நீங்கள் தேடியது "Website problems"

இயலாமையில் வெளிப்படும் அந்த இளம் பெண்ணின் அபய குரல் காதுகளில் மீண்டும் மீண்டும் ஒலித்துக் கொண்டே இருக்கிறது. வலுக்கட்டாயமாக நமது கண்களில் வந்து விழுந்துவிட்ட இந்த காணொலி காட்சியை கண்ட மனம் பதைபதைக்கிறது. அவள் கதறிக்கொண்டிருக்க ஒன்றுமே நடவாததுபோல் நின்று கொண்டு சாதாரணமாக பேசிக்கொள்ளும் மனித மிருகங்களைப் பார்க்கையில் ரத்தம் கொதிக்கிறது. தமிழ்த் தாய்மார்கள் பெற்ற ஆண் பிள்ளைகள் தானா இவர்கள்?

பொள்ளாச்சி ‘சீ சீ’ என புளுத்து நாறிக் கொண்டிருக்கிறது. இந்த வரிசையில் இன்னும் நூற்றுக்கணக்கான பெண்களாம். ஆயிரத்திற்கும் மேற்பட்ட வீடியோக்களாம். ஏழு ஆண்டுகளாகவே இது நடக்கிறதாம். இது தொடர்பாக எழுதப்பட்டுள்ள ஓர் ஆங்கில கட்டுரை இப்படிச் சொல்கிறது. “போதை தரும் ஒரு விளையாட்டாக அந்த ஆண்கள் இதைச் செய்து கொண்டு வந்திருக்கிறார்கள்”. போதையோடு அவர்களுக்கு பண மழையும் பொழிந்திருக்கிறது. இந்த அநியாயத்தை ஒரு தொழிலாகவே தொடர்ந்திருக்கிறார்கள். இப்போதாவது இது வெளியே வந்ததே என்றுதான் எண்ணத் தோன்றுகிறது. இன்னும் சில நூறு பெண்களின் வாழ்வு சிதைக்கப்படாமல் தடுக்கப்பட்டதே இனி சட்டம் வேகமாக தன் கடமையைச் செய்யட்டும்.

பொள்ளாச்சியில் மட்டுமல்ல, நமது ஊரில், நமது பக்கத்திலேயே இதுபோன்று நடந்து கொண்டிருக்கலாமோ என்றதோர் அச்சம் பெண் குழந்தையை பெற்றுக் கொண்டுள்ள அனைவரையும் ஆட்டிப் படைக்கிறது. கண்ணுக்குத் தெரியாமல் இருக்கும் இந்த வேட்டை நாய்களின் கோரப் பற்களின் பிடியில் இருந்து நம் பெண் குழந்தைகளை காப்பாற்ற நாம் என்ன செய்ய வேண்டும் என ஆராய வேண்டி இருக்கிறது.

இந்த நிகழ்வில் கதறும் அந்தப் பெண் அங்கே எப்படிச் சென்றாள்?. அவள் சமூக ஊடகச் சாதனங்கள் அழைத்துச் சென்ற சக்கர வியூகப் பொறிக்குள் தானே வலிய சென்று மாட்டிக் கொண்டிருக்கிறாள். வெறி நாய்கள் சூழ்ந்து நிற்க செய்வதறியாது துடிக்கிறாள். இந்த சக்கர வியூகம் ஒரே நாளில் வகுக்கப்படுவதில்லை. சிறிது சிறிதாக பின்னப்பட்டு, நண்பன் என்ற பெயரில் நம்பிக்கை ஊட்டப்பட்டு, நாளாவட்டத்தில் இளம் பெண்கள் இந்த வியூகத்திற்குள் நகர்த்தப்படுகிறார்கள்.

சமூக ஊடகங்களில் தங்கள் அந்தரங்கங்களைப் பந்தி வைக்க ஆரம்பிப்பதில் இருந்து தொடங்குகிறது வேட்கைப் பொறியை நோக்கிய நகர்வு. சுய முகங்களைக் காட்டிக்கொள்ளாமல் பெண் தோழிகளைப் போலவே பேசி உணர்வுகளின் வீச்சை அறிந்து கொண்டு அல்லது அவற்றைத் தூண்டி விட்டு ஏதோ ஒரு சொல்லில் தன்னிலை மறந்து தன் வலிமையின்மை வெளிப்படும்போது இந்த சக்கர வியூகத்திற்குள் இப்பெண்கள் ஏற்கனவே வந்து விட்டிருப்பார்கள், ஒரு கொடியவனிடம் மாட்டிக் கொள்வதே கொடுமை. ஆனால் கொடியதொரு ஓநாய் கூட்டத்திடம் அகப்பட்டு கொண்டிருக்கிறார்கள் இந்த பொள்ளாச்சி இளம்பெண்கள்.

