பொம்மிடி:
தர்மபுரி மாவட்டம் பாப்பிரெட்டிப்பட்டி - சேலம் சாலையில் ஒரு தோட்டத்தில் உள்ள வீட்டில் வசித்து வருபவர் சரவணன் (வயது 63). இவருடைய மனைவி உமாதேவி. இவர்களது மகன்கள் வெளியூரில் வேலை செய்து வருவதால், கணவன், மனைவி இருவர் மட்டும் வீட்டில் வசித்து வந்தனர்.
இந்த நிலையில் நேற்று முன்தினம் இரவு சரவணன் சாப்பிட்டு முடித்து விட்டு, தட்டை கழுவுவதற்காக வீட்டுக்கு வெளியே வந்துள்ளார். அப்போது மர்ம ஆசாமிகள் 4 பேர் திடீரென வீட்டுக்குள் புகுந்து உள்ளனர். அவர்கள் கத்தியை காட்டி மிரட்டி, அவர் அணிந்திருந்த 5½ பவுன் சங்கிலி, 1¼ பவுன் தாலி மற்றும் 1½ பவுன் வளையலை “கட்டிங் பிளேயர் ” மூலம் வெட்டி எடுத்து, பறித்துள்ளனர்.
இதை பார்த்து அதிர்ச்சியடைந்த சரவணன் சத்தம் போட்டார். பின்னர் அவர் மர்ம ஆசாமிகளை தடுக்க வந்தார். அப்போது மர்ம ஆசாமிகள் அங்கிருந்த குக்கர் மேல் மூடியை எடுத்து அவரது தலையில் ஓங்கி அடித்து உள்ளனர். இதில் அவர் அலறி துடித்தார். இதையடுத்து மர்ம ஆசாமிகள் நகையுடன் அங்கிருந்து ஓடிவிட்டனர். மர்ம ஆசாமிகள் தாக்கியதில் காயமடைந்த சரவணன் பாப்பிரெட்டிப்பட்டி அரசு ஆஸ்பத்திரியில் சிகிச்சைக்காக அனுமதிக்கப்பட்டார்.
இந்த சம்பவம் குறித்த புகாரின்பேரில் பாப்பிரெட்டிப்பட்டி போலீஸ் இன்ஸ்பெக்டர் ஆனந்தவேல் வழக்குப்பதிவு செய்து விசாரணை நடத்தினார். தொடர்ந்து கைரேகை நிபுணர்கள் வரவழைக்கப்பட்டு அங்கு பதிவாகி இருந்த தடயங்களை சேகரித்தனர். போலீசாரின் முதற்கட்ட விசாரணையில், கணவன், மனைவி மட்டுமே தனியாக இருந்ததை நோட்டமிட்ட மர்ம ஆசாமிகள் வீட்டருகே பதுங்கி இருந்து வீட்டுக்குள் புகுந்து இந்த துணிகர சம்பவத்தில் ஈடுபட்டது தெரியவந்தது. அந்த கும்பல் யார் என விசாரணை நடத்தி வரும் போலீசார், அவர்களை வலைவீசி தேடி வருகின்றனர்.
