திமுக கூட்டணியால் எங்களை வீழ்த்த முடியாது- டாக்டர் தமிழிசை பதிலடி

சென்னை:

பா.ஜனதா ஆட்சியை வீழ்த்துவதற்கு தேவையான செயல் திட்டங்களை வகுப்போம் என்று தி.மு.க. மாவட்ட செயலாளர்கள் கூட்டத்தில் தீர்மானம் நிறைவேற்றப்பட்டது.

இதற்கு பதிலளித்து தமிழக பா.ஜனதா தலைவர் டாக்டர் தமிழிசை கூறியதாவது:-

பிரதமர் யார் என்பதையே முடிவு செய்ய முடியாமல் இருக்கும் ஒரு கூட்டணி. தொடர்ந்து பா.ஜனதாவை விமர்சித்து வருவதற்கு காரணம் எங்கள் வளர்ச்சியை கண்டு பயப்படுவதுதான்.

கலைஞர் உயிருடன் இருந்த போது பா.ஜனதாவுக்கு ஒரு கொடி நடுவதற்கு கூட இடம் கிடைக்காது என்றார். இன்றைய நிலைமை என்ன? தி.மு.க. பக்கம் யாரும் செல்ல வில்லை.

ஆனால் பா.ஜனதா வளர்ந்து வருகிறது. உள்ளாட்சி தேர்தலில் முத்திரை பதித்துள்ளது. கட்சி பலமாக வளர்ந்துள்ளது.

வருகிற பாராளுமன்ற தேர்தலில் தமிழகத்தில் கூடுதலான எம்.பி.க்கள் வெற்றி பெறுவார் என்று பா.ஜனதா செயற்குழுவில் அமித்ஷா குறிப்பிட்டார். கட்சியின் வளர்ச்சி அந்த நம்பிக்கையை கொடுத்துள்ளது.

தி.மு.க.வை மாதிரி நாங்கள் எந்த கட்சியையும் வர விடமாட்டோம் என்று சொல்ல மாட்டோம். ஆனால் மக்களே உங்களை இனிவர விட மாட்டார்கள்.

பா.ஜனதா ஆட்சிக்கு வந்தால் மதம் சார்ந்த கட்சியாக இருக்கும். மதக்கலவரம் வரும் என்றெல்லாம் பூச் சாண்டி காட்டி பார்த்தார்கள். ஆனால் கடந்த 4½ ஆண்டுகளில் அவர்கள் நினைத்தது போல் எதுவும் நடக்கவில்லை. அனைத்து தரப்பு மக்களின் நன்மதிப் பையும் மோடி பெற்று இருக்கிறார்.

மத்தியில் தி.மு.க.வுக்கு அங்கீகாரம் கொடுத்த கட்சி பா.ஜனதா என்பதை மறந்து விடக்கூடாது. இப்போது தங்கள் இயலாமையின் காரணமாகத்தான் இப்படிப்பட்ட கருத்துக்களை தெரிவிக்கிறார்கள். தி.மு.க. கூட்டணியால் ஒருபோதும் எங்களை வீழ்த்த முடியாது.

இவ்வாறு அவர் கூறினார். #tamilisai #dmk #mkstalin