ஈரோடு:
ஈரோடு மாவட்டத்தில் அந்தியூர், சத்தியமங்கலம் ஆகிய இடங்கனில் சின்ன வெங்காயம் விளைவிக்கப்படுகிறது. அங்கிருந்து ஈரோட்டுக்கு சின்ன வெங்காயம் விற்பனைக்கு வருகிறது.
அதேபோல கர்நாடகம், மைசூரில் இருந்தும் ஈரோடு நேதாஜி மார்க்கெட்டுக்கு சின்ன வெங்காயம் விற்பனைக்கு கொண்டு வரப்படுகிறது. கடந்த 2 மாதம் முன்பு வரை விளைச்சல் அமோகமாக இருந்ததாலும், ஈரோட்டுக்கு வரத்து அதிகமாக இருந்ததாலும் ஈரோடு மார்க்கெட்டுகளில் ஒரு கிலோ சின்ன வெங்காயம் ரூ.75 முதல் 80 வரை விற்கப்பட்டது.
கடந்த மாதம் ஒரு கிலோ ரூ. 100-க்கு விற்பனையானது. ஆனால் தற்போது மழை அதிகமாகி உள்ளதால் சின்ன வெங்காயம் விளைச்சல் குறைந்துள்ளது. அந்தியூர், சத்தியமங்கலம் பகுதியிலும் விளைச்சல் குறைவு.
இதன் காரணமாக ஈரோடு மார்க்கெட்டுகளுக்கு சின்ன வெங்காயம் வரத்து குறைந்துள்ளது. வழக்கமாக ஈரோடு நேதாஜி மார்க்கெட்டுக்கு 7 டன் சின்ன வெங்காயம் விற்பனைக்கு வரும்.
ஆனால் தற்போது அது குறைந்து 4 டன் வெங்காயமே வருகிறது. இந்த வரத்து குறைவு காரணமாக ஈரோட்டில் சின்ன வெங்காயம் விலை மேலும் உயர்ந்துள்ளது.
கடந்த மாதம் ரூ. 100-க்கு விற்கப்பட்ட ஒரு கிலோ சின்ன வெங்காயம் இன்று ரூ. 140 வரை விற்பனையாகிறது. சின்ன மார்க்கெட்டில் 120 ரூபாய்க்கும், பெரிய மார்க்கெட்டில் 140 ரூபாய்க்கும் விற்பனையாகிறது.
