பட்ஜெட் விலையில் வேற லெவல் டிசைன்.. புது லாவா ஸ்மார்ட்போன் அறிமுகம்

லாவா நிறுவனத்தின் புதிய 5ஜி ஸ்மார்ட்போன் இந்திய சந்தையில் அறிமுகம் செய்யப்பட்டது. லாவா யுவா 5ஜி என அழைக்கப்படும் புதிய ஸ்மார்ட்போனில் 6.5 இன்ச் HD+ டிஸ்ப்ளே, 90Hz ரிப்ரெஷ் ரேட், யுனிசாக் டி750 பிராசஸர், 4 ஜி.பி. ரேம், 4 ஜி.பி. வரை விர்ச்சுவல் ரேம் வழங்கப்பட்டு இருக்கிறது.

இந்த ஸ்மார்ட்போன் ஆண்ட்ராய்டு 13 ஓ.எஸ். கொண்டிருக்கிறது. இத்துடன் ஆண்ட்ராய்டு 14 அப்டேட் மற்றும் இரண்டு ஆண்டுகளுக்கு காலாண்டு அடிப்படையில் செக்யுரிட்டி அப்டேட்கள் வழங்குவதாக லாவா தெரிவித்துள்ளது.

கிளாஸ் பேக் டிசைன் கொண்டிருக்கும் லாவா யுவா 5ஜி மாடலில் 50MP பிரைமரி கேமரா, 2MP லென்ஸ் மற்றும் 5MP செல்ஃபி கேமரா வழங்கப்பட்டு இருக்கிறது. இதன் பக்கவாட்டில் கைரேகை சென்சார் வழங்கப்பட்டுள்ளது. இந்த ஸ்மார்ட்போன் 5000 எம்.ஏ.ஹெச். பேட்டரி மூலம் சக்தியூட்டப்படுகிறது. இத்துடன் 18 வாட் பாஸ்ட் சார்ஜிங் வசதி உள்ளது.

கனெக்டிவிட்டிக்கு 5ஜி, டூயல் 4ஜி வோல்ட்இ, வைபை, ப்ளூடூத் 5, யு.எஸ்.பி. டைப் சி, 3.5mm ஆடியோ ஜாக், எஃப்.எம். ரேடியோ உள்ளிட்டவை வழங்கப்பட்டு இருக்கிறது. இந்த ஸ்மார்ட்போன் மிஸ்டிக் கிரீன் மற்றும் மிஸ்டிக் புளூ என இரண்டு நிறங்களில் கிடைக்கிறது.

புதிய லாவா யுவா 5ஜி ஸ்மார்ட்போனின் 4 ஜி.பி. ரேம், 64 ஜி.பி. மெமரி மாடல் விலை ரூ. 9 ஆயிரத்து 499 என்றும் 4 ஜி.பி. ரேம், 128 ஜி.பி. மெமரி மாடல் விலை ரூ. 9 ஆயிரத்து 999 என்றும் நிர்ணயம் செய்யப்பட்டு உள்ளது.

லாவா யுவா 5ஜி ஸ்மார்ட்போன் அமேசான் இந்தியா மற்றும் லாவா இ ஸ்டோர், லாவா ரிடெயில் ஸ்டோர்களில் ஜூன் 5 ஆம் தேதி விற்பனைக்கு வருகிறது.