ஒரு நாள் பொழுதைக் கடக்கையில் தான் செய்வது அனைத்தையும் செல்போன் கேமராவில் ஏற்றி, அதை முகநூல், வாட்ஸ்-அப் போன்ற சமூக ஊடகங்கள் மூலமாக நண்பர்களுக்கும், தோழிகளுக்கும் காட்சிப்படுத்திக் கொண்டே இருக்கும் பழக்கம் இளம் பெண்கள் இடையே ஒரு நோயாக தொற்றிக் கொண்டிருக்கிறது. இந்தச் சூழ்நிலையில் இளம் பெண்களுக்கு இந்த நிகழ்வு ஒரு கண் திறப்பு இந்த சுய காட்சிப்படுத்தலானது கயவர்களுக்கும் போய் சேர்ந்து கொண்டிருக்கிறது என்பதை இந்த பெண்களால் அறிய முடிவதில்லை.

வாட்ஸ் -அப்பில் முகம் தெரியாதவர்களுடன் கூட தேவையற்ற நட்பு பாராட்டுவது, கருத்துகளை வெளிப்படுத்துவது, படங்களைப் பகிர்ந்து கொள்வது, அக நூலாய் மாறிக்கொண்டுள்ள முக நூலில் அந்தரங்க ஆசைகளை வெளிப்படுத்துவது, நண்பர்கள் என்ற பெயரில் அறிமுகம் ஆகும் கயவர்களின் ஆசை வார்த்தைகளை அப்படியே நம்புவது, ஒரு கட்டத்தில் அவர்களின் வார்த்தைகளில் மயங்கி உடன் செல்லத் துணிவது, தான் மட்டும் தனியே சென்று சிக்கிக்கொள்வது என இந்த வியூகப் பாதையின்படி நிலைகள் அதிகம்.

அப்படி சிக்கிக் கொண்டு விட்டதை ஓநாய்கள் படம் எடுத்து வைத்துக்கொண்டு மிரட்டியபோது பணம் கொடுத்து வந்ததும், பணம் கொடுக்க முடியாதவர்கள் உடலைக் கொடுத்து வந்ததும் இயலாமையின் உச்ச கட்டம். ஒரு முறை உடலைப் படம் எடுத்துக் கொண்டு விட்டான் என்பதற்காக அந்தப் படம் வெளிவந்து விடும் என்ற அச்சத்தில் மீண்டும் மீண்டும் அவர்களிடமே சென்று வீழ்ந்து கொண்டிருந்த பெண்கள் உண்மையிலேயே கல்வியறிவு பெற்றவர்கள் தானா என ஐயம் கொள்ள வேண்டியுள்ளது.

பெண்ணின் உடலில்தான் குடும்பத்தின் மானம் அடங்கியுள்ளது என்ற சமூக விழுமியத்தின் தலைவிதி இது. இக்கயவர்கள் கூட்டத்திடம் அகப்பட்டிருந்த முதல் பெண்ணானவள் நண்பன் என்று நம்பப்பட்டவன் தன் உடலைப் பொருளாக்கி வீழ்த்திய போதே அதை தன் குடும்பத்தினரிடம் கூறி வெளிக் கொணர்ந்து இருந்தால் இத்தனை பெண்கள் தங்கள் கண்ணியத்தை இழந்திருக்க வேண்டியதிருந்திருக்காது. ஆனால் அந்தப் பெண் இதை துணிவுடன் வெளியில் பேச அவளுக்கு நம் சமூகம் சொல்லித் தந்திருக்கவில்லை.

பெண்களாக சென்று ஏன் இப்படி மாட்டிக் கொள்ள வேண்டும் என சிலர் பட்டிமன்றம் பேசலாம். இங்கே நடப்பது நம்பிக்கைத் துரோகம். நம்பி வந்தவன் கைவிடும் அவலம். வழக்கம்போல் பெண்களை மட்டுமே குற்றம் சொல்லி விட்டு இதனைக் கடந்து விட முடியாது. ஆண்கள் சரியான சமூக புரிதலுடன் வளர்க்கப்படுகிறார்களா என்பதையும் சிந்திக்க வேண்டியுள்ளது. தன்னை நம்பி வரும் பெண்ணை கண்ணியத்துடன் நடத்துபவனே உண்மையான ஆண் மகன்.

