நீங்கள் தேடியது "மானிய விலையில் விதைகள்"

ஓசூர்,

ஓசூர் வேளாண்மை உதவி இயக்குநர் புவனேஸ்வரி வெளியிட்டுள்ள செய்திக்குறிப்பில் கூறியிருப்பதாவது:-

ஓசூர் வட்டாரத்தில் மழை பெய்து வருவதால் நடப்பாண்டு மானாவாரி பயிராக 6 ஆயிரம் எக்டேர் பரப்பளவில் ராகி விதைப்பு செய்யப்படும் என எதிர்ப்பார்க்கப்படுகிறது. இப்பருவத்திற்கு தேவையான ராகி ரகங்களாக கே.எம்.ஆர் 204, ஜிபியூ 66 ரகங்கள் 18 டன் விதைகளும் மற்றும் துவரை ரகங்களாக பிஆர்ஜி 1, பிஆர்ஜி 5 ரகங்கள் 7 டன் விதைகள் ஓசூர் வேளாண்மை விரிவாக்க மையத்தில் இருப்பு வைக்கப்பட்டுள்ளது.

இந்த விதைகள், உணவு மற்றும் ஊட்டச்சத்து திட்டத்தில் ஒரு கிலோவிற்கு 50 சதவீத மானியத்தில் விவசாயிகளுக்கு வழங்கப்பட்டு வருகிறது. தேசிய சமையல் எண்ணெய் இயக்கம் திட்டத்தின் கீழ் நிலக்கடலை ரகமான கதிரி 1812 ரகம் 1600 கிலோ ஓசூர் வேளாண்மை விரிவாக்க மையத்தில் இருப்பு வைக்கப்பட்டுள்ளது.

மேலும், உயிர் உரங்களாக அசோஸ்பைரில்லம், பாஸ்போ பாக்டீரியா மற்றும் நுண்ணூட்ட சத்து உரங்கள் 50 சதவீத மானியத்தில் வழங்கப்படுகிறது. அத்துடன் 100 சதவீத மானியத்தில் பிரதம மந்திரி நுண்ணீர் பாசன திட்டத்தில் சொட்டு நீர் பாசனம் அமைக்க தேவையான பொருட்கள் சிறு, குறு விவசாயிகளுக்கு 75 சதவீத மானியத்தில் வழங்கப்பட்டு வருகிறது. துணை நீர் பாசன மேலாண்மை திட்டத்தில் டீசல் மோட்டர் அல்லது மின் மோட்டார் அமைப்பதற்கு 50 சதவீத மானியத்தில் அதிகபட்சமாக ரூ.15 ஆயிரம், நீர் கொண்டு செல்லும் பிவிசி குழாய்களுக்கு 50 சதவீத மானியத்தில் அதிகபட்சமாக ரூ.10 ஆயிரம், தரைமட்ட நீர் சேமிப்பு தொட்டி அமைக்க 50 சதவீத மானியத்தில் அதிகபட்சமாக ரூ.40 ஆயிரம் அல்லது சதுர கன மீட்டருக்கு ரூ.350 வீதம் மானியமாக வழங்கப்படுகிறது.

மேலும், பிரதம மந்திரி பயிர் காப்பீட்டுத் திட்டத்தில் பருவத்திற்கேற்ப பயிர்களுக்கு ஏற்ப காப்பீடு செய்து பயன்பெறலாம். இவ்வாறு அதில் கூறப்பட்டுள்ளது.

வேலூர்:

காட்பாடி யூனியனில் 41 பஞ்சாயத்துகள் உள்ளன. இதில், பெரும்பாலானவை விவசாய நிலங்களை சார்ந்த கிராமங்களாகும்.

இதனால், காட்பாடி வட்டார வேளாண் விரிவாக்க மையத்தில், மானிய விலையில் விதைகள், உரம் வகைகள், விவசாய கருவிகள் வழங்கப்படுகிறது.

இந்நிலையில், நடப்பு ஆண்டு சாகுபடிக்குதேவையான நெல் (கோ-51), ஆர்என்ஆர், உளுந்து, துவரை, கேழ்வரகு உள்ளிட்ட விதைகள் வந்துள்ளதாகவும், விவசாயிகள் தங்கள் நிலத்தின் சிட்டா, ஆதார் கார்டு நகலை அலுவலகத்தில் கொடுத்துவிதைகளை பெற்றுக்கொள்ளுமாறு வேளாண் அதிகாரிகள் தெரிவித்துள்ளனர்.

மேலும், பயிர்களை பூச்சி தாக்குதலில் இருந்து காக்கவும், அதிக மகசூல் தரக்கூடிய நுண்ணூட்டசத்து, திரவ உயிர் உரங்கள் ஆகியவையும் 50 சதவீதம் மானியத்தில் வழங்கப்படுகிறது.

தேவையானவர்கள் பெற்று பயன்பெறுமாறு தெரிவிக்கப்பட்டுள்ளது.

நடப்பாண்டில் காட்பாடி யூனியனில் மணிலா 2,500 ஹெக்டேர், நெல் 750 ஹெக்டேர், கரும்பு 350 ஹெக்டேர், காய்கறி வகைகள் 50 ஹெக்டேர் பரப்பளவில் பயிரிடப்பட்டுள்ளதாக அதிகாரிகள் வேளாண் துறை தெரிவித்தனர்.