224 ரன் என்ற இமாலய இலக்கை ராஜஸ்தானுக்கு நிர்ணயித்துள்ளது கிங்ஸ் லெவன் பஞ்சாப்

ராஜஸ்தான் ராயல்ஸ் அணிக்கெதிராக கிங்ஸ் லெவன் பஞ்சாப் முதலில பேட்டிங் செய்தது. கேஎல் ராகுல், மயங்க் அகர்வால் தொடக்க வீரர்களாக களம் இறங்கினர். தொடக்கம் முதலே இருவரும் அதிரடி ஆட்டத்தை வெளிப்படுத்தினர். குறிப்பாக மயங்க் அகர்வால் பட்டைய கிளப்பினார்.

இதனால் ஸ்கோர் ஜெட் வேகத்தில் உயர்ந்தது. 4.3 ஓவரில் 50 ரன்னைக் கடந்த பஞ்சாப், 8.4 ஓவரில் 100 ரன்னைக் கடந்தது. இதற்கிடையில் மயங்க் அகர்வால் 26 பந்தில் அரைசதம் கடந்தார்.

10 ஓவர் முடிவில் கிங்ஸ் லெவன் பஞ்சாப் விக்கெட் இழப்பின்றி 110 ரன்கள் குவித்தது. மயங்க் அகர்வால் 69 ரன்களும், லோகேஷ் ராகுல் 36 ரன்கள் எடுத்திருந்தனர்.

அரைசதம் அடித்த பின் மயங்க் அகர்வால் ருத்ர தாண்டவம் ஆடினார். 13.2 ஓவரில் பஞ்சாப் அணி 150 ரன்னைக் கடந்தது. இதற்கிடையில் கேஎல் ராகுல் 35 பந்தில் அரைசதம் அடித்தார்.

மறுமுனையில் ஜெட் வேகத்தில் சென்ற மயங்க் அகர்வால் 15-வது ஓவரின் கடைசி பந்தை பவுண்டரிக்கு விரட்டி 45 பந்தில் 9 பவுண்டரி, 7 சிக்சருடன் சதம் அடித்தார். கடந்த போட்டியில் கேஎல் ராகுல் சதம் அடித்த நிலையில், இந்த போட்டியில் மயங்க் அகர்வால் சதம் அடித்து அசத்தினார்.

17-வது ஓவரின் 3-வது பந்தில் மயங்க் அகர்வால் 50 பந்தில் 106 ரன்கள் எடுத்த நிலையில் ஆட்டமிழந்தார். அடுத்த ஓவரில் கேஎல் ராகுல் 54 பந்தில் 69 ரன்கள் எடுத்த நிலையில் வெளியேறினார். அப்போது பஞ்சாப் அணி 18 ஓவரில் 2 விக்கெட் இழப்பிற்கு 69 ரன்கள் எடுத்திருந்தது.

கடைசி 2 ஓவரில் மேக்ஸ்வெல், பூரன் ஜோடி 29 ரன்கள் விளாச கிங்ஸ் லெவன் பஞ்சாப் 20 ஓவர் முடிவில் 2  விக்கெட் இழப்பிற்கு 223 ரன்கள் குவித்தது. மேக்ஸ்வெல் 9 பந்தில் 13 ரன்களும், பூரன் 8 பந்தில் 25 ரன்களும் எடுத்து ஆட்டமிழக்காமல் இருந்தனர்.