ஐபோன் SE 4 உற்பத்தி திடீர் நிறுத்தம்?

ஆப்பிள் நிறுவனத்தின் புதிய ஐபோன் SE 4 பற்றிய விவரங்கள் கடந்த சில மாதங்களாகவே இணையத்தில் வெளியாகி வருகின்றன. 2024 வாக்கில் அறிமுகமாகும் என கூறப்பட்ட நிலையில், ஐபோன் SE 4 மாடலின் வெளியீட்டு திட்டத்தில் மாற்றம் செய்யப்பட்டு இருப்பதாக தகவல் வெளியாகி உள்ளது.

பிரபல ஆப்பிள் வல்லுனரான மின்-சி-கியோ, புதிய ஐபோன் SE 4 உற்பத்தி ரத்து அல்லது தள்ளிவைக்கப்பட வாய்ப்புகள் இருப்பதாக தெரிவித்து இருக்கிறார். ஐபோன் SE 3, ஐபோன் 13 மினி போன்ற மிட் முதல் லோ எண்ட் ஐபோன்கள் குறைந்த எண்ணிக்கையில் தான் வினியோகம் செய்யப்பட்டு வருகின்றன. மேலும் புதிய ஐபோன் SE 4 மாடலில் 5.7 இன்ச் முதல் 6.1 இன்ச் வரையிலான ஸ்கிரீன் வழங்கப்படலாம்.

மேலே குறிப்பிடப்பட்டு இருக்கும் இரண்டு காரணங்களால், ஐபோன் SE 4 உற்பத்தி நிறுத்தப்பட்டோ அல்லது ஒத்திவைக்கப்பட்டு இருக்கலாம் என அவர் குறிப்பிட்டுள்ளார். டிஸ்ப்ளே செயின் வல்லுனரான ராஸ் யங் புதிய ஐபோன் SE 4 மாடல் ஐபோன் XR போன்ற தோற்றம் கொண்டிருக்கும் என்றும் அதில் OLED ஸ்கிரீன் வழங்கப்படும் என்றும் தெரிவித்து இருக்கிறார். இதன் காரணமாக ஐபோனின் விலை தானாகவே உயர்ந்து விடும்.

இவ்வாறு நடக்கும் பட்சத்தில் தற்போதைய ஐபோன் SE மாடலின் நிலையில் மாற்றம் செய்ய வேண்டிய சூழல் உருவாகும். 2023 ஆண்டு வாக்கில் சர்வதேச பொருளாதார மந்த நிலை ஏற்படும் வாய்ப்புகள் இருப்பதால் மற்ற தொழில்நுட்ப நிறுவனங்களை போன்றே ஆப்பிள் நிறுவனமும் உற்பத்தி மற்றும் அது தொடர்பான செலவீனங்களை குறைக்கும் முடிவை எடுக்கலாம் என கூறப்படுகிறது.