நீங்கள் தேடியது "வனவிலங்கு ஆர்வலர்கள்"

இந்தியாவின் புலி மனிதன் என்று அழைக்கப்படும் புலிகள் பாதுகாவலர் வால்மிக் தாப்பர் (73) காலமானார்.

புற்றுநோயுடன் போராடி வந்த அவர், டெல்லியின் கௌடில்யா மார்க்கில் உள்ள தனது இல்லத்தில் இன்று காலமானார். இன்று மாலை அவரின் இறுதிச் சடங்கு நடைபெற உள்ளது.

வால்மிக் 40 ஆண்டுகளுக்கும் மேலாக வனவிலங்கு பாதுகாப்புக்காக தனது வாழ்க்கையை அர்ப்பணித்தார். குறிப்பாக இந்தியாவின் தேசிய விலங்கான புலிகளைப் பாதுகாப்பதில் அதிக கவனம் செலுத்தினார்

1988 ஆம் ஆண்டில், வனவிலங்கு பாதுகாப்புக்கான இலாப நோக்கற்ற அமைப்பான ரந்தம்போர் அறக்கட்டளையை அவர் நிறுவினார்.

புலி வேட்டையை தடுத்து, இயற்கை புலி வாழ்விடங்களைப் பாதுகாப்பதற்காக போராடினார்.

வால்மிக் பிரபல பத்திரிகையாளர் ரொமேஷ் தாப்பரின் மகன். புகழ்பெற்ற வரலாற்றாசிரியர் ரோமிலா தாப்பர், ரோமேஷ் தாப்பரின் சகோதரியாவார். புகழ்பெற்ற பத்திரிகையாளர் கரண் தாப்பரும் இந்தக் குடும்பத்தைச் சேர்ந்தவர்.

வால்மிக் தாப்பர் வனவிலங்குகள் பற்றிய 30க்கும் மேற்பட்ட புத்தகங்களை எழுதி திருத்தியுள்ளார். அவற்றில், புலிகளின் நிலம்: இந்திய துணைக் கண்டத்தின் இயற்கை வரலாறு (1997) மற்றும் புலி தீ: இந்தியாவில் புலியின் 500 ஆண்டுகள் ஆகியவை மிகவும் பிரபலமானவை. இதுதவிர பல ஆவணப்படங்களை உருவாக்கினார்.

தேசிய வனவிலங்கு வாரியம் உட்பட 150க்கும் மேற்பட்ட அரசு குழுக்கள் மற்றும் பணிக்குழுக்களில் தாப்பர் பணியாற்றியுள்ளார்.

மனித தலையீடு இல்லாத புலிகளுக்கான ஒரு பகுதியை உருவாக்க அவர் தனது வாழ்நாள் முழுவதும் வாதிட்டார். 

மறைந்த முன்னாள் இந்திய பிரதமர் இந்திரா காந்தியின் மறைந்த மூத்த மகனான சஞ்சய் காந்தியின் மனைவி மேனகா காந்தி. இவர் தீவிர வனவிலங்கு உரிமை ஆர்வலராகவும் சுற்றுபுற சூழல் ஆர்வலராகவும் செயல்படுபவர். தற்போது ஆளும் பா.ஜ.க.வை சேர்ந்த மக்களவை உறுப்பினராக இருக்கும் இவர் பல முறை மக்களவை உறுப்பினராகவும், மத்திய அமைச்சராகவும் இருந்துள்ளார்.

