அ.தி.மு.க.அணிகள் இணைய ஓ.பன்னீர்செல்வம் விருப்பம்

ஈரோடு:

ஈரோடு மாவட்டம் அரச்சலூர் அருகே ஓடாநிலையில் உள்ள சுதந்திர போராட்ட வீரர் தீரன் சின்னமலை நினைவிடத்துக்கு முன்னாள் முதல்-அமைச்சரும் அ.தி.மு.க. புரட்சி தலைவி அம்மா அணி தலைவருமான ஓ.பன்னீர்செல்வம் தனது ஆதரவாளர்களுடன் நேற்று மாலை சென்றார்.

முன்னதாக கோவையிலிருந்து காரில் வந்த அவருக்கு பெருந்துறை அருகே உள்ள சிப்காட் பகுதியில் தொண்டர்கள் உற்சாக வரவேற்பு கொடுத்தனர். அவருடன் 50-க்கும் மேற்பட்ட கார்கள் அணிவகுத்து வந்தது.

ஓடாநிலையில் தீரன் சின்னமலை சிலைக்கு ஓ.பன்னீர்செல்வம் மாலை அணிவித்து மரியாதை செய்தார்.

அப்போது அவர் நிருபர்களுக்கு அளித்த பேட்டியில், அ.தி.மு.கவின் 2 அணிகளும் இணைய வேண்டும் என சூசகமாக தெரிவித்தார். அரசியல் பற்றி கூற மறுத்த ஓ.பன்னீர் செல்வம் கூறியதாவது:-

ஆங்கிலேய ஏகாதிபத்திய அரசை எதிர்த்து குரல் கொடுத்தவர் தீரன் சின்னமலை. அவரது தியாகம் போற்றுதலுக்குரியது.

பெற்ற சுதந்திரத்தை காக்க நாம் ஒன்று சேர வேண்டும் விறுப்பு-வெறுப்புகளை துறக்க வேண்டும். ஒரு தாய்மக்களாக வாழ வேண்டும். அது நமது கடமையும் ஆகும்.

இவ்வாறு ஓ.பன்னீர் செல்வம் கூறினார்.

ஓ.பன்னீர்செல்வத்துடன் முன்னாள் அமைச்சர்கள் பொன்னையன், மா.பா.பாண்டியராஜன், நத்தம் விஸ்வநாதன், முனுசாமி, செம்மலை ஆகியோரும் வந்திருந்தனர்.