இப்படித்தான் இருக்க வேண்டும் என்று பெண் குழந்தைகளை வளர்க்கும் சமூகம், ஆண் குழந்தைகளுக்கு சமூக விழுமியங்களைக் கற்றுத்தர மறப்பதும், இதுபோன்ற நிகழ்வுகளுக்கு இட்டுச் செல்கிறது. செல்போன், ஐபேட் போன்ற சாதனங்களின் மூலம் பரந்து விரியும் மாய உலகனுள் பரவிக் கிடக்கும் விரசத்திற்குள் நம் குழந்தைகள் மாட்டிக்கொள்ளாமல் அவர்களைக் காப்பாற்றும் மிகப் பெரிய பொறுப்பு நமக்கு இருக்கிறது. சுதந்திர உணர்வோடு, சுய நம்பிக்கையோடு ஆனால் அதே சமயம் தன்னை தற்காத்துக்கொள்ளும் தெளிந்த அறிவோடு திகழ்ந்து கொள்ள பெண் குழந்தைகளுக்கு எவ்வாறு நடந்து கொள்ள வேண்டும் என்று சிறு வயதில் இருந்தே சொல்லித் தர வேண்டும்.

பா.ஜோதி நிர்மலாசாமி, ஐ.ஏ.எஸ்.

திருமணத்திற்கு பிறகுகூட இலைமறைவு காயாக அனுமதிக்கப்பட்ட பாலியல் உறவு, வெளிப்படையாக மார்க்கெட்டிற்கு வந்துவிட்ட பிறகு அதன் விலையும் உயர்ந்துவிட்டது. பொது இடங்களில் மற்றவர்களிடம் இதைப்பற்றி பேசவே தயங்கும் தலைமுறைகள் இன்று இல்லை. அவர்களுக்கு தேவைக்கு அதிகமாக திகட்ட திகட்ட எல்லாமுமே வலைத்தளங்களில் கிடைத்துவிடுகிறது. அவைகள் சமூகத்தில் ஏற்படுத்திய மோசமான விளைவுகளால் திருமணத்திற்கு முந்தைய பாலியல் உறவு என்பது சாதாரண விஷயமாகிவிட்டது.

சமூக வலைத்தளத்திற்கு அடிமையாகியிருக்கும் இளைஞர்கள் பற்றி எடுக்கப்பட்ட சர்வே, ‘22-ல் இருந்து 34 வயது வரையிலான இளைஞர்கள் அதுவே கதியென்று கிடக்க பாலியல் விஷயங்களே காரணமாக இருக்கின்றன’ என்று குறிப்பிடுகிறது. அவர்களின் மாத வருமானத்தில் 30 சதவீதம் இதற்கே செலவாகிவிடுகிறது. இதில் பல ஏமாற்று வேலைகளும் நடக்கிறது.

எந்த ஓட்டல் உணவு தேவைப்படுகிறதோ அதை ஆன்லைனில் பதிவுசெய்து பெற்றுக்கொள்ளலாம். அதன் மூலம் வீட்டில் இருந்தே விரும்பிய சுவையை ருசிக்கலாம். அதுபோல், ‘போட்டோவை பாருங்கள்.. தேவையை சொல்லுங்கள்.. வீட்டிற்கே அனுப்பிவைக்கிறோம்’ என்று சொல்லும் அளவுக்கு ஆன்லைன் ‘வியாபாரம்’ அச்சுறுத்திக்கொண்டிருக்கிறது. இ்ந்த வியாபாரத்திற்கான விளம்பரங்களிலும் புதிய யுக்திகளை கையாளுகிறார்கள். அவர்களாகவே வயதுக்குதக்கபடி பெண்களை வகைப் படுத்திக்கொள்கிறார்கள். கல்லூரி மாணவிகள், குடும்பப் பெண்கள், அலுவலகம் செல்வோர் என்று தனித்தனியாக பிரித்து, ஒவ்வொன்றிற்கும் ஒவ்வொருவிதமாக கட்டணம் நிர்ணயித்து வலைத் தளங்களில் பகிரங்கமாகவே விளம்பரம் செய்கிறார்கள்.

இத்தகைய விளம்பரங்களை பார்த்து, தங்களது பாலியல் செயல்பாடுகளை ரகசியமாக தொடர விரும்பும் இளைஞர்கள் பல்வேறு விதமான ஆபத்துக்களை இதில் சந்திக்கிறார்கள். ஏராளமான பொருள் இழப்புகளும், மன அழுத்தங்களும், குற்ற உணர்வுகளும் ஏற்படுகின்றன. ‘பிளாக்மெயில்’ செய்யப்படும் சிக்கல்களும் உண்டு.


இரண்டாவது வகையான ரகசியத்தன்மை கொண்டவர்கள் எல்லாவற்றையும் மறைமுகமாகவே நடத்த விரும்புவார்கள். இவர்கள் மனதில் என்ன இருக்கிறது என்பதையோ, இவர்கள் பெண்கள் விஷயத்தில் எத்தகைய குணாதிசயங்களை கொண்டவர்கள் என்பதையோ கண்டுபிடிக்க முடியாது. தங்களது அத்தனை செயல்பாடுகளிலும் ரகசியம் காக்கும் இவர்கள், பாலியல் வேட்கை விஷயத்தில் மர்மமாக நடந்துகொள்வார்கள். இப்படிப்பட்டவர்களே சமூக வலைத்தளம் தொடர்பான பாலியல் செயல்பாடுகளில் அதிக ஆர்வம் கொண்டவர்களாக இருக்கிறார்கள். அவைகளில் ஏமாறுவது, ஏமாற்றத்தை தாங்கிக்கொள்ள முடியாமல் தற்கொலை முடிவெடுப்பது போன்றவைகளிலும் ஈடுபடுகிறார்கள்.

‘எல்லாம் வலைத் தளமயம்’ என்ற நிலை ஏற்பட்டுள்ளதால் மரபுரீதியான பாலியல் தொழிலில் ஈடுபட்டிருக்கும் பெண்கள், தங்கள் தொழில் நசிந்துபோய்விட்டதாக புலம்புகிறார்கள். ‘சந்தைக்கு வராமலே நேரடியாக கொள்முதல் நடந்துவிடுகிறது’ என்று புலம்புகிறார்கள். இ்ன்னொருபுறத்தில் இவர்களை நம்பி வாழ்ந்த இடைத்தரகர்கள் கூட்டமும், ‘வேலைவாய்ப்பு பறிபோய்விட்டதாக’ சொல்கிறது.

இளைஞர்கள் வலைத்தள பாலியலை பாதுகாப்பாக நினைக்கிறார்கள். ஆனால் பெருமளவு பணத்தை அதில் இழந்துகொண்டிருக்கிறார்கள். இழப்புகளை அவர்களால் வெளியில் சொல்லமுடிவதில்லை. விளம்பரத்தின் மூலம் அவர்கள் ஏமாறும்போது, விளம்பரம் செய்தவர்கள் யார் என்றே தெரிந்து கொள்ள முடிவதில்லை. மர்மமானவர்களுக்காக தங்கள் மாதச் சம்பளங்களை இழந்துகொண்டிருக்கிறார்கள்.

வீடியோ சாட், செல்போன் சாட் மூலம் பணத்தை இழப்பதோடு, அவர்களது பாலியல் எண்ணங்களும் பாதை மாறி சென்றுகொண்டிருக்கிறது. இணைய பக்கங்களில் "பேச விருப்பமா" என்று ஒரு அழகான பெண் படத்தைப் போட்டு விளம்பரம் செய்திருப்பார்கள். சரி பேசித்தான் பார்ப்போமே என்று பேச ஆரம்பித்துவிட்டால், மணிக்கணக்கில் பேசி பணத்தை இழக்கவேண்டியதிருக்கும். வலைத் தளத்தில் வலைவீசுபவர்களில் பெரும்பாலானவர்கள் போலியானவர்களே!

இந்த வலைத்தள பாலியல் வியாபார மோகத்தில் பாதிக்கப்படுவது ஆண்கள் மட்டுமல்ல, பெண்களும்தான். வேலைவாய்ப்பு வழங்குவதாக கூறி பெண்களை ஆசைகாட்டி இந்த தொழிலுக்கு அழைத்துவந்து அவர்களது எதிர்காலத்தை கேள்விக்குறியாக்கிவிடுகிறார்கள். இதனால் பாதிக்கப்பட்ட பெண்களின் பட்டியலும் வெகு நீளமாகவே இருக்கிறது. ஆண்களும், பெண்களும் விழிப்போடும், ஒழுக்கத்தோடும் இருந்தால் அவர்களுக்கு மட்டுமல்ல, சமூகத்திற்கும் நல்லது!