இஸ்லாமாபாத்:
டொனால்ட் டிரம்ப் நிர்வாகத்தின் முதல் பிரதிநிதியாக அமெரிக்க வெளியுறவுத்துறை மந்திரி ரெக்ஸ் டில்லர்சன் இன்று பாகிஸ்தான் வந்தடைந்தார்.
முன்னதாக எதிர்பாராத திடீர் விஜயமாக நேற்று ஆப்கானிஸ்தானுக்கு சென்ற ரெக்ஸ் டில்லர்சன், பாகிஸ்தானில் இயங்கிவரும் தீவிரவாத இயக்கங்களுக்கு பகலிடம் அளிப்பது தொடர்பான பார்வையை பாகிஸ்தான் மாற்றிக்கொள்ள வேண்டும் என குறிப்பிட்டிருந்தார்.
அங்குள்ள தலிபான்கள் உள்ளிட்ட தீவிரவாத அமைப்புகளுக்கு கிடைத்துவரும் ஆதரவை முறியடிக்க தேவையான நடவடிக்கைகளை எடுக்குமாறு பாகிஸ்தானை அமெரிக்க அரசு வலியுறுத்தி வருவதாகவும் அவர் கூறினார்.
பாகிஸ்தான் வெளியுறவுத்துறை மந்திரி காஜா முஹம்மது ஆசிப் அழைப்பை ஏற்று இந்தியா செல்வதற்கு முன்னதாக இன்று மாலை இஸ்லாமாபாத் நகரை வந்தடைந்த ரெக்ஸ் டில்லர்சன் பாகிஸ்தானில் சுமார் 4 மணிநேரம் தங்குகிறார்.
அந்நாட்டின் பிரதமர் ஷாஹித் காக்கான் அப்பாசி, வெளியுறவுத்துறை மந்திரி காஜா முஹம்மது, ராணுவ தளபதி காமர் ஜாவெத் பாஜ்வா ஆகியோரை சந்தித்து ஆலோசனை நடத்தும் அவர் இன்று பின்னிரவு டெல்லி புறப்பட்டு செல்வார் என்று எதிர்பார்க்கப்படுகிறது.
