விராலிமலை:
புதுக்கோட்டை மாவட்டம் இலுப்பூரில் நடைபெற்ற ஆர்.எஸ்.எஸ் .அணிவகுப்பு ஊர்வலத்தில் பங்கேற்ற பா.ஜ.க. தேசிய செயலாளர் எச்.ராஜா நிருபர்களிடம் கூறியதாவது:-
அண்ணா அறிவாலயத்தின் மூலபத்திரத்தை மு.க. ஸ்டாலின் காட்டாத தன் மூலம் தி.மு.க.வின் சொத்துக்கள் அனைத்தும் பஞ்சமி நிலத்தில் உள்ளதோ? என்ற சந்தேகம் எழுந்துள்ளது. எனவே சொத்துக்கள் அனைத்தையும் தமிழக அரசு ஆய்வு செய்து விசாரணை நடத்த வேண்டும்.
மறைந்த தமிழக முதல்வர் ஜெயலலிதா நில அபகரிப்பு தடுப்பு பிரிவு காவல் துறையை தி.மு.க.விற்காகத்தான் உருவாக்கினார். நான்குநேரி, விக்கிரவாண்டி ஆகிய இரு சட்டப்பேரவை தொகுதி இடைத்தேர்தலில் தி.மு.க. படுதோல்வி அடையும். நாம் தமிழர் கட்சியின் ஒருங்கிணைப்பாளர் சீமான் ஒரு தேசத்துரோகி. தமிழக அரசு அவரை உடனடியாக தேசிய பாதுகாப்பு சட்டத்தின் கீழ் கைது செய்ய வேண்டும்.
இலங்கை தமிழர்களுக்காக சீமான் இதுவரை என்ன செய்து விட்டார். சீமானை போன்ற தீய சக்திகள், பிரிவினைவாதிகள் சமுதாயத்தில் நடமாட அருகதை இல்லாதவர்கள். தமிழக மக்களை திசை திருப்புவதற்காக தற்போது சீமான் இதுபோன்ற கருத்துகளை பேசி வருகிறார் என்றார்.
