அமேசானில் விற்று தீர்ந்த ஃபோர்டு இகோஸ்போர்ட்: முழு தகவல்கள்

புதுடெல்லி:

ஃபோர்டு நிறுவனத்தின் இகோஸ்போர்ட் ஃபேஸ்லிஃப்ட் மாடல் நவம்பர் 9-ம் தேதி வெளியிடப்பட இருக்கிறது. எனினும் வெளியீட்டிற்கு முந்தைய முன்பதிவு அமேசான் வலைத்தளத்தில் நடைபெற்றது.

அமேசான் வலைதளத்தில் (நவம்பர் 5-ம் தேதி) 24 மணி நேரம் மட்டும் அறிவிக்கப்பட்டிருந்த முன்பதிவு ஏற்கனவே நிறைவுற்றதாக அறிவிக்கப்பட்டுள்ளது. மேலும் அமேசான் தளத்தில் புதிய இகோஸ்போர்ட் ஃபேஸ்லிஃப்ட் மாடலை முதல் 123 வாடிக்கையாளர்களுக்கு மட்டுமே முன்பதிவு செய்ய முடியும் என அறிவிக்கப்பட்டது. இதன் காரணமாகவே முன்பதிவு நேரம் குறைக்கப்பட்டது.



அமேசான் தளத்தில் இதற்கென பிரத்தியேக வலைப்பக்கம் உருவாக்கப்பட்டுள்ளதை தொடர்ந்து புதிய மாடல் சார்ந்த தகவல்களை வாடிக்கயாளர்கள் அறிந்து கொள்ள முடியும். பிரத்தியேக வலைப்பக்கத்தில் புதிய இகோஸ்போர்ட் வெவ்வேறு மாடல் மற்றும் நிறங்கள் சார்ந்த தகவல்களை பார்க்க முடியும்.

புதிய ஃபோர்டு இகோஸ்போர்ட் ஃபேஸ்லிஃப்ட் மாடலை அமேசான் தளத்தில் வாடிக்கையாளர்கள் ரூ.10,000 மட்டும் செலுத்தி தளத்தில் பட்டியலிடப்பட்டுள்ள நிறங்களில் ஒன்றை தேர்வு செய்ய முடியும். முன்பதிவிற்கான பணத்தை அமேசான் வழங்கும் பேமென்ட் முறைகளில் செலுத்தும் வசதி வழங்கப்பட்டிருந்தது.



புதிய இகோஸ்போர்ட் ஃபேஸ்லிஃப்ட் 1.5 லிட்டர் ஃபோர்டு டிராகன் சீரிஸ் பெட்ரோல் இன்ஜின் கொண்டுள்ளது. இது தற்போதைய மாடலில் பயன்படுத்தப்படுவதை விட சிறியதாகவும், மெல்லியதாகவும், உறுதியாகவும் இருக்கும். முந்தைய 1.5 லிட்டர் டீசல் இன்ஜினும் வழங்கப்படும் என கூறப்படுகிறது.

இன்ஜின் மட்டுமின்றி புதிய ஃபேஸ்லிஃப்ட் மாடலின் வெளிப்புறம் மற்றும் உள்புறங்களிலும் மாற்றங்கள் செய்யப்படும். புதிய காம்பாக்ட் எஸ்யுவி மாடலில் ப்ரோஜெக்டர் ஹெட்லேமம்ப், பகலில் எரியும் எல்இடி மின்விளக்குகள், 17-இன்ச் அலாய் வீல் மற்றும் வெளிப்புறத்தில் நீலம் மற்றும் சிவப்பு நிறம் கொண்டுள்ளது. உயர் ரக டைட்டானியம் எஸ் மாடலில் பிளாக்டு-அவுட் ஹெட்லேம்ப் பெசல்கள், ஃபாக் லேம்ப் பெசல், அலாய் வீல் மற்றும் கிரில் வழங்கப்பட்டுள்ளது.



உள்புற அம்சங்களை பொருத்த வரை புதிய மாடலில் டச் ஸ்கிரீன் இன்ஃபோடெயின்மென்ட் சிஸ்டம், ஃபோர்டு புதிய சின்க் 3 சிஸ்டம், ஆப்பிள் கார் பிளே மற்றும் ஆண்ட்ராய்டு ஆட்டோ போன்ற கனெக்டிவிட்டி வழங்கப்படுகிறது. இத்துடன் புதிய வகை சீட், ஆடியோ கண்ட்ரோல், மூன்று ஸ்போக் கொண்ட ஸ்டீரிங் வீல், ஆட்டோமேடிக் கிளைமேட் கண்ட்ரோல் மற்றும் டூயல் யுஎஸ்பி போர்ட் வழங்கப்பட்டுள்ளது.

பாதுகாப்பு அம்சங்களை பொருத்த வரை இகோஸ்போர்ட் ஃபேஸ்லிஃப்ட் மடலில் டூயல் ஏர்பேக், EBD வைத்த ABS மற்றும் டாப் எண்ட் மாடலில் கர்டைன் ஏர்-பேக், பின்புறம் குழந்தைகளை அமர வைக்க ஐசோஃபிக்ஸ் சீட் மவுணட் வழங்கப்பட்டுள்ளது.