பொதுமக்களிடையே அச்சமும், பீதியும் ஏற்பட் டது.

மேலும் ஆற்றுக்கு குளிக்க செல்பவர்களையும் கடித்து வருவதால், உயிரிழப்புகளும் ஏற்பட்டது. இந்த நிலையில் கொள்ளிடம் ஆற்றில் இருந்து வெளியேறிய முதலை சிதம்பரம் அருகே இளநாங்கூர் கிராமத்தை சேர்ந்த விவசாயியின் விளை நிலத்துக்குள் புகுந்தது.

அந்த வழியாக சென்ற பொதுமக்கள் விவசாய நிலத்துக்குள் முதலை கிடப்பதை பார்த்து அதிர்ச்சியடைந்தனர். உடனே அவர்கள் சிதம்பரம் வனத்துறை அதிகாரிகளுக்கு தகவல் தெரிவித்தனர்.

அதன்பேரில் வனக்காப்பாளர்கள் சோமசுந்தரம், ராஜேஷ்குமார் மற்றும் வனத்துறையினர் சம்பவ இடத்துக்கு விரைந்து சென்று, வயல்வெளியில் கிடந்த முதலையை 1 மணி நேரம் போராடி பிடித்தனர்.

பிடிபட்ட முதலை 5 மீட்டர் நீளமும், 150 கிலோ எடை கொண்டதாகவும் இருந்தது. அந்த முதலையை வனத்துறையினர் பாதுகாப்பாக வக்காரமாரி நீர்த்தேக்கத்தில் விட்டனர்.

பெண்ணாடம்:

கடலூர் மாவட்டம் தொழுதூர் அருகே உள்ள மாப்புடையூரை சேர்ந்தவர் முருகன் (வயது 34). துபாயில் கட்டிட வேலை செய்து வந்தார். கடந்த சில நாட்களுக்கு முன்பு சொந்த ஊருக்கு திரும்பினர்.

இந்த நிலையில் அரங்கூரில் உள்ள முருகனின் உறவினர் செல்வமுத்து என்பவர் இறந்து விட்டார். துக்கம் கேட்பதற்காக முருகன் அவரது ஊரைச் சேர்ந்த தனலட்சுமி (26) யும் சென்றிருந்தனர். துக்கம் விசாரித்த பின்னர் இருவரும் இன்று அதிகாலை மோட்டார் சைக்கிளில் ஊருக்கு புறப்பட்டனர். அதிகாலை 5.30 மணி அளவில் தொழுதூரை அடுத்த நல்லதங்காள் கோவில் அருகே வந்தபோது அந்த வழியாக வந்த வாகனம் மோட்டார் சைக்கிள் மீது மோதிவிட்டு நிற்காமல் சென்றுவிட்டது.

தூக்கி வீசப்பட்ட முருகனும், தனலட்சுமியும் சம்பவ இடத்திலேயே துடிதுடித்து பரிதாபமாக இறந்தனர். தகவல் அறிந்ததும் தொழுதூர் போலீசார் சம்பவ இடத்துக்கு விரைந்து சென்றனர்.

இருவரின் உடல்களையும் மீட்டு பிரேத பரிசோதனைக்காக திட்டக்குடி அரசு ஆஸ்பத்திரிக்கு அனுப்பி வைத்தனர். மோட்டார் சைக்கிள் மீது மோதிவிட்டு நிற்காமல் சென்ற வாகனத்தை தேடி வருகிறார்கள்.

கடலூர்:

கடலூர் மாவட்டம் வடலூரில் உள்ள கொம்பாடி குப்பத்தை சேர்ந்தவர் திரிசங்கு. இவர் நெய்வேலி என்.எல்.சி. நிறுவனத்தில் ஒப்பந்த தொழிலாளியாக வேலைபார்த்து வந்தார். இவரது மனைவி அஞ்சலை (வயது 47).

திரிசங்குடன் பண்ருட்டியை அடுத்த திருத்தலையூரைச் சேர்ந்த குணசேகரன் (42) என்பவரும் வேலைபார்த்து வந்தார். கடந்த சில ஆண்டுகளுக்கு முன்பு திரிசங்கு இறந்து விட்டார்.

அதன்பின்னர் திரிசங்கு குடும்பத்துக்கு குணசேகரன் வேண்டிய உதவிகளை செய்து வந்தார். அஞ்சலை வீட்டுக்கு குணசேகரன் அடிக்கடி வந்து சென்றதால் அஞ்சலை-குணசேகரன் இடையே கள்ளத் தொடர்பு ஏற்பட்டது. இருவரும் வடலூர் நெய்வேலி சாலையில் உள்ள ஒரு வீட்டை வாடகைக்கு எடுத்து குடும்பம் நடத்தி வந்தனர்.

அஞ்சலையின் நடவடிக்கை பிடிக்காததால் அவரது மகள்கள் மற்றும் மகன் யாரும் அவரது வீட்டுக்கு வருவதில்லை. இது கள்ளக்காதல் ஜோடிக்கு மிகவும் வசதியாக அமைந்தது.

இந்தநிலையில் குணசேகரனின் போக்கில் மாற்றம் தெரிந்தது. அவர் சரியாக அஞ்சலை வீட்டுக்கு வருவதில்லை. செலவுக்கும் பணம் கொடுப்பதில்லை. குணசேகரனின் மாற்றத்துக்கு காரணம் என்ன என்று அஞ்சலை அக்கம் பக்கத்தில் விசாரித்தபோது தான் குணசேகரனுக்கும், வேறுஒரு பெண்ணுக்கும் இடையே தொடர்பு இருப்பதும், அதன்காரணமாகவே அவர் தனது வீட்டுக்கு வராமல் இருப்பதையும் அறிந்தார்.

இது குறித்து குணசேகரனிடம் அஞ்சலை கேட்ட போது அவர் சரியாக பதில் ஏதும் கூறவில்லை. இதனால் அவர்களுக்கு இடையே அடிக்கடி தகராறு ஏற்பட்டது.

இந்த நிலையில் குணசேகரன் நேற்று இரவு அஞ்சலையின் வீட்டுக்கு வந்தார். அப்போது, நீ வேறு ஒரு பெண்ணுடன் தொடர்பு வைத்திருக்கிறாயா? உண்மையை சொல் என்று அஞ்சலை கேட்டார். இதைத் தொடர்ந்து அவர்கள் இருவருக்கும் இடையே தகராறு ஏற்பட்டது. இதனால் அஞ்சலை மிகவும் ஆத்திரத்தில் இருந்தார்.

இன்று அதிகாலை ஆவேசமாக எழுந்த அஞ்சலை வீட்டில் தூங்கிக் கொண்டிருந்த குணசேகரனை கழுத்தை அறுத்துக் கொன்றார். பின்னர் வடலூர் போலீஸ் நிலையத்துக்கு சென்று சரண் அடைந்தார். போலீசார் அஞ்சலையை கைது செய்தனர். தொடர்ந்து அவரிடம் விசாரணை நடத்தி வருகின்றனர்.

குணசேகரன் கருத்து வேறுபாடு காரணமாக தனது மனைவியை பிரிந்து அதன் பின்னர் அஞ்சலையுடன் தொடர்பு ஏற்படுத்திக் கொண்டது விசாரணையில் தெரியவந்துள்ளது.