சீன வலைத்தளத்தில் ரெட்மி நோட் 5: விரைவில் வெளியீடு?

புதுடெல்லி:

சியோமி ரெட்மி நோட் 5 ஸ்மார்ட்போன் சார்ந்த தகவல்கள் இணையத்தில் கசிந்து வருகிறது. விரைவில் வெளியாகலாம் என எதிர்பார்க்கப்படும் ரெட்மி நோட் 5 புகைப்படம் சீன வலைத்தளத்தில் கசிந்துள்ளது.

புதிய ஸ்மார்ட்போன் வெளியீடு சார்ந்த சியோமி சார்பில் அதிகாரப்பூர்வ அறிவிப்பு வெளியிடப்படாத நிலையில் ரெட்மி நோட் 5 சார்ந்த தகவல்கள் தொடர்ந்து வெளியாகி வருகிறது. முன்னதாக ரெட்மி நோட் 5 புகைப்படங்கள் இணையத்தில் கசிந்த நிலையில், இம்முறை வெளியாகியுள்ள புகைப்படத்தின் படி இந்த ஸ்மார்ட்போன் பெசல்-லெஸ் ஸ்மார்ட்போனாக இருக்கும் என தெரியவந்துள்ளது.

சியோமி ரெட்மி நோட் 5 லைவ் புகைப்படங்களுடன், இந்த ஸ்மார்ட்போனின் சிறப்பம்சங்களும் இணையத்தில் கசிந்துள்ளது. இம்முறை வெளியாகியுள்ள தகவல்கள் ஏற்கனவே வெளியான தகவல்களும் ஒன்றாகவே உள்ளது.


தற்சமயம் வெளியாகியுள்ள தகவல்களின் படி சியோமி ஸ்மார்ட்போனில் குவால்காம் ஸ்னாப்டிராகன் 625 பிராசஸர் கொண்டிருக்கும் என கூறப்படுகிறது. ஹார்டுவேர் அம்சங்களை பொருத்த வரை ரெட்மி நோட் 4 உடன் ஒப்பிடும் போது புதிய நோட் 5 ஸ்மார்ட்போனில் அதிகப்படியான மாற்றங்கள் இருக்காது என்றே கூறப்படுகிறது. எனினும் நோட் 5 ஸ்மார்ட்போனின் டிஸ்ப்ளே முற்றிலும் புதியதாக இருக்கும்.

இம்முறை வெளியாகியுள்ள புகைப்படங்களில் நோட் 5 ஸ்மார்ட்போனில் 5.99 இன்ச் 18:9 ஆஸ்பெக்ட் ரேஷியோ கொண்ட ஃபுல் எச்டி பிளஸ் டிஸ்ப்ளே வழங்கப்படும் என கூறப்படுகிறது. இத்துடன் நோட் 5 ஸ்மார்ட்போனில் 64 ஜிபி இன்டெர்னல் மெமரி வழங்கப்படும் என்றும், மெமரியை நீட்டிப்பது குறித்து எவ்வித தகவலும் இல்லை.  

புகைப்படங்களை எடுக்க 12 எம்பி பிரைமரி கேமரா, 5 எம்பி செல்ஃபி கேமரா கொண்டிருக்கும் என்றும் ஆண்ட்ராய்டு 7.1.2 நௌக்கட் இயங்குதளம் கொண்டிருக்கும் என கூறப்படுகிறது. நௌக்கட் இயங்குதளம் வழங்கப்படுவதால் புதிய ஸ்மார்ட்போனில் ஓரியோ அப்டேட் வழங்கப்படும் என எதிர்பார்க்கப்படுகிறது.

இந்தியாவில் அதிகம் விற்பனையாகும் ரெட்மி நோட் 4 போன்றே புதிய நோட் 5 ஸ்மார்ட்போனிலும் பெரிய பேட்டரி வழங்கப்படலாம், அந்த வகையில் புதிய நோட் 5 ஸ்மார்ட்போனில் 4000 எம்ஏஎச் பேட்டரி மூலம் சக்தியூட்டப்படலாம் என கூறப்படுகிறது.