இந்தியா - பாகிஸ்தான் இடையிலான ஆட்டம் நேற்று மான்செஸ்டரில் நடைபெற்றது. முதலில் பேட்டிங் செய்த இந்தியா ரோகித் சர்மாவின் (140 ரன்) அதிரடி ஆட்டத்தால் 336 ரன்கள் குவித்தது. பின்னர் விளையாடிய பாகிஸ்தான் 40 ஓவரில் 6 விக்கெட் இழப்பிற்கு 212 ரன்கனே சேர்த்தது.
டக்வொர்த் லிவிஸ் விதிப்படி இந்தியா 89 ரன்கள் வித்தியாசத்தில் வெற்றி பெற்றது. 140 ரன்கள் குவித்த ரோகித் சர்மா ஆட்ட நாயகன் விருது பெற்றார்.
போட்டி முடிந்த பின்னர் இந்திய துணைக் கேப்டனான ரோகித் சர்மா பத்திரிகையாளர்களுக்கு பேட்டியளித்தார். அப்போது, பாகிஸ்தான் பத்திரிகையாளர் ரோகித் சர்மாவிடம், ‘‘நீங்கள் சிறப்பாக விளையாடினீர்கள். இதற்காக நான் உங்களை பாராட்டுகிறேன். பாகிஸ்தானுக்கு எதிராக இந்தியா உலகக்கோப்பையில் சிறப்பாக விளையாடி வருகிறது.
பாகிஸ்தான் பேட்ஸ்மேன்கள் மோசமான ஆட்டத்தை வெளிப்படுத்தி விமர்சனத்திற்குள்ளாக வருகிறார்கள். அவர்கள் விமர்சனத்தில் இருந்து வெளியே வந்து சிறப்பான ஆட்டத்தை வெளிப்படுத்த நீங்கள் ஆலோசனை கூறுவதாக இருந்தால், அது என்னவாக இருக்கும்?’’ என்று கேட்டார்.
அதற்கு பதில் அளித்த ரோகித் சர்மா ‘‘நான் எப்போதாவது பாகிஸ்தான் அணியின் பயிற்சியாளரானால், இந்த கேள்விக்கு பதில் அளிக்கிறேன்’’ என்று நறுக்கென கூறினார்.
