ஐபிஎல் வரலாற்றில் முதன்முறையாக ரெய்னா இல்லாமல் சிஎஸ்கே

ஐபிஎல் டி20 லீக்கின் 11-வது சீசன் நடைபெற்று வருகிறது. சென்னை சூப்பர் கிங்ஸ் அணி தனது 2-வது லீக் ஆட்டத்தில் கொல்கத்தா நைட் ரைடர்ஸ் அணியை எதிர்கொண்டது. 203 என்ற இமாலய இலக்கை கடைசி ஓவரின் 5-வது பந்தில் சென்னை அணி எட்டி அசத்தல் வெற்றி பெற்றது.

இந்த போட்டியில் ரெய்னா பேட்டிங் செய்யும்போது காயம் அடைந்தார். இதனால் அடுத்த இரண்டு போட்டிகளில் அவர் களம் இறங்கமாட்டார் என்று தெரிவிக்கப்பட்டது. இன்று இரண்டு ஆட்டங்கள் நடைபெறுகின்றன. 2-வது ஆட்டத்தில் சென்னை சூப்பர் கிங்ஸ் கிங்ஸ் லெவன் பஞ்சாப் அணியை எதிர்கொள்கிறது. இந்த போட்டியில் ரெய்னா களம் இறங்கவில்லை.

2008-ம் ஆண்டு ஐபிஎல் தொடர் தொடங்கியதில் இருந்து சென்னை சூப்பர் கிங்ஸ் அணிக்காக விளையாடி வருபவர் ரெய்னா. கடந்த 8 சீசன்களில் ஒருபோட்டியில் கூட ரெய்னா இடம்பெறாமல் போனது கிடையாது. தற்போது ஐபிஎல் வரலாற்றில் சென்னை சூப்பர் கிங்ஸ் அணியில் முதன்முறையாக ரெய்னா இடம்பெறவில்லை.