இந்துக்கள் வழிபடும் தெய்வமான பகவான் ஸ்ரீகிருஷ்ணரின் பெயரால் இந்தியாவை சேர்ந்த இந்து மதகுரு 'ஸ்ரீபக்தி வேதாந்த சுவாமி பிரபுபாதர்' என்பவரால் தொடங்கப்பட்ட இயக்கம், இஸ்கான் எனும் "சர்வதேச கிருஷ்ணர் விழிப்புணர்வுக்கான சமூக அமைப்பு" (ISKCON). "ஹரே ராமா ஹரே கிருஷ்ணா" இயக்கம் எனவும் வழங்கப்படும் இந்த இயக்கத்திற்கு, அமெரிக்கா உட்பட பல்வேறு மேற்கத்திய நாடுகளிலும் கிளைகள் உள்ளது. தங்கள் கோட்பாடுகளில் ஒன்றாக சைவ உணவு பழக்கத்தை பிரச்சாரம் செய்யும் இவர்கள் உணவில் பாலை முக்கிய பொருளாக சேர்த்து கொள்ளும் பழக்கமுள்ளதால் பசுக்களை வளர்ப்பதில் ஈடுபாடுடையவர்கள். அதற்காக பசுக்களை வளர்க்கும் கோசாலைகளை அதிகளவில் பராமரித்து வருகிறார்கள்.

இந்நிலையில், மேனகா காந்தி, இந்த அமைப்பின் மீது குற்றம்சாட்டி வீடியோ பதிவிட்டுள்ளார்.

அவர் கூறியிருப்பதாவது:

இஸ்கான் நாட்டிலேயே மிக பெரிய மோசடி அமைப்பு. அவர்கள் கோசாலை அமைக்க அரசாங்கத்திடமிருந்து உதவிகளை பெற்று பெரிய நிலபரப்புகளை பெற்று கொள்கிறார்கள். பால் மற்றும் பசு வளர்ப்பை ஊக்கப்படுத்தி பிரச்சாரம் செய்கிறார்கள். ஆனால், அவர்களை போல் பசுக்களை இறைச்சிக்கு அதிகளவில் விற்பனை செய்பவர்கள் யாருமில்லை. ஆந்திராவிலுள்ள அனந்தபூர் கோசாலைக்கு சென்றிருந்தேன். அங்கு பால் தருவதை நிறுத்தியதால் பராமரிக்கப்படும் பசுக்கள் ஒன்றை கூட என்னால் காண முடியவில்லை. அனேகமாக அவர்கள் பசுக்களை கசாப்பு கடைக்காரர்களுக்கு விற்று விடுகிறார்கள்.

இவ்வாறு மேனகா தெரிவித்திருந்தார்.

இக்குற்றச்சாட்டிற்கு மறுப்பு தெரிவித்து இஸ்கான் இயக்க செய்தி தொடர்பாளர் யுதிஷ்டிர் கோவிந்தா தாஸ் அறிக்கை வெளியிட்டுள்ளார்.

அவர் அதில் கூறியதாவது;

மேனகா காந்தியின் இந்த கருத்து ஆச்சரியத்தை அளிக்கிறது. மாட்டிறைச்சியை பெருமளவில் உண்ணும் பல நாடுகளில் கூட இஸ்கான் பசுக்களை காப்பது குறித்து விழிப்புணர்வு ஏற்படுத்தி வருகிறது. இந்தியாவில் 60க்கும் மேற்பட்ட கோசாலைகளை அமைத்து பசுக்களையும், எருதுக்களையும் அவை பால் சுரப்பதை நிறுத்திய பிறகும் கூட அதன் வாழ்நாள் முழுவதும் இஸ்கான் பராமரித்து வருகிறது. விபத்தில் காயமடைந்த பசுக்களையும், கசாப்பு கடைக்கு கொண்டு செல்லப்படும் பசுக்களையும் மீட்டு வளர்த்து வருகிறது. எங்கள் அமைப்பின் கோசாலைகளை நேரில் கண்டு பலர் பாராட்டியுள்ளனர். உள்ளூர் அதிகாரிகளால் தரப்பட்ட சில கோப்புகள் இத்துடன் இணைக்கப்பட்டுள்ளது. அவற்றை பரிசீலித்தால் உண்மை விளங்கும்.

இவ்வாறு அவர் தெரிவித்துள்ளார்.