வெற்றியில் செஞ்சூரி அடித்த சென்னை சூப்பர் கிங்ஸ் அணி கேப்டன் எம்எஸ் டோனி

இந்திய கிரிக்கெட் வாரியத்தால் கடந்த 2008-ம் ஆண்டு ஐபிஎல் டி20 லீக் தொடர் தொடங்கப்பட்டது. தொடக்க வருடத்தில் சென்னை சூப்பர் கிங்ஸ், டெக்கான் சார்ஜர்ஸ், ராஜஸ்தான் ராயல்ஸ், மும்பை இந்தியன்ஸ், ராயல் சேலஞ்சர்ஸ் பெங்களூர், கொல்கத்தா நைட் ரைடர்ஸ், டெல்லி டேர்டெவில்ஸ், கிங்ஸ் லெவன் பஞ்சாப் அணிகள் இடம்பிடித்திருந்தன.

சென்னை சூப்பர் கிங்ஸ் அணியின் கேப்டனாக எம்எஸ் டோனி நியமிக்கப்பட்டார். 2008-ல் இருந்து சென்னை சூப்பர் கிங்ஸ் அணியின் கேப்டனாக டோனி இருந்து வருகிறார். 2016 மற்றும் 2017 சீசனில் மட்டும் சென்னை சூப்பர் கிங்ஸ் அணி இடம்பெறவில்லை. இவரது தலைமையில் இரண்டு முறை கோப்பையை கைப்பற்றியுள்ளது.



சென்னை சூப்பர் கிங்ஸ் விளையாடிய எல்லா சீசனில் பிளேஆஃப்ஸ் சுற்றுக்கு முன்னேறியுள்ளது. அத்துடன் சாம்பியன்ஸ் லீக் தொடரிலும் டோனி தலைமையில் சென்னை சூப்பர் கிங்ஸ் வெற்றி வாகை சூடியுள்ளது.

ஐபிஎல் 11-வது சீசனில் சென்னை சூப்பர் கிங்ஸ் அணி நேற்று நடைபெற்ற சன்ரைசர்ஸ் ஐதராபாத் அணிக்கெதிரான ஆட்டத்தில் வெற்றி பெற்றது. இந்த வெற்றியின் மூலம் கேப்டனாக இருந்து சென்னை சூப்பர் கிங்ஸ் அணிக்கு 100 வெற்றிகளை தேடிக்கொடுத்து சாதனைப் படைத்துள்ளார்.

டோனி தலைமையில் சென்னை சூப்பர் கிங்ஸ் ஐபிஎல் தொடரில் 86 வெற்றிகளையும், சாம்பியன்ஸ் லீக்கில் 14 வெற்றிகளையும் ருசித்துள்ளது.