நீலகிரி மாவட்டத்தில் மாவட்ட பஞ்சாயத்து, 4 ஒன்றியத்தை திமுக கைப்பற்றியது

ஊட்டி:

நீலகிரி மாவட்டத்தில் நடைபெற்ற ஊரக உள்ளாட்சித் தேர்தல்களில் மாவட்டத்திலுள்ள 6 மாவட்ட ஊராட்சி உறுப்பினர் பதவியிடங்களில் தி.மு.க. கூட்டணி 5 இடங்களிலும், அ.தி.மு.க. ஒரு இடத்திலும் வெற்றி பெற்றது. இதன்மூலம் நீலகிரி மாவட்ட பஞ்சாயத்து தலைவர் பதவியை தி.மு.க. கைப்பற்றியது.

மாவட்டத்திலுள்ள ஊட்டி,குன்னூர், கோத்தகிரி, கூடலூர் ஆகிய 4 ஊராட்சி ஒன்றியங்களிலும் தி.மு.க. கூட்டணியே பெரும் பான்மை பெற்றுள்ளது. 4 ஊராட்சி ஒன்றியத் தலைவர் பதவியிடங்களும் தி.மு.க. வசமாகியுள்ளன.

அத்துடன் மாவட்டத்திலுள்ள 35 கிராம ஊராட்சித் தலைவர் பதவியிடங்களில் அரசியல் கட்சியினருக்கான அதிகாரப்பூர்வ சின்னம் இல்லாவிட்டாலும், தி.மு.க. ஆதரவு பெற்றவர்கள் 24 ஊராட்சிகளில் தலைவர் பதவியையும், 200-க்கும் மேற்பட்டோர் கிராம ஊராட்சி உறுப்பினர் பதவியிடங்களையும் கைப்பற்றியுள்ளனர்.