போரூர்:
சென்னை கோயம்பேடு மார்கெட்டுக்கு தமிழகத்தின் பல்வேறு பகுதிகள் மற்றும் ஆந்திரா, தெலுங்கானா, கர்நாடகா, கேரளா, மகாராஷ்டிரா, உத்தரபிரதேசம் ஆகிய மாநிலங்களில் இருந்து காய்கறி விற்பனைக்கு வருகிறது.
கடந்த சில நாட்களாகவே தினசரி 400-க்கும் மேற்பட்ட லாரிகளில் காய்கறி விற்பனைக்கு குவிந்து வருகிறது. தொடர் முகூர்த்த நாட்கள் காரணமாக சந்தைக்கு வரும் வியாபாரிகள் வரத்து அதிகரித்து காய்கறி விற்பனை விறு விறுப்பாக நடந்து வந்தது.
இந்த நிலையில் அதிகாலையில் மார்கெட்டுக்கு வரும் சில்லரை வியாபாரிகள் மற்றும் காய்கறி கடைக்காரர்களின் வரத்து கடந்த 2 நாட்களாக திடீரென குறைந்துவிட்டது இதன் காரணமாக காய்கறி விற்பனை மந்தமாகி மார்க்கெட் வளாகம் முழுவதும் வெறிச்சோடி காணப்படுகிறது.
நள்ளிரவில் மொத்த விற்பனை கடைகளில் ஒரு கிலோ ரூ.20-க்கு விற்கப்பட்ட கத்தரிக்காய் வியாபாரிகள் வரத்து குறைந்ததால் அதிகாலையில் 60கிலோ மூட்டை ரூ.300- க்கு விற்கப்பட்டது ஆனால் அதையும் வாங்கி செல்ல யாரும் ஆர்வம் காட்டவில்லை. கேரட், சுரக்காய், புடலங்காய் உள்ளிட்ட காய்கறிகள் விற்பனை ஆகாமல் மூட்டை மூட்டையாக தேக்கமடைந்து இருப்பது மொத்த வியாபாரிகளை பெரிதும் கவலை அடைய செய்துள்ளது.
இதுகுறித்து மொத்த வியாபாரி சுகுமார் கூறுகையில், "இன்று 420 லாரிகளில் காய்கறி விற்பனைக்கு குவிந்துள்ளது. கடந்த 2 நாட்களாக காய்கறி விற்பனை மிகவும் மந்தமாக உள்ளது வெயிலின் தாக்கம் காரணமாக விற்பனை ஆகாமல் தேக்கமடையும் கேரட், கத்தரிக்காய் உள்ளிட்ட காய்கறிகள் மறுநாள் வீணாகி குப்பையில் கொட்டும் நிலை ஏற்பட்டுள்ளது இதன் காரணமாக வியாபாரிகளுக்கு பெருத்த நஷ்டம் ஏற்பட்டு வருகிறது" என்றார்.
இன்றைய காய்கறிகள் மொத்த விற்பனை விலை விபரம் வருமாறு (கிலோவில்) தக்காளி-ரூ30, நாசிக் வெங்காயம்-ரூ22, சின்ன வெங்காயம்-ரூ30, உருளைக்கிழங்கு-ரூ25, உஜாலா கத்தரிக்காய்-ரூ20, வரி கத்தரிக்காய்-ரூ12, வெண்டைக்காய்-ரூ25, அவரைக்காய்-ரூ35, பீன்ஸ்-ரூ60, ஊட்டி கேரட்-ரூ30, ஊட்டி பீட்ரூட்-ரூ45, பீட்ரூட்-ரூ35, முட்டை கோஸ்-ரூ25, வெள்ளரிக்காய்-ரூ12, புடலங்காய்-ரூ20, கொத்தவரங்காய்-ரூ25, முருங்கைக்காய்-ரூ50, சுரக்காய்-ரூ10, பாகற்காய்-ரூ25, பன்னீர் பாகற்காய்- ரூ40, காலி பிளவர் (ஒன்று) -ரூ13, எலுமிச்சை பழம்-ரூ80, இஞ்சி-ரூ28, பச்சை மிளகாய்-ரூ25 தேங்காய்-ரூ